1, 2. Mumu liaka kulemba chili chiwape chilemu, nawa mumu liaka twatamba kunyingika yize Mbimbiliya yakulongesa hakutwala ku kulemba?

NYI twatesa malilu ni hashi, mutumona ngwetu, hashi hakehe chinji. Muze Yehova akutala hashi, kakumona mavungu eswe ja atu ngwe masoto-soto a meya ha mbashiya. (Samu 115:15; Izaia 40:15) Nyi atutesa ni malilu, etu tuli akehe chinji, chipwe chocho, Samu 145:18, 19, unambe ngwo: “Yehova hakamwihi ali ni waze eswe akutambika kuli iye; waze eswe akutambika kuli iye mu umwenemwene. Kumakayukisa usona wa waze akumuvwila woma. Kumakevwa muteto wo, nawa kumakaalamwina.” Chino chili chiwape chipema tulinacho! Yehova, Sakatanga mukwa-ndundo-jeswe, kanazange kukundama kuli yetu, nawa kanazange kwivwa kulemba chetu. Ewa, kulemba chili chiwape chilemu, chize Yehova hanatwehe.

² Alioze Yehova mevwa kulemba chetu nyi mutulemba wika kuli iye mu jila yize akutayiza. Kuchi mutuhasa kuchilinga? Tutalenu yize Mbimbiliya yinambe hakutwala ku kulemba.

3. Mumu liaka watamba kulemba kuli Yehova?

³ Yehova kanazange hanga ulembe kuli iye, hanji uhanjike nenyi. Kuchi tunachinyingika? Tanga A-Fwilipu 4:6, 7. Nyonga hakutwala ku maliji waze aliho. Mwata wa malilu ni hashi kanakuzange chinji nawa kazange hanga umulweze chize unevu hakutwala ku yipikalo ye.

4. Kuchi kulemba mashimbu eswe kuli Yehova chakukolesa usepa we ni iye?

 ⁴ Kulemba chakutukwasa kukolesa usepa wetu ni Yehova. Masepa kakuhanjika chinji kuli umwe ni mukwo hakutwala ku yize akunyonga, ku yipikalo, ni yize akwivwa ku mbunge, yino yakukolesa usepa wo. Chizechene nawa, ni kulemba kuli Yehova che chapwa. Mu Mbimbiliya iye hanasemo manyonga ni chize akwivwa hali yena, nawa kanakulweze yize makalinga kulutwe lia matangwa. Muhasa kumulweza chize wakwivwa ku mbunge ha kulemba kuli iye mashimbu eswe. Nyi walinga chocho, usepa we ni Yehova muukola chinji.—Tiangu 4:8.

5. Kuchi tunanyingika ngwetu Yehova keshi kwivwa kulemba cheswe?

⁵ Kutala Yehova kakwivwa kulemba cheswe nyi? Ka, iye keshi kwivwa kulemba cheswe. Ha mashimbu a profeta Izaia, Yehova yambila A-Izalele ngwenyi: “Chipwe munulemba lembie-e-e, chichi kunwivwa. Moko jenu hazala ni manyinga.” (Izaia 1:15) Kashika, nyi twakeyele, mutuhasa  kulinga yuma yize muyihasa kutusosolola kuli Yehova, nawa chino muchimulingisa hanga alengulule kulemba chetu.

6. Mumu liaka ufulielo uli ulemu? Kuchi muhasa kusolola ngwo uli ni ufulielo?

⁶ Nyi tunazange hanga Yehova evwe kulemba chetu ndo tufuliele muli iye. (Marku 11:24) Postolo Paulu yalumbununa ngwenyi: “Mutu keshi kuhasa kupemena kuli Zambi shina ni ufulielo; mumu yoze meza kuli Zambi ndo mafuliela ngwenyi, Zambi hwali, iye mukwa kwononona waze akumufupa.” (A-Hepreu 11:6) Alioze, kutwatambile kwamba wika ngwo twafuliela. Twatamba kusolola ufulielo wetu kanawa ha kwononokena Yehova matangwa eswe.—Tanga Tiangu 2:26.

7. (a) Mumu liaka twatamba kulikehesa ni kusolola vumbi ha kulemba kuli Yehova? (b) Kuchi mutuhasa kusolola ngwetu tunalembe ni mbunge yeswe?

⁷ Twatamba kulikehesa ni kusolola vumbi muze tunalembe kuli Yehova. Mumu liaka? Nyi mutuhanjika ni umwe mwata hanji mwanangana, twakuhanjika ni vumbi. Yehova kali Zambi Mukwa-Ndundo-Jeswe, kashika, twatamba kusolola vumbi ni kulikehesa muze mutuhanjika nenyi. (Uputukilo 17:1; Samu 138:6) Twatamba nawa kuhanjika umwenemwene ni kulemba ni mbunge yeswe, hi wika ko kufunyina maliji wowene mashimbu eswe.—Mateu 6:7, 8.

8. Muze mutulemba ha chimwe chuma, yika twatamba kulinga?

⁸ Kusulaho, muze mutulemba hakutwala ku chimwe chuma, twatamba kulinga ni kulita ni yuma yize mutwita mu yilemba yetu. Chakutalilaho, nyi twalemba kuli Yehova ha yize tunafupu ha tangwa ni tangwa, kutwatambile kupwa yileya, ni kushimbwila ngwo Yehova matwaha yuma yeswe yize yetu tuli uhashi wa kuyilinga. (Mateu 6:11; 2 A-Tesalonika 3:10) Nyi twalemba kuli Yehova hanga atukwase kwecha yitanga yipi, twatamba kwehuka yihela ni  yuma yize muyihasa kutweseka. (A-Kolosu 3:5) Tutalenu haliapwila yimwe yihula hakutwala ku kulemba.

9. Kuli iya twatamba kulemba? Yika mukanda wa Yoano 14:6 unatulongesa hakutwala ku kulemba?

⁹ Kuli iya twatamba kulemba? Yesu kalongesele tumbaji twenyi hanga alembe kuli ‘Tata yetu wa mu malilu.’ (Mateu 6:9) Yamba nawa ngwenyi: “Ye jila yami, ni we umwenemwene, ni we mwono. Niumwe meza kuli Tata shina ni yami.” (Yoano 14:6) Kashika, twatamba kulemba wika kuli Yehova kupalikila muli Yesu. Kulemba kupalikila muli Yesu yika chinalumbunuka? Mba Yehova evwe kulemba chetu, twatamba kuvumbika chiteli chize Yehova hanahane kuli Yesu. Ngwe chize twalilongesanga, Yesu kejile hano hashi hanga atukule ku shili ni kufwa. (Yoano 3:16; A-Roma 5:12) Yehova hanatongola Yesu hanga apwe Sasendote wa Lutwe nawa Mukwa-kuyula.—Yoano 5:22; A-Hepreu 6:20.

10. Shina twatamba kupwa mu mutapu umwe ulemu muze tunalembe? Lumbununa.

¹⁰ Shina kuli mutapu umwe ulemu uze twatamba kupwa nawo muze tunalembe? Ka, Yehova keshi kutwita ngwenyi muze tunalembe ndo tuse makungunwa hashi, tutwame hanji tumane. Mbimbiliya yakutulongesa ngwo mutuhasa kulemba kuli Yehova mu mutapu weswawo tuli. (1 Sango ja Mianangana 17:16; Nehemia 8:6; Daniele 6:10; Marku 11:25) Chuma chilemu kuli Yehova hi mutapu ko uze mutupwa nawo muze mutulemba, alioze chize mutuhanjika nenyi ni mbunge yipema. Mutuhasa kulemba ni liji mwilu hanji mu mbunge kweswako tuli hanji ha shimbu lieswalio, mwalwa hanji ufuku. Muze mutulemba kuli Yehova mutuhasa kufuliela ngwetu aye matwivwa chipwe ngwe mutu niumwe keshi kutwivwa.—Nehemia 2:1-6.

11. Yuma yika mutuhasa kwita muze tunalembe kuli Yehova?

 ¹¹ Yika mutuhasa kwita ha kulemba chetu? Mutuhasa kulemba hakutwala ku chuma cheswacho chize Yehova akutayiza. Mbimbiliya yinambe ngwo: “Nyi kachi mutwita chuma chimwe cha kulita ni upale wenyi, aye matwivwa.” (1 Yoano 5:14) Shina mutuhasa kulemba hakutwala ku yuma yize tunafupu ku mwono wetu? Mba! Kulemba kuli Yehova chatamba kupwa ngwe kuhanjika ni sepa yoze twazanga chinji. Mutuhasa kulweza Yehova chuma cheswacho tuli nacho mu mbunge. (Samu 62:8) Mutuhasa kumwita hanga atwehe spiritu yenyi yisandu yitukwase kulinga yuma yize yalita. (Luka 11:13) Mutuhasa nawa kwita mana kuli Yehova hanga tukwate yiyulo yipema, nawa mutuhasa kulemba hanga atwehe tachi ja kukumba najo yipikalo. (Tiangu 1:5) Twatamba kwita kuli Yehova hanga atukonekene shili yetu. (A-Efwesu 1:3, 7) Twatamba nawa kulembela akwetu, ngwe asoko, mandumbu, ni mapangi jetu amu chikungulwila.—Yilinga 12:5; A-Kolosu 4:12.

12. Yuma yika yatamba kupwa ni ulemu mu yilemba yetu?

¹² Yuma yika yatamba kupwa ni ulemu mu yilemba yetu? Yehova, ni upale wenyi. Twatamba kumusakwilila ni mbunge yeswe ha yuma yeswe yize akulinga hali yetu. (1 Sango ja Mianangana 29:10-13) Tunachinyingika, mumu muze Yesu apwile hano hashi, aye kalongesele tumbaji twenyi chize atamba kulemba. (Tanga Mateu 6:9-13.) Yamba ngwenyi, o katamba chitangu kulemba hanga jina lia Zambi lipwe lisandu, hanji kulisa vumbi. Mba hi Yesu yasolola ngwenyi twatamba kulemba hanga Wanangana wa Zambi wize ni upale wenyi ulingiwe hashi heswe. Muze mutulemba ha yuma yino yilemu yize Yesu ambile, mba hi mutulemba ha yuma yize tunafupu ku mwono wetu. Nyi twasa Yehova ni upale wenyi kulutwe mu yilemba yetu, mutusolola ngwetu yino yili ni ulemu ku mwono wetu.

13. Yilemba yetu yatamba kumbata mashimbu angahi?

 ¹³ Yilemba yetu yatamba kumbata mashimbu angahi? Mbimbiliya kuyishi kutesa mashimbu. Kulemba chetu muchihasa kumbata mashimbu akehe hanji anji, kulita ni yize tunechi. Chakutalilaho, mutuhasa kulembako chikehe muze tunambe kulia alioze mutuhasa kulemba shimbu lisuku hanga tusakwile Yehova hanji kumulweza chize tunevu. (1 Samuele 1:12, 15) Kutwatambile kulemba shimbu lisuku hanga tukomwese akwetu, ngwe chize apwile ni kulinga atu amwe ha matangwa ja Yesu. (Luka 20:46, 47) Yehova  keshi kuzanga kulemba cha mutapu au. Chuma chilemu kuli Yehova chili kulemba kuli iye ni mbunge yetu yeswe.

14. Ha yisuho yingahi twatamba kulemba, nawa yika chino chinatulongesa hakutwala kuli Yehova?

¹⁴ Ha yisuho yingahi twatamba kulemba? Yehova kanatwite hanga tulembe kuli iye mashimbu eswe. Mbimbiliya yinambe ngwo, “lenu, lembenu,” “nyongononenu mu kulemba,” “lembenu ni kulitwamina nichimwe.” (Mateu 26:41; A-Roma 12:12; 1 A-Tesalonika 5:17) Yehova kakutwivwa mashimbu eswe. Mutuhasa kumusakwila matangwa eswe ha zango lize akwete hali yetu ni ha yize akutwaha. Mutuhasa nawa kulemba kuli iye hanga atwehe usongwelo, tachi ni utakamiso. Nyi twakulemesa lume chiwape chize tulinacho cha kulemba kuli Yehova, mutuzachisa uhashi weswe uze tuli nawo hanga tuhanjike nenyi.

15. Mumu liaka twatamba kwamba “Amene” kusongo lia kulemba?

¹⁵ Mumu liaka twatamba kwamba “amene” kusongo  lia kulemba? Liji “amene” linalumbunuka “ewa” hanji ngwo “chochene.” Uli umwe mutapu wakusolwelamo ngwo, tunatayiza yize tunambe mu yilemba yetu nawa ngwetu yili yamwenemwene. (Samu 41:13) Mbimbiliya yinatulongesa ngwo, chili chipema kwamba “amene,” muze tunalembe mu mbunge hanji mwilu, chipwe kusongo lia kulemba cha ha mbunga hanga tusolole ngwetu twatayiza yuma yize amba mu yilemba.—1 Sango ja Mianangana 16:36; 1 A-Korindu 14:16.

16. Shina chamwenemwene Yehova kakumbulula yilemba yetu? Lumbununa.

¹⁶ Shina chamwenemwene Yehova kakumbulula yilemba yetu? Ewa, kakukumbulula! Mbimbiliya yinambe ngwo, Yehova kali Mukwa-kwivwa “kulemba.” (Samu 65:2) Yehova kakwivwa ni kukumbulula yilemba ya tununu a tununu twa atu, nawa kakuchilinga mu majila eka ni eka.

17. Kuchi Yehova akuzachisa angelo ni tuvumbi twenyi a hano hashi hanga akumbulule yilemba yetu?

¹⁷ Yehova kakuzachisa angelo ni tuvumbi twenyi a hano hashi hanga akumbulule yilemba yetu. (A-Hepreu 1:13, 14) Kuli sango jinji ja atu waze alembele kuli Zambi hanga aakwase kunyingika umwenemwene wa mu Mbimbiliya, ha shimbu likehe wika tuvumbi twa Yehova yaya ni kwaakwasa. Mbimbiliya yinasolola ngwo angelo kakukwasa mulimo wakwambujola “sango lipema.” (Tanga Usolwelo 14:6.) Nawa, anji akuli yetu hitunalembe kuli Yehova hakutwala ku umwe kapalia hanji ha yize te tunafupu, mba yitutambula ukwaso kupalikila kuli umwe ndumbu hanji pangi, mukwa-Kristu.—Yishima 12:25; Tiangu 2:16.

18. Kuchi Yehova akuzachisa spiritu yenyi yisandu ni Mbimbiliya hanga akumbulule kulemba chetu?

¹⁸ Yehova kakuzachisa spiritu yenyi yisandu hanga akumbulule  yilemba yetu. Nyi mutulemba hanga atukwase kukumba umwe kapalia, iye mahasa kuzachisa spiritu yenyi yisandu hanga atusongwele ni kututakamisa. (2 A-Korindu 4:7) Yehova nawa kakuzachisa Mbimbiliya hanga akumbulule kulemba chetu ni kutukwasa hanga tukwate yiyulo ya mana. Muze mututanga Mbimbiliya, mutuhasa kuwanamo yimwe yisoneko yize muyihasa kutukwasa. Yehova nawa mahasa kuzachisa umwe mutu yoze mahana kumbululo ku kukunguluka ha kwamba yize tunafupu kwivwa hanji ­mukulwana wa mu chikungulwila hanga ashimutwine ni yetu chimwe chikuma cha mu Mbimbiliya.—A-Ngalishia 6:1.

19. Mumu liaka mutuhasa kumona ngwe Yehova keshi kukumbulula yilemba yetu?

¹⁹ Ha mashimbu amwe, mutuhasa kulihula ngwetu: ‘Mumu liaka Yehova keshi kukumbulula yilemba yami ha shimbu lioliene?’ Iwuluka ngwe, iye kananyingika chize makumbulula yilemba yetu. Iye kanyingika yize tunafupu. Mutuhasa kununga ni kulemba ha limwe shimbu hanga tusolole umwenemwene wa yize tunambe kuli iye, nawa hanga tusolole ngwetu twakufuliela muli iye ni umwenemwene weswe. (Luka 11:5-10) Ha mashimbu amwe Yehova mahasa kukumbulula kulemba chetu mu jila yize kutwanyingikine. Chakutalilaho, mutuhasa kulemba hakutwala ku umwe kapinda, chipwe ngwe hanji iye kechi kutuchiza kapinda wacho, nihindu mahasa kutwaha tachi ja kunyongonona.—Tanga A-Fwilipu 4:13.

20. Mumu liaka twatamba kulemba kuli Yehova mashimbu eswe?

²⁰ Kulemba kuli Yehova chili chimwe chawana chilemu chinji! Kashika mutuhasa kupwa ni shindakenyo ngwetu, aye matwivwa. (Samu 145:18) Nyi twapwa ni kulemba mashimbu eswe kuli Yehova ni mbunge yetu yeswe, usepa wetu ni iye muukola chinji.