1, 2. (a) Ku nyonga lie, yika yakupwisa chawana chilemu? (b) Mumu liaka ukuule uli chawana chinene cha Zambi?

CHAWANA chika chilemu chize hiunatambula kama? Chawana kuchatambile kupwa cha ndando yinji mba chipwe chilemu. Chawana cheswe nyi muchikunehena uwahililo ni yize unafupu ku mwono, wakuwahilila nacho.

² Ha yawana yeswe yize Zambi akutwaha, kuli chawana chimuwika chize twakufupa chinji kuhiana yikwo. Chili chawana chinene cha Zambi chize ahanyine kuli atu. Mu kapitulu yono, mutulilongesa chize Yehova atumine Mwanenyi, Yesu Kristu, hanga tuhase kupwa ni mwono wa mutolo. (Tanga Mateu 20:28.) Ha kutuma Yesu hano hashi ngwe ukuule, Yehova yasolola ngwenyi, kakutuzanga chinji.

3. Mumu liaka atu akufwa?

³ Ukuule uli jila yize Yehova akupulwila nawo atu ku shili ni kufwa. (A-Efwesu 1:7) Twatamba kunyingika yize yalingiwile ha tununu a miaka kunyima mu munda wa Endene, mba tunyingike mumu liaka te twakufupa ukuule. Yisemi jetu atangu, Alama ni Eva kavulumwine. Ha mukunda wa shili, o yafwa. Yetu twakufwa mumu twahingile shili ya Alama ni Eva.—Tala Maliji Akusongo 9.

4. Alama te iya, nawa yika amuhele?

 ⁴ Muze Yehova atangile mutu mutangu, Alama, yamwaha chimwe chuma chilemu chinji. Yehova kahanyine kuli Alama mwono ungunu. Alama kapwile ni mujimba ni manyonga angunu. Iye te kechi kuyiza, chipwe kushinakajiwa hanji kufwa. Yehova mwe tato ya Alama, mumu mwe wamutangile. (Luka 3:38) Yehova te kakuhanjieka nenyi mashimbu eswe. Zambi kalumbunwine kanawa kuli Alama yize te atamba kulinga ni kumwaha mulimo upema.—Uputukilo 1:28-30; 2:16, 17.

5. Yika chinalumbunuka muze Mbimbiliya yakwamba ngwo Alama kamutangile “mu chano cha Zambi”?

⁵ Alama kamutangile “mu chano cha Zambi.” (Uputukilo 1:27) Yehova katangile Alama ni yitanga yize Iye akwete, ngwe, zango, mana, ululi, ni tachi. Yahana nawa kuli Alama nyonga lia kusakula chipi ni chipema. Alama kakapwile ngwe mashinyi. Alioze, kapwile ni uhashi wakusakula yize malinga. Nyi Alama kasakwile kwononokena Zambi, kachi katwamine miaka yeswe mu Paraisu.

6. Yika Alama atokesele muze ehukile kuli Zambi? Kuchi yino yakwata hali yetu?

⁶ Muze Alama ehukile Zambi hohene yatambula upatwilo wa kufwa, kashika yatokesa yuma yilemu chinji ku mwono wenyi. Yatokesa usepa wenyi ni Yehova, mwono wenyi ungunu, ni chihela chenyi chipema mu Paraisu. (Uputukilo 3:17-19) Kashika, Alama ni Eva kakapwile nawa ni kutalatala cha mwono wa mutolo, mumu kasakwile kwehuka Zambi. Ha mukunda wa yize Alama alingile “shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe hanavulumuna.” (A-Roma 5:12) Muze Alama avulumwine, ‘yalilanjisa’ mwene, hohene ni etu yitupwa  ndungo a shili ni kufwa. (A-Roma 7:14) Shina etu tuli ni chimwe kutalatala nyi? Mba, kutuli nacho.

7, 8. Ukuule yika?

⁷ Ukuule yika? Ukuule unalumbunuka yuma yaali. Chitangu, uli ndando yize akufweta hanga atusule hanji atambwise nacho chimwe chuma. Chamuchiali, uli ndando yize akufweta ha chimwe chuma hanji ha umwe mulonga.

⁸ Kukushi mutu niumwe yoze te mahasa kufweta mulonga unene uze Alama anehene muze avulumwine ni kutunehena kufwa. Alioze Yehova hanatwehe utuswilo wa shili ni kufwa. Mutulilongesa yize ukuule wakulinga ni chize mutuhasa kuyuka ha mukunda wa ukuule.

9. Kuchi ukuule te atamba kuufweta?

⁹ Niumwe wa kuli yetu te mahasa kufweta ukuule ha mwono ungunu uze Alama atokesele wakuhi. Mumu liaka? Mumu yetweswe tuli yihenge. (Samu 49:7, 8) Ukuule uze wafupiwile te wa mutu mukwo mungunu ngwe Alama. Kashika auvuluka ngwo “ndando ya ukuule.” (1 Timoteu 2:6) Ukuule watambile kupwa ni ulemu wa mwono uzewene Alama atokesele.

10. Kuchi Yehova ahanyine ukuule?

¹⁰ Kuchi Yehova ahanyine ukuule? Yehova katumine Mwanenyi hano hashi. Mwana wacho Yesu, mwe chitangiwa chitangu. (1 Yoano 4:9, 10) Yesu katayijile ni zango lieswe kuhichika Tato ni chihela chenyi mu malilu. (A-Fwilipu 2:7) Yehova katumine Yesu hano hashi ni kusemuka ngwe mutu mungunu, yoze keshi shili.—Luka 1:35.

11. Kuchi mutu umuwika te mahasa kupwa ukuule hali atu eswe?

¹¹ Alama, lunga mutangu, katokesele mwono ungunu  wa atu eswe muze avulumwine kuli Yehova. Shina kwapwile mutu mukwo yoze te mahasa kupulwila ana eswe ja Alama ku kufwa nyi? Mba kapwileko. (Tanga A-Roma 5:19.) Yesu, yoze kakalingile shili, kahanyine mwono wenyi ungunu ngwe ukuule. (1 A-Korindu 15:45) Mwono wenyi ungunu te mahasa kuuzachisa hanga apulwile nacho ana eswe ja Alama ku kufwa.—1 A-Korindu 15:21, 22.

12. Mumu liaka Yesu amwene lamba lipwahaha?

¹² Mbimbiliya yakusolola chize Yesu amwene lamba muze te kanda achifwa. Yamulamba shikote, yamuhata ha mutondo, ni kufwa chipi. (Yoano 19:1, 16-18, 30) Mumu liaka Yesu amwene lamba lipwahaha? Mumu Satana kambile ngwenyi, niumwe mutu te mahasa kushishika kuli Zambi ha mashimbu a yeseko wakuhi. Yesu kasolwele ngwenyi, mutu mungunu mahasa kushishika kuli Zambi chipwe ngwe mamona lamba linji. Ha chino, Yehova kanakawahilila chinji ni Yesu!—Yishima 27:11; tala Maliji Akusongo 15.

13. Kuchi ukuule aufwetele?

¹³ Kuchi ukuule aufwetele? Yesu kahanyine ulemu wa mwono wenyi kuli Tato. Ha mwaka 33, ha tangwa 14 lia kakweji wa A-Yunda, Nisane, Yehova kechele Yesu hanga amushihe kuli akwa-kole jenyi. (A-Hepreu 10:10) Muze amushihile, hakupalika cha matangwa atatu Yehova yahindwisa Yesu, hi ni mujimba wa musunya ko, alioze ni mujimba wa spiritu. Hi kulutwe, muze Yesu afunyine kuli Tato mu malilu, iye yasolola ulemu wa mwono wenyi ungunu kuli Yehova ngwe ukuule. (A-Hepreu 9:24) Kashika tuli ni uhashi wakututusula ku shili ni kufwa, mumu ukuule hanaufweta kulu.—Tanga A-Roma 3:23, 24.

14, 15. Yika twatamba kulinga mba Yehova atukonekene shili yetu?

¹⁴ Etu hitunayuku kulu ku chawana chinene cha Zambi. Tutalenu chize tunayuku haliapwila ni chize mutukayuka kulutwe lia matangwa.

¹⁵ Ukonekeno wa shili yetu. Chili chikalu chinji kulinga yuma yize yalita mashimbu eswe. Tulieswe twakuvulumuna, nawa ha mashimbu akwo twakuhanjika ni kulinga yuma yize kuyalitele. (A-Kolosu 1:13, 14) Kuchi mba mahasa kutukonekena? Twatamba kwivwa yinyengo ha yuma yipi yize twakulinga ni kulikehesa hanga twite ukonekeno kuli Yehova. Nyi twalinga chocho, mutuhasa kufuliela ni mbunge eswe ngwetu, Yehova matukonekena shili yetu.—1 Yoano 1:8, 9.

16. Yika twatamba kulinga mba tupwe ni mbunge yitoma?

¹⁶ Mutuhasa kupwa ni mbunge yitoma. Nyi mbunge yetu muyitulweza ngwo twalinga chimwe chuma chipi, chino chakuneha yinyengo, ni kwivwa ngwe tuli amokomoko. Alioze chino kuchatambile kutuhongesa ku mbunge. Nyi mutwita ukonekeno kuli Yehova, mutuhasa kupwa ni shindakenyo ngwetu, matwivwa ni kutukonekena. (A-Hepreu 9:13, 14) Yehova, kanazange hanga tumulweze yipikalo ni ulelu wetu. (A-Hepreu 4:14-16) Nyi twalinga chocho, mutuhasa kupwa ni sambukila ya Zambi.

17. Yiwape yika tulinayo ha mukunda wa kufwa cha Yesu?

¹⁷ Tuli ni kutalatala cha mwono wa mutolo. “Fweto ya shili kufwa, alioze chawana cha vumbi lia Zambi, mwono wa mutolo muli Kristu Yesu Mwene wetu.” (A-Roma 6:23) Mutuhasa kupwa ni kutalatala cha mwono wa mutolo ni kuwahilila ni mijimba yingunu, mumu Yesu hanafu ha mukunda wa yetu. (Usolwelo 21:3, 4)  Alioze yika twatamba kulinga mba tuzuke yiwape yacho?

18. Kuchi tunanyingika ngwetu Yehova kakutuzanga?

¹⁸ Achinyonga chize wakwivwa mu mbunge nyi umwe mutu makwaha chimwe chawana chipema. Ukuule uli chawana chilemu hali eswe, nawa twatamba kusakwilila Yehova ha mukunda wa ukuule. Yoano 3:16 unambe ngwo: “Zambi wazangile akwa hashi, wechele Mwanenyi wa wika.” Chochene, Yehova kakutuzanga chinji kashika atuhele Mwanenyi, Yesu. Tunanyingika nawa ngwetu Yesu kakutuzanga, mumu ni zango lieswe kahanyine mwono wenyi hali yetu. (Yoano 15:13) Kashika, chawana cha ukuule chatamba kukwaha shindakenyo ngwe Yehova ni Yesu kakukuzanga chinji.—A-Ngalashia 2:20.

19, 20. (a) Kuchi muhasa kupwa sepa lia Yehova? (b) Kuchi muhasa kusolola ngwe wakutayiza chitapo cha ukuule wa Yesu?

¹⁹ Kuchi muhasa kupwa sepa lia Zambi muze hi walilongesa hakutwala ku zango lienyi linene? Hi chashi ko kuzanga mutu yoze kuwanyingikine. Yoano 17:3 unambe ngwo, mutuhasa kunyingika Yehova. Nyi mulinga chocho, zango lie kuli iye mulikola chinji, muzanga kumuvwisa kuwaha, ni kupwa sepa lienyi. Kashika, nunga ni kulilongesa hakutwala kuli Yehova ha kulilongesa Mbimbiliya.—1 Yoano 5:3.

²⁰ Tayiza chitapo cha ukuule wa Yesu. Mbimbiliya yinambe ngwo: “Yoze mafuliela mwe Mwana, mwono wa mutolo ali nawo.” (Yoano 3:36) Kufuliela yika chinalumbunuka? Chinalumbunuka kulinga yuma yize Yesu akutulongesa. (Yoano 13:15) Kutwatambile kwamba wika ngwetu twafuliela muli Yesu. Twatamba kulinga chimwe chuma hakutwala ku ufulielo wetu, mba tusolole  ngwetu twakutayiza ukuule. Tiangu 2:26 unambe ngwo: “Ufulielo kuushi yitanga kuunafu.”

21, 22. (a) Mumu liaka twatamba kukunguluka miaka yeswe ha Chiwanyino cha Kwiwuluka Kufwa cha Kristu? (b) Yika mutukalilongesa mu Tupitulu 6 ni 7?

²¹ Kunguluka ha Chiwanyino cha Kwiwuluka Kufwa cha Kristu. Ha ufuku, muze Yesu te kanda achifwa, katulongesele ngwenyi twatamba kwiwuluka kufwa chenyi. Twakuchilinga ha miaka yeswe, nawa kakuchivuluka ngwo “Seya ya Mwene.” (1 A-Korindu 11:20; Mateu 26:26-28) Yesu kanazange hanga twiwuluke ngwetu iye kahanyine mwono wenyi ungunu ngwe ukuule hali yetu. Aye ngwenyi: “Chino chilingenu nukangwiwuluke.” (Tanga Luka 22:19.) Nyi mukunguluka ha Chiwanyino cha Kwiwuluka Kufwa cha Yesu, musolola ngwe unewuluka ukuule ni zango linene lize Yehova ni Yesu alinalio hali yetu.—Tala Maliji Akusongo 16.

²² Ukuule uli chawana chinene chize mutuhasa kutambula. (2 A-Korindu 9:14, 15) Chawana chino chilemu muchihasa kuyukisa nawa atu anji waze hanafu. Mu Tupitulu 6 ni 7 mutulilongesa chize chino muchikalingiwa.