KAPITULU 25

Kuchi munguhasa kukumba ndako yipi ya kulipinya-pinya?

“Naputukile kulipinya-pinya muze napwile ni miaka 8. Hanyima yingunyingika nyonga lia Zambi ha chikuma chino. Chisuho cheswe chize napwile ni kulipinya-pinya te nakunenganyana chinji. Te nakunyonga ngwami: ‘Kuchi Zambi mahasa kuzanga mutu ngwe yami?’”—Luiz.

MUZE mutu anayi ni kukola, usolo wa kulisumbakenya wa kwoka chinji. Kashika mumu lia chino, mukweze mahasa kuputuka ndako yipi ya kulipinya-pinya. a Atu anji kakunyonga ngwo, kukushi mulonga niumwe ha kulipinya-pinya. Kakwamba ngwo: “Chino chishi kuneha upi niumwe.” Alioze kuli yitela yipema yize yatamba kututwala twehuke ndako yino yipi. Postolo Paulu yasoneka ngwenyi: ‘Kashika shihenu yihanda yenu ya mujimba . . . hakutwala ku . . . usolo upi.’ (A-Kolosu 3:5) Kulipinya-pinya chishi kushiha hanji ngwetu, kutepulula usolo wa kulisumbakenya, alioze chakuwezela usolo wacho. Kuchizako yino twamba, hengwola yize yinasulaho:

● Kulipinya-pinya chakutwala mutu anyonge wika hali iye mwene. Chakutalilaho, muze mutu akulipinya-pinya kakulihulikila wika ha usolo wenyi mwene.

● Kulipinya-pinya chakutwala mutu hanga amone akwo ngwe kali wika yuma ya kuhwisa nayo usolo wenyi wa kulisumbakenya.

● Kulipinya-pinya chakutwala mutu kunyonga chinji hali iye mwene. Chino chakupwisa chikalu kuyuka ni uwahililo uze wakwiza ha kulisumbakenya mu ulo.

Shimbu ulipinye-pinye hanga uhwise usolo we wa kulisumbakenya, sako tachi hanga upwe mukwa-kulihumikiza. (1 A-Tesalonika 4:4, 5) Mba yikukwase kulinga chino, Mbimbiliya yinakwehe chiyulo cha kwehuka yikuma yaswayo yize muyihasa kukunehena usolo wa kulisumbakenya. (Yishima 5:8, 9) Alioze, mba yika mutwamba nyi hiunapu kapinji wa kulipinya-pinya? Hanji hiuneseka kwecha, alioze kuwahashile. Muchipwa chashi kunyonga ngwe kuushi ni ulemu nawa ngwo kuuchi kuhasa kutwama kulita ni shimbi ja Zambi. Mukweze yoze avuluka ngwo Pedro neye che apwile ni kulivwa. Iye yamba ngwenyi: “Muze te nakulipinya-pinya cheka, napwile ni kulivwa chipi.” “Te nakumona ngwe chichikeza kama kwalumuna yitanga yami. Chapwile chikalu kulemba.”

Nyi che wakulivwa, kanda unenganyana. Yena kuwalitokelele. Akweze anji ni makulwana, kechele ndako yino yipi ya kulipinya-pinya. Ni yena muhasa kwecha!

Chize Muhasa Kukumba Manyonga A Kulisuma Mulonga

Ngwe chize hitwamona, anji a kuli waze akwete ndako ya kulipinya-pinya, kanji-kanji manyonga a kulisuma mulonga kakwapinjisa chinji. Kwamba umwenemwene “chinyengo nikulita ni upale wa Zambi” muchihasa kukwaha tachi hanga weche yitanga yino yipi. (2 A-Korindu 7:11) Sali likwo nawa, kulisuma chinji mulonga muchihasa kupwa ponde. Muchihasa kuneha kunenganyana chinji ni kukutwala kwecha kusa tachi hanga weche kulipinya-pinya.—Yishima 24:10.

Kashika sako tachi hanga upwe ni nyonga lialita ha chikuma chino. Kulipinya-pinya chapwa chimwe chitanga cha luchisa. Muchihasa kukutwala hanga upwe kapinji wa usolo upi hamwe ni kunyonga chize kuchalitele. (Titu 3:3) Chipwe chocho, kulipinya-pinya hi shili yinene ko ngwe kulinga utanji. (Yundase 7) Nyi wakupinda ni chako cha kulipinya-pinya, kuchalumbunukine ngwe, walinga shili yize katambille kukukonekena. Chuma chilemu chili kwehuka usolo upi ni kununga ni kusa tachi!

Chili chashi kunenganyana muze muholokela nawa ku chako cha kulipinya-pinya. Ha mashimbu amwe nyi walipinya-pinya cheka nawa, chino kuchalumbunukine ngwo uli mutu mupi. Kashika, kanda uhonga! Shimbu uhonge, hengwola yize yakukutwala hanga ulipinye-pinye ni kuyehuka.

Sako mashimbu hanga upukune ha zango ni keke ya Zambi. Mukwa-kwimba samu Ndawichi, yoze neye wapalikile ha mashimbu a ulelu, yamba ngwenyi: “Ngwe chisemi mavwila keke ana jenyi, chocho Yehova kakuvwila keke waze mamuvwila woma. Mumu kananyingika mijimba yetu; kanewuluka ngwenyi, O kapwa fufuta tuhu.” (Samu 103:13, 14) Kwamba umwenemwene, Yehova kananyingika ngwo tuli yihenge nawa kanazange “kukonekena” atu jenyi. (Samu 86:5) Chipwe chocho, iye kanazange hanga tuse tachi tukumbe ndako jipi. Mba yuma yika muhasa kulinga hanga uhase kukumba ndako yipi ya kulipinya-pinya?

Hengwola mutapu wa yiheho ye. Shina wakutala yinema, programa ja TV hanji kunjila ha site yize yakukutwala kupwa ni usolo wa kulisumbakenya? Mukwa-kwimba masamu kasolwele mana ha kulemba ngwenyi: “Tewulula kama meso jami, kanda atala yuma yamokomoko.” b—Samu 119:37.

Hulikila manyonga je ha yuma yikwo. Umwe Mukwa-Kristu avuluka ngwo William, kanahane chiyulo chino: “Shimbu kanda uchipomba tanga chimwe chikuma cha ku spiritu. Chili chilemu chinji nyi manyonga jetu akasula ha tangwa mapwa a yuma ya ku spiritu.”—A-Fwilipu 4:8.

Hanjika ni umwe ha yize unapalika. Kwivwa sonyi muchihasa kupwisa chikalu kuhanjika ni umwe hakutwala ku yize unapalika. Alioze kuhanjika ni umwe muchihasa kukukwasa kukumba ndako ya kulipinya-pinya. Yino ye anyingikine umwe Mukwa-Kristu avuluka ngwo David, iye yamba ngwenyi “Yinguhanjika ni tata ku mbango, chichikeza kavulama maliji jenyi.” Ni kusehejela tata yangwamba ngwenyi: ‘Ngunawahilila chinji ni yena!’ Iye te kananyingika ngwenyi nafupiwile hamu mba ngumulweze chikuma chacho. Kukushi ni amwe maliji waze te mahasa kunguvwisa kuwaha ni kungukolweza hanga ngununge ni kusa tachi hanga ngukumbe ndako yami yakulipinya-pinya kuhiana chize tata alivwile.

“Tata yangusolwela yisoneko yimwe ya mu Mbimbiliya hanga angukwase kumona ngwami, chalingile shili yinene. Hanyima yangusolwela yisoneko yikwo hanga ngupwe ni shindakenyo ngwami yize nalinga hi yipema ko. Iye yangulweza nawa ngwenyi, chize ha tangwa liacho natamba kusa tachi hanga ngukumbe ndako yino yipi mba kulutwe mutukahanjika nawa ha chikuma chacho. Yamba nawa ngwenyi, te chatambile kunenganyana nyi ngulipinya-pinya cheka nawa, alioze nguse tachi hanga ngupalikise mashimbu anji chakuhona kulihana ku usolo wami.” Shindakenyo yika David awanyine? Iye yamba ngwenyi: “Kulweza umwe ha yize te ngunapalika ni kutayiza ukwaso wenyi, chili chuma chipema chize nalingile.” c

KAPITULU YOZE MAKAULAHO

Kulisumbakenya ni mutu yoze walimbachile nenyi hi chuma cha ngwanza ko. Nyingika mumu liaka.

[Maliji ali mushi]

CHISONEKO CHINAKWATE MUTWE

“Alioze china usolo wa ukweze, ukakaule ululi, ni ufulielo, ni zango, ni sambukila, hamwe ni waze akutambika hali Mwene ni mbunge yipema.”—2 Timoteu 2:22.

YIZE MUHASA KULINGA

Lemba shimbu usolo we kanda uchioka. Eta kuli Yehova akwehe tachi jahiana “ndando” hanga uhase kukumba cheseko chacho.—2 A-Korindu 4:7.

UNACHINYINGIKA NYI . . .

Mutu mweswawo mulelu mahasa kulihana mu usolo wenyi wa kulinga utanji. Alioze, chakufupiwa kupwa lunga hanji pwo wamwenemwene hanga tuhase kukumba usolo upi chipwe muze tuli ukawetu.

YIZE NGUNAFUPU KULINGA!

Munguhasa kuhulikila manyonga jami ha yuma yipema, nyi ․․․․․

Shimbu ngulihane ku usolo wami, yami munguhasa ․․․․․

Yami ngunazange kuhula yisemi jami hakutwala ku chikuma chino ․․․․․

YIKA WANYONGA?

● Mumu liaka chili chilemu kunyingika ngwo Yehova kanazange kutukonekena?—Samu 86:5.

● Chipwe ngwe Zambi katutangile ni usolo wakulisumbakenya, iye kanazange hanga tupwe akwa-kulihumikiza, shina iye mahasa kukujikijila?

[Chikuma chilemu]

“Chize haze nakumbile ndako yino yipi, nguli ni mbunge yitoma kumeso ja Yehova, chino chili chuma chize kuchahashile kutesa ni chuma cheswacho cha hano hashi!”—Sarah

[Chizulie]

Kulimbuka muze unazomboka, chalumbunukine ngwo watamba kufuna nawa kuze waputukilanga kuzomboka. Chizechene nawa, kulipinya-pinya cheka muze unase tachi hanga ukumbe ndako yino yipi, chalumbunukine ngwo tachi jize hiunase jili jamokomoko