1, 2. Aya apwile masepa ja Yehova?

IYA unazange hanga apwe sepa lie? Mutu yoze yena wakuzanga. Yoze wakulivwashana nenyi kanawa. Mutu wacho katamba kupwa nawa yitanga yize wakuzanga chinji.

² Yehova Zambi kakusakula amwe atu hanga apwe masepa jenyi. Chakutalilaho, Yehova yavuluka Apalahama ngwenyi, sepa lienyi. (Izaia 41:8; Tiangu 2:23) Yehova nawa kazangile Ndawichi. Yamuvuluka ngwenyi, “lunga wa kulita ni mbunge yami.” (Yilinga 13:22) Profeta Daniele neye te ‘kakumuzanga chikolo’ kuli Yehova.—Daniele 9:23.

3. Mumu liaka Apalahama, Ndawichi ni Daniele apwile masepa ja Yehova?

³ Kuchi chapwile mba Apalahama, Ndawichi ni Daniele apwe masepa ja Yehova? Yehova kambile kuli Apalahama ngwenyi: “Hiunononoka ku liji liami.” (Uputukilo 22:18) Yehova kakupwa sepa lia waze akumwononokena. Chipwe vungu mulihasa kulinga usepa ni Yehova. Yehova kalwezele vungu lia A-Izalele ngwenyi: “Ononokenu ku liji liami, mba mungupwa Zambi yenu ni yenu munupwa atu jami.” (Jeremia 7:23) Kashika, ni yena watamba kwononokena Yehova, mba upwe sepa lienyi.

4, 5. Kuchi Yehova akufunga masepa jenyi?

⁴ Mbimbiliya yinambe ngwo Yehova kakutala hano hashi, “akalisolole mukwa tachi kukwasa yoze uli ni mbunge yingunu kuli iye.” (2 Sango ja Mianangana 16:9)  Mu mukanda wa Samu 32:8, Yehova kanalakenya masepa jenyi ngwenyi: ‘Mungunufumba, mungunulongesa jila yize nwatamba kwenda. Mungunwaha mana nikunutala ni liso liami.’

⁵ Kuli mukwa-kole wa ndundo jinji yoze kazangile hanga tupwe masepa ja Zambi. Alioze Yehova kanazange kutufunga. (Tanga Samu 55:22.) Twakuwayila Yehova ni mbunge yeswe mumu tuli masepa jenyi. Twakushishika kuli iye chipwe ha mashimbu akalu. Nawa tuli ni ushindakenyo uze-wene apwile nawo mukwa-kusoneka Masamu. Iye yasoneka hakutwala kuli Yehova ngwenyi: “Chichi kakokoloka mumu iye kanamana ku chindume chami.” (Samu 16:8; 63:8) Kuchi Satana akutukwika kupwa masepa ja Zambi?

6. Yika Satana alamikijile hali atu?

⁶ Mu Kapitulu 11 twalilongesa ngwo Satana kalamikijile Yehova ngwenyi kali mukwa-saki nawa ngwenyi hi mukwa-ululi ko mumu kakechele Alama ni Eva hanga asakule ene chipi ni chipema. Mukanda wa Yombi unatulongesa ngwo Satana kakulamikiza nawa atu waze akuzanga kupwa masepa ja Zambi. Satana kambile ngwenyi atu kakuwayila Zambi mumu ha yize ayo mahasa kuzuka kuli Iye, hi ko ngwo kakumuzanga. Satana kambile nawa ngwenyi, mahasa kupiangula mutu mweswao hanga alimike ni Zambi. Tutalenu yize mutuhasa kulilongesa ku chilweza cha Yombi ni chize Yehova amufungile.

7, 8. (a) Kuchi Yehova evwile hali Yombi? (b) Yika Satana ambile hali Yombi?

⁷ Yombi te iya? Iye kapwile lunga mupema yoze wapwileko miaka 3,600 kunyima. Yehova kambile ngwenyi ha shimbu liacho kwakapwile lunga niumwe hano hashi walifwa ngwe iye. Yombi kapwile ni kuvumbika chinji Zambi,  ni kwivwila kole yuma yipi. (Yombi 1:8) Kashika, Yombi wapwile sepa mupema wa Yehova.

⁸ Satana kahamikine ngwenyi, Yombi keshi kuwayila Zambi ni umwenemwene. Aye yamba kuli Yehova ngwenyi: “Ngwami, Hiwamushichila chipanga cha kumufunga sali ni sali, ni zuwo lienyi, ni upite wenyi weswe. Hiwawahisa milimo ya moko jenyi, ni yikumba yenyi hiyoka mu chifuchi. Alioze olola kwoko lie haliapwila, usunge ku upite wenyi weswe mba makutuka kwe kumeso je.”—Yombi 1:10, 11.

9. Yika Yehova echele hanga Satana alinge?

⁹ Satana kalamikijile Yombi ngwenyi, kakuwayila Yehova ha mukunda wa yuma yize amuhele. Satana yamba nawa ngwenyi, Yombi mahasa kwehuka Yehova nyi mamweseka. Yehova kakatayijile nyonga lia Satana, kashika echele Satana hanga eseke Yombi nikutala nyi kapwile lume sepa lia Yehova mumu ha zango lize te akwete hali Iye, nyi ka.

10. Kuchi Satana esekele Yombi, mba yika Yombi alingile?

¹⁰ Chitangu, Satana yeyisa hanji kushihisa yimuna yeswe ya Yombi. Satana yashiha nawa tuvumbi anji a Yombi. Yombi yatokesa yuma yeswe. Ha cheseko chakasula, Satana yashiha ana ja Yombi kumi ni kakundukundu. Alioze Yombi yanunga ni kushishika kuli Yehova. “Mu yuma yino yeswe, Yombi kavulumwine, chipwe kusuma Zambi mulonga wa chize kuchalitele.”—Yombi 1:12-19, 22.

11. (a) Yika nawa Satana alingile hali Yombi? (b) Yika Yombi alingile?

¹¹ Satana kakahongele. Iye yambila Zambi ngwenyi: “Uchisunge ku chifwaha chenyi ni musunya wenyi mba makutuka, kwe kumeso je.” Satana yasa Yombi ni yikola yipi. Chipwe chocho, Yombi yashishika kuli Yehova.  (Yombi 2:5, 7) Yombi yamba ngwenyi: “Ndo kufwa chami chichi kwecha ungunu wami!”—Yombi 27:5.

12. Kuchi Yombi asolwele ngwenyi Satana kali mukwa-mahuza?

¹² Yombi kakanyingikine ngwenyi Satana mwe te unamumwesa lamba. Iye kanyongene ngwe Yehova mwe te unamunehena lamba liacho. (Yombi 6:4; 16:11-14) Chipwe chocho, Yombi yanunga ni kushishika kuli Yehova. Kushishika chenyi chasolwele ngwo iye te kakuwayila Yehova ni mbunge yeswe. Yombi kakapwile mukwa-kuzo. Iye kapwile sepa lia Zambi mumu te kakumuzanga chinji. Yuma yeswe yize Satana ambile yapwile ya mahuza!

13. Yika Yombi atambwile ha mukunda wa ushishiko wenyi?

¹³ Chipwe ngwe Yombi kakanyingikine yuma yize te yinalingiwa mu malilu, nihindu kashishikile kuli Zambi ni kusolola ngwenyi Satana kali mukwa-mahuza. Yehova, yawahisa Yombi ha mukunda wa ushishiko wenyi.—Yombi 42:12-17.

14, 15. Ha yika Satana akulamikiza malunga ni mapwo eswe?

¹⁴ Muhasa kuwana malongeso apema ha yize yalingiwile kuli Yombi. Musono, Satana kakutuliongela ngwo twakuwayila Yehova ha mukunda wa yize mutuhasa kutambula kuli Iye. Mukanda wa Yombi 2:4, Satana yamba ngwenyi: “Mutu mecha yeswe ali nayo ha kulamwina mwono wenyi.” Ha chino, Satana kakalamikijile wika Yombi, alioze kambile ngwenyi atu eswe, malunga ni mapwo kali akwa-kuzo. Kukatuka haze Yombi afwile hikwapalika tununu a miaka, nihindu Satana kananungu ni kuchoka Yehova ni kulamikiza tuvumbi twenyi. Chakutalilaho, twakutanga mu mukanda wa Yishima 27:11, ngwo: “Mwanami pwako ni mana ukawahise mbunge yami, ngukahase kukumbulula yoze manguchoka.”

 ¹⁵ Muhasa kusakula kwononokena Yehova ni kupwa sepa lienyi washishika, ni kusolola ngwe Satana kali mukwa-mahuza. Mba upwe sepa lia Zambi, muchifupiwa kwalumuna yimwe yitanga ku mwono we, nyi mulinga chocho ena wakwata chiyulo chipema! Chiyulo chacho chili chilemu chinji. Satana kakuhamika ngwenyi, nyi mumona lamba yena kuchi kuhasa kushishika kuli Zambi. Iye kakutweseka hanga twehuke kushishika kuli Zambi. Kuchi akuchilinga?

16. (a) Miheto yika Satana akuzachisa hanga atukwike kuwayila Yehova? (b) Kuchi Ndiapu mahasa kukukwika kuwayila Yehova?

¹⁶ Satana kakuzachisa yuma yinji hanga atukwike kupwa masepa ja Zambi. Aye kapwa “ngwe ndumba wa kuhanjika ni lundunjila nikufupa yoze mahasa kuumbula.” (1 Petulu 5:8) Kuwatambile kukomoka muze masepa, asoko, ni atu akwo mafupa kukukwika hanga weche kulilongesa Mbimbiliya ni kulinga yuma yize yalita. Muhasa kwivwa ngwe kanakweseka. * (Yoano 15:19, 20) Satana nawa kakulisolola mwene “ngwe mungelo wa pangu.” Ha chino, mahasa kutweseka hanga twehuke Yehova. (2 A-Korindu 11:14) Muheto ukwo uze Satana akuzachisa hanga atukwike kuwayila Yehova uli kutulingisa hanga tunyonge ngwetu kutuchi kuhasa kuwayila Zambi ni mbunge yeswe.—Yishima 24:10.

17. Mumu liaka twakwononokena Yehova?

¹⁷ Muze twakwononokena Yehova, twakusolola ngwetu,  Satana kali mukwa-mahuza. Yika mba muyitukwasa hanga twononokene Zambi? Mbimbiliya yinambe ngwo: “Nuzange Yehova Zambi yenu ni mbunge jenu jeswe ni alma jenu jeswe, ni ndundo jenu jeswe.” (Shimbi Yamuchiali 6:5) Twakwononokena Yehova mumu twakumuzanga. Muze zango lietu muli Yehova mulikola, mutuzanga kulinga yuma yeswe yize anazange. Postolo Yoano yasoneka ngwenyi: “Lino lie zango lia Zambi ngwo, tukafunge shimbi jenyi, shimbi jenyi hi jikalu ko.”—1 Yoano 5:3.

18, 19. (a) Yuma yika yize Yehova anambe ngwo yili yipi? (b) Kuchi tunanyingika ngwetu, Yehova keshi kutwita yuma yize kutuchi kuhasa kulinga?

¹⁸ Yuma yika yize Yehova akutulweza ngwo yili yipi? Yimwe yili ha kasha “ Kanda Ulinga Yuma Yize Yehova Akwivwila Lwaji.” Chitangu, hanji muhasa kunyonga ngwe yuma yacho hi yipi ko. Alioze muze muputuka kutanga versu ja Mbimbiliya ni kunyonga kanawa ha versu jacho, mumona ulemu wa kwononokena shimbi ja Yehova. Hanji munyonga ngwe watamba kwalumuna yimwe yitanga ku mwono we. Chipwe ngwe ha mashimbu amwe muchikaliwa, alioze, nyi mwalumuna yitanga ye, mupwa ni sambukila ni chiseke ha kupwa sepa mupema wa Zambi. (Izaia 48:17, 18) Kuchi tunanyingika ngwetu chili chashi kwalumuna yimwe yitanga ku mwono wetu?

¹⁹ Yehova keshi keza katwita hanga tulinge yuma yize kutuchi kuhasa kulinga. (Shimbi Yamuchiali 30:11-14) Ngwe chize apwa Sepa wamwenemwene, aye kananyingika yuma yipema hali yetu kuhiana yetwene. Kananyingika kanawa tachi jetu ni ulelu wetu. (Samu 103:14) Nawa, Yehova mahasa kutwaha tachi hanga tumwononokene. (Samu 103:14) Postolo Paulu kanatukolweza ngwenyi: “Zambi iye wamwenemwene, mba kechi katayiza akanweseke kuhiana chize munuhasa; alioze hamwe ni cheseko makanumwesa jila ya kutuhukamo hanga nukahase kunyongonona.” (1 A-Korindu 10:13) Muze Paulu hamona ukwaso wa Yehova ha mashimbu jacho yamba ngwenyi:  Kunakulinga “yuma yeswe muli yoze wakunguhashisa.”—A-Fwilipu 4:13.

20. Yitanga yika watamba kwimbulula, nawa mumu liaka?

²⁰ Nyi tunazange kupwa masepa ja Yehova, twatamba kwehuka kulinga yuma yize iye keshi kuzanga. (A-Roma 12:9) Masepa ja Zambi katamba nawa kuzanga yuma yize iye akuzanga. Ayo kanaasolola mu Samu 15:1-5. (Tanga.) Masepa ja Yehova kakwimbulula yitanga yenyi ni kusolola “zango, ni uwahililo, ni sambukila, ni kulihumikiza, ni utu, ni upeme, ni kushishika, ni kushimbika, ni kusuula.”—A-Ngalashia 5:22, 23.

21. Kuchi muhasa kulilongesa kusolola yitanga yize Zambi akuzanga?

²¹ Kuchi muhasa kulilongesa kusolola yitanga yino yipema? Watamba kunyingika yuma yize Yehova akuzanga ha kutanga ni kulilongesa Mbimbiliya matangwa eswe. (Izaia 30:20, 21) Nyi mulinga chino, zango lie kuli Yehova mulikola, amu zango lie kuli iye mulikola, ena muzanga kumwononokena.

22. Yika mukatambula nyi ononokena Yehova?

²² Kwalumuna yitanga ku mwono we, mutuhasa kuchitesa ngwe kuzula mazalo akulu ni kuzala aha. Mbimbiliya yinambe ngwo, watamba kuzula “mutu mukulu” ni “kuzala mutu mwaha.” (A-Kolosu 3:9, 10) Chipwe ngwe chino hi chashi ko, alioze muze mutwalumuna yitanga yetu hanga twononokene Yehova, iye kanatulakenya “kwononona chinene.” (Samu 19:11) Chochone, sakula kwononokena Yehova ni kusolola ngwe, Satana kali mukwa-mahuza. Wayila Yehova, hi wika ko ha mukunda wa yiwape ya kulutwe lia matangwa, alioze ha zango lize ukwete hali iye. Nyi mulinga chocho, mupwa sepa wamwenemwene wa Zambi!