1. Iya watwehele mwono?

YEHOVA “iye Zambi ya mwono.” (Jeremia 10:10) Kali Sakatanga wetu, iye mwe watwehele mwono. Mbimbiliya yinambe ngwo: “Yenu nwatangile yuma yeswe, ni mumu ha upale wenu yapwile, yatangiwile.” (Usolwelo 4:11) Chochene, Yehova kazangile hanga tupwe ni mwono. Mwono uli chawana chinene cha kuli Zambi.—Tanga Samu 36:9.

2. Yika mutulinga mba tutwame kanawa ku mwono?

² Yehova kakutwaha yuma yize tunafupu hanga tununge ni mwono, ngwe kulia ni meya. (Yilinga 17:28) Alioze kuhiana yino yeswe, aye kanazange hanga tuwahilile ku mwono. (Yilinga 14:15-17) Mba tutwame kanawa ku mwono wetu, twatamba kwononokena shimbi ja Zambi.—Izaia 48:17, 18.

3. Yika Yehova alingile muze Kene ashihile Abele?

³ Mbimbiliya yinatulongesa ngwo mwono wetu ni mwono wa atu akwo uli ni ulemu unji kumeso ja Yehova. Chakutalilaho, muze Kene—mwana wa Alama ni Eva, apwile ni kwivwila mwanakwo Abele uli, Yehova yatoweza Kene ngwenyi, katamba kwehuka uli wenyi. Alioze, Kene yalengulula utowezo wacho, yanunga ni kwivwa uli, chocho “yakatukila mwanakwo Abele, yamushiha.” (Uputukilo 4:3-8) Yehova yashinga Kene ha mukunda wa kushiha Abele. (Uputukilo 4:9-11) Kashika uli ni kole yili yuma yipi chinji mumu muyihasa kutupwisa yingulungulu hanji yilianyi. Mutu yoze ukwete yitanga yamutapu au, kechi kahinga  mwono wa mutolo. (Tanga 1 Yoano 3:15.) Twatamba kusolola zango kuli atu eswe mba tuvwise Yehova kuwaha.—1 Yoano 3:11, 12.

4. Yika shimbi yize Zambi ahanyine kuli A-Izalele yinatulongesa hakutwala ku chawana cha mwono?

⁴ Hakupalika cha tununu twa miaka, Yehova yasolola ngwenyi mwono uli ni ulemu unji, muze ahanyine Kumi lia Shimbi kuli Mose. Yimwe yinambe ngwo: “Kanda ukashiha mutu.” (Shimbi Yamuchiali 5:17) Nyi mutu te mashiha mukwo kutachi, neye te mamushiha.

5. Kuchi Zambi akwivwa hakutwala ku kuchiza ufumba?

⁵ Kuchi Zambi akwivwa hakutwala ku kuchiza ufumba? Chipwe mwono wa mwana yoze uchili mu jimo neye kali ni ulemu unji kumeso ja Yehova. Ha Shimbi yize Yehova ahanyine kuli A-Izalele, kambile ngwenyi, nyi mutu malemeka kafumbakaji hi mwana yoze uli mujimo mafwa, mutu wacho neye te mamushiha. (Tanga Kutuhuka 21:22, 23; Samu 127:3.) Shimbi yino yinatulongesa ngwo kuchiza ufumba chili chipi.—Tala Maliji Akusongo 28.

6, 7. Kuchi mutusolola kuli Yehova ngwetu twakulemesa mwono?

⁶ Kuchi mutuhasa kusolola kuli Yehova ngwetu twakulemesa mwono wetu ni mwono wa akwetu? Ha kwehuka kulinga chuma cheswacho muchisa mwono wetu hanji wa akwetu mu ponde. Kashika kutwatambile kunwa makanya hanji droga ni yuma yikwo yipi, mumu muyitukisa hanji kutushiha.

⁷ Zambi hanatwehe mwono ni mujimba, kashika twatamba kuyizachisa kulita ni chize iye anazange. Twatamba kufunga kanawa mujimba wetu. Nyi kutwaufungile kanawa, mutuhasa kupwa atu waze alikisa kumeso ja Zambi. (A-Roma 6:19; 12:1; 2 A-Korindu 7:1) Nyi twalemesene mwono, kutuchi kuhasa kuwayila kanawa Yehova, yoze watwehelewo. Chipwe ngwe muchihasa kupwa  chikalu kwecha ndako jipi, nihindu Yehova matukwasa ha tachi jize twakusa hanga tulemese mwono.

8. Yika mutulinga hanga tusolole ngwetu kutushi kusa mwono wetu ni wa akwetu mu ponde?

⁸ Twalilongesa ngwetu, mwono uli chawana chilemu. Yehova kanatujikijila ngwenyi, mutulemesa mwono wetu hanji wa akwetu, muze mutwehuka kuusa mu ponde. Twakuchilinga muze mutwendesa kanawa mashinyi, moto hanji chikungo cheswacho. Twakwehuka ponde hanji yiheho ya utoji. (Samu 11:5) Mutulemesa nawa mwono ha kutunga kanawa zuwo lietu. Yehova kalwezele A-Izalele ngwo: “Ha kutunga mazuwo aha, munutunga yisakala ha fulumba jenu, kuchina mununeha mulonga wa manyinga ha mazuwo jenu ha kuholokaho mutu.”—Shimbi Yamuchiali 22:8.

9. Kuchi twatamba kufunga tushitu?

⁹ Chize twakufunga tushitu ni necho chikwete ulemu unji kumeso ja Yehova. Iye kakutwecha hanga tushihe tushitu hanga tulie ni kulinga mazalo hanji atulifunge ku upi. (Uputukilo 3:21; 9:3; Kutuhuka 21:28) Alioze, kanda tupwa ni uswi hali tushitu hanji kwaashiha chamushihila.—Yishima 12:10.

10. Kuchi Tunanyingika ngwetu manyinga kanalumbunuka mwono?

¹⁰ Manyinga kali asandu kumeso ja Yehova mumu kanalumbunuka mwono. Muze Kene ashihile Abele, Yehova yamba kuli Kene ngwenyi: “Liji lia manyinga a mwanakwenu linatete hashi kuli yami.” (Uputukilo 4:10) Manyinga ja Abele, kalumbunukine mwono wenyi, kashika Yehova ashingile Kene ha yize alingile. Hakuhwa cha Sanga lia Meya ha matangwa ja Noa, Yehova kasolwele nawa ngwenyi, manyinga kanalumbunuka mwono. Yehova yambila  Noa ni asoko jenyi hanga aputuke kulia yifwo ya tushitu. Ha kwamba ngwenyi: “Tushitu eswe akwenda ni mwono kumapwa kulia che. Ngwe nakuhele mafwo a wisu chocho ngunakwehe yeswe.” Alioze Yehova yakanjisa chimwe chuma, ngwenyi: “Kunuchi kulia yifwo ni manyinga jayo, chinalumbunuka mwono wayo.”—Uputukilo 1:29; 9:3, 4.

11. Ukanjiso uka wa manyinga uze Zambi ahanyine kuli vungu lia Izalele?

¹¹ Muze te hikwapalika miaka 800 chize haze Yehova alwezele Noa ngwenyi kanda alia manyinga, iye kakanjishile nawa atu jenyi ngwenyi: “Mutu mweswawo hakachi ka A-Izalele, hanji njize yoze watwama hakachi ko, nyi mu yambu mashiha kashitu, hanji kajila yoze walita ni kulia, chamutamba kuhichika manyinga jenyi nikuashikila ni mavu.” Iye yamba nawa ngwenyi: “Kanda nulia manyinga a mukwa mwono niumwe.” (Ulevi 17:13, 14) Yehova nihindu te kakuzanga hanga atu jenyi alemese manyinga ngwo kali asandu. Ayo te mahasa kulia wika yifwo, alioze manyinga, ka. Muze ayo te akushiha umwe kashitu hanga alie, ayo te kakumwanga manyinga mu mavu.

12. Yika akwa-Kristu akunyonga hakutwala ku manyinga?

¹² Hakupalika cha miaka muze Yesu te hafwa, apostolo ni makulwana mu chikungulwila cha akwa-Kristu mu Yerusaleme, yalikunga hanga akwate chiyulo ha Shimbi jize ahanyine kuli A-Izalele ni kutala jize akwa-Kristu te atamba makaula. (Tanga Yilinga 15:28, 29; 21:25.) Yehova yaakwasa hanga anyingike ngwo manyinga nihindu te achili ni ulemu kuli iye nawa te katamba kwaamona ngwo kali asandu. Kuuputukilo wa chikungulwila cha akwa-Kristu ayo te keshi kulia hanji kunwa manyinga hanji kulia yifwo ya kashitu yoze katetele muliwu. Nyi te malia manyinga,mujipwa ngwe akwa-kukombelela mahamba hanji akwa-utanji. Kukatuka ha shimbu liacho, akwa-Kristu amwenemwene kakulituna kulia hanji kunwa manyinga.  Yika mba mutwamba musono? Yehova nihindu kanazange hanga yetu tulemese manyinga ngwo kali asandu.

13. Mumu liaka akwa-Kristu keshi kutayiza kutambula manyinga?

¹³ Shina chino chinalumbunuka ngwo akwa-Kristu katamba nawa kulituna kutambula manyinga nyi? Ewa, katamba kulitunawo. Yehova katukanjishile hanga twehuke kulia hanji kunwa manyinga. Nyi ndotolo makulweza ngwo kanda unwa walwa, shina ena mulinjisawo mu mijipa nyi? Ka! Chizechene nawa, ukanjiso wa kulia hanji kunwa manyinga unalumbunuka nawa ngwo, kutwatambile kutambula manyinga.—Tala Maliji Akusongo 29.

14, 15. Mumu liaka chili chilemu akwa-Kristu kulemesa mwono ni kwononokena Yehova?

¹⁴ Yika mba mutwamba nyi ndotolo matulweza ngwo mutufwa nyi twatambwile manyinga? Mutu ni mutu katamba kukwata chiyulo mwene nyi mwononokena shimbi ya Zambi hakutwala ku manyinga. Akwa-Kristu kakulemesa chawana cha Zambi cha mwono, nawa twakufupa mutapu ukwo wa uukiso hanga tutwame ni mwono; alioze tushi kutayiza kutambula manyinga.

¹⁵ Twakusa tachi hanga tutwame kawape ku mwono, alioze amu mwono uli ni ulemu unji kumeso ja Zambi, kashika kutushi kutambula manyinga. Chili ni ulemu kwononokena Yehova kuhiana kulamwina mwono wetu ha kwehuka shimbi yenyi. Yesu ngwenyi: “Mweswawo mazanga kulamwina mwono wenyi kumakautokesa, alioze mweswawo matokesa mwono wenyi mumu hali yami, kumakauwana.” (Mateu 16:25) Twakuzanga kwononokena Yehova mumu twakumuzanga. Iye kananyingika yize yili yipema hali yetu kashika twakusolola ngwetu mwono uli usandu kumeso ja Yehova.—A-Hepreu 11:6.

16. Mumu liaka tuvumbi twa Zambi akumwononokena?

¹⁶ Tuvumbi twa Zambi ashishika, kakukaula shimbi ya  manyinga. Keshi kulia hanji kunwa manyinga, chipwe kwaatambula ha mukunda wa uukiso. * Alioze, mba alamwine mwono wo, o kakutayiza uukiso uze kuushi kumbata manyinga. Ayo kali ni ushindakenyo ngwo Sakatanga wa mwono ni manyinga kananyingika yize yili yipema hali ayo. Shina unatayiza ngwe Yehova kananyingika yuma yize yili yipema hali yena?

17. Jila yika yize Yehova atayijile A-Izalele hanga aza chishilemo manyinga?

¹⁷ Shimbi yize Zambi ahanyine kuli Mose, Yehova kalwezele A-Izalele ngwenyi: ‘Mwono wa musunya watwama mu manyinga, mba hinaahana hanga nwazujile ha chilumbilo ha kuchiza milonga ya atu. Mumu manyinga we mwono kakuchiza milonga.’ (Ulevi 17:11) Muze A-Izalele te akuvulumuna, ayo te kakwita ukonekeno kuli Yehova hakuhana chitapo cha kashitu ni kwita kuli sasendote hanga azujile amwe manyinga ha chilumbilo cha mu Tembele. Yino ye jila yize Yehova atayijile hanga A-Izalele azachishilemo manyinga.

18. Yika chitapo cha Yesu chapwisa chashi kuli yetu?

¹⁸ Muze Yesu ejile hano hashi, aye yasalakanyisa shimbi ya kuhana yitapo ya tushitu, hakuhana mwono hanji manyinga jenyi ha ukonekeno wa shili yetu. (Mateu 20:28; A-Hepreu 10:1) Mwono wa Yesu wapwile ni ulemu unji kashika Yehova amuhindwishile ni kuya mu malilu, ha chino Yehova yahana atu eswe uhashi wa kutwama ni mwono wa miaka yeswe.—Yoano 3:16; A-Hepreu 9:11, 12; 1 Petulu 1:18, 19.

19. Yika twatamba kulinga mba ‘tusambe ku manyinga ja atu eswe’?

 ¹⁹ Twakusakwilila chinji kuli Yehova ha mukunda wa chawana chenyi chipema cha mwono! Nawa tunazange kulweza atu ngwo nyi mafuliela muli Yesu, o mahasa kupwa ni mwono wa miaka yeswe. Twakuzanga atu, nawa mutuhasa kulinga chuma cheswe chize mutuhasa hanga twaalongese chize matwama ku mwono. (Ezekiele 3:17-21) Chizechene ngwe Postolo Paulu, ni yetu mutuhasa kwamba ngwetu: “Ngunasambe ku manyinga ja atu eswe. Mumu chalitwaminyine kwambujola kuli yenu mana eswe a Zambi.” (Yilinga 20:26, 27) Chochene, mutusolola ngwetu, twakulemesa mwono ni manyinga muze mutulweza akwetu hakutwala kuli Yehova ni chize iye akulemesa mwono.