“Kumukukapwa uhindukilo” wa afu.—Yilinga 24:15, Mukanda Usandu wa Zambi.

Kakulembejeka waze akufwisa umwe yoze akuzanga.—2 A-Korindu 1:3,4

Kakutusula atu ku woma upi wa ufwe.—Hepreu 2:15.

Kakuhana kutalatala chingunu cha kutwama cheka ni masepa jetu waze hanafu.​—Yoano 5:28, 29.

Ewa, mutuhasa kuyitayiza, ha mukunda wa yitela yitatu:

• Zambi mwe Sakatanga wa mwono. Mbimbiliya yinavuluka Yehova Zambi ngwo ‘iye mwe wakuhana mwono kuli eswe.’ (Yilinga 17:24, 25; Masamu 36:9) Iye Mwe wahanyine mwono kuli yitangiwa yeswe, kashika iye kali ni ndundo ja kufunyisa mwono wa atu waze hanafu.

• Zambi kanakahindwisa afu ku mashimbu akunyima. Mbimbiliya yinasolola yisuho nake ya uhindukilo wa afu—akweze, makulwana, malunga ni mapwo​—waze anakahindwisa ni mwono hano hashi. Amwe kanakalinga mashimbu akehe mu ufwe, alioze umuwika kanakalinga matangwa awana mu fuka!—Yoano 11:39-44.

• Zambi kali ni usona hanga achilinge nawa. Yehova keshi kuzanga ufwe; iye kakuunyonga ngwe mukwa kole. (1 A-Korindu 15:26) Iye kali ni “usona unji” wa kukumba mukwa kole wacho, hanga auhwise ni uhashi wa uhindukilo. Iye kali ni usona wa kuhindwisa atu waze ali mu manyonga jenyi hanga akatwame nawa cheka hano hashi.—Yombi 14:14, 15.