“Chanutamba kupwa alongeshi.” (Hepre. 5:12) Uchivwenu! Yehova—Longeshi yoze wakangana chinji hashi heswe—kanechi hanga tupwe ni kulongesa akwetu hakutwala kuli iye! Chili kuyuka chinene kupwa ni mulimo wakulongesa umwenemwene hali Yehova—apwe mu usoko, mu chikungulwila, hanji mu munda—nawa chili chiteli chinene chinji. Kuchi mutuhasa kuchilinga?

Kumbululo lili mu maliji waze postolo Paulu asonekenene Timoteu, ngwenyi: “Likoleze ku kutanga, ku kushinjila maliji, ku kulongesa.” Paulu yawezelako ngwenyi: “Ha kulinga chino, mukalilamwina yena mwene ni waze akukwivwa nawa.” (1 Timo. 4:13, 16) Ewa, uli ni sango ja kulamwina atu jize watamba kulongesa. Kashika, watamba kusa tachi hanga upwe ni kutanga ni kulongesa kanawa. Mukanda uno kausoneka hanga ukukwase kulinga chocho. Tala yimwe yikuma yikehe yilimo.

Yehova kali “Longeshi” Munene. (Iza. 30:20) Chipwe ngwe mukanda uno muukukwasa ululieke uhashi we wa kutanga ni kulongesa kanawa, alioze kanda uvulama ngwe Yehova mwe mwenya-sango jize muhanjika, nawa iye mwe wakukoka atu. (Yoa. 6:44 ) Kashika, pwako ni kulemba mashimbu eswe akwehe spiritu yisandu. Pwako ni kuzachisa chinji Mbimbiliya. Kwasa atu anyingike Yehova, hi yena ko. Fupa kuheta ku mbunge ja waze makupanjika hanga azange chinji Yehova.

Kanakwichi hanga ulongese atu sango jize jahiana ulemu ha sango jeswe jize atu akuhanjika. Tunafuliela ngwetu, muhasa kulinga mulimo wacho hakujikijila ha ‘ngolo jize akukwaha Zambi.’—1 Petu. 4:11.

Yetu alongeshi-ni-akwenu,

Chizavu cha Tusongo cha Yela ja Yehova