Lilulieke kanawa. Lihitulule mu pande je ndo haze munyingikina kanawa yikuma yilemu ya pande je ni chize Mbimbiliya yinasolola ngwo yikuma yacho yili yamwenemwene. Eseka kulumbununa yikuma yacho mu maliji akehe nawa ashi. Shindakenya ha chize yikuma yacho muyihasa kukwasa waze anakupanjika. Lemba akwehe spiritu yisandu.

Zachisa maliji waze maheta atu ku mbunge. Kanda ufunyina-funyina maliji waze ali akusoneka ha mukanda, alioze zachisa maliji je. Maliji muzachisa katamba kusolola ngwo unanyingika kanawa yize unambe.

Hanjika ni mbunge ye yeswe. Hanjika ni liji lialita. Tala atu anakupanjika, nyi chalita kuchilinga ku chihela kuze nwatwama.