1. Yika muhasa kunyonga muze hiwalilongesa mukanda uno?

HIWALILONGESA umwenemwene unji wa mu Mbimbiliya kupalikila mu mukanda uno, ngwe chilakenyo cha Zambi cha mwono wa mutulo, umwenemwene hali afu, ni kutalatala cha uhindukilo. (Chilumbununyi 9:5; Luka 23:43; Yoano 5:28, 29; Usolwelo 21:3, 4) Kota hiwaputuka kukunguluka ni Yela ja Yehova, ni kufuliela ngwe ayo kali mu uwayilo wamwenemwene. (Yoano 13:35) Kota hiwapwa ni usepa upema ni Yehova, nawa kota hiwakwata chiyulo cha kumuwayila. Kashika muhasa kunyonga ngwe, ‘Yika natamba kulinga hanga ngulingile Zambi?’

2. Mumu liaka Ka-Etiopia azangile kumupapachisa?

 ² Nyonga lino lie apwile nalio umwe Ka-Etiopia yoze wapwile ha mashimbu ja Yesu. Ha mashimbu amwe, muze Yesu te hamuhindwisa kulu, kambaji kenyi, Fwilipu yambujola sango lipema kuli umwe lunga. Fwilipu yasolola kuli iye ngwenyi, Yesu mwe te Meseya. Ka-Etiopia wacho yevwa kwaha chinji ha yuma yize amulongesele, nikwamba ngwenyi: “Meya wawa; mba chika chinangukwika kutambula upapachiso?”—Yilinga 8:26-36.

3. (a) Yika Yesu ambile kuli tumbaji twenyi hanga alinge? (b) Kuchi mutu atamba kumupapachisa?

³ Mbimbiliya yinalongesa pundu ngwo, nyi unazange kulingila Yehova katamba kukupapachisa. Yesu kambile kuli tumbaji twenyi ngwenyi: “Yeenu nukatayise tumbaji a ku mavungu eswe, nikuapapachisa.” (Mateu 28:19) Yesu kahichikile chilweza hakumupapachisa mwene. Iye kamunjishile mujimba weswe mu meya, kakamuhinjilile meya ha mutwe. (Mateu 3:16) Musono muze mapapachisa umwe mukwa-Kristu, katamba kumunjisa mujimba weswe mu meya.

4. Yika upapachiso we muusolola kuli akwenu?

⁴ Muze mutu akumupapachisa, chino chakusolola kuli akwo ngwo, chamwenemwene iye kanazange kupwa sepa lia Zambi ni kumulingila. (Samu 40:7, 8) Kota muhasa kulihula, ngwe, ‘Yika natamba kulinga hanga angupapachise?’

5. (a) Yika watamba kulinga chitangu mba akupapachise? (b) Mumu liaka kukunguluka cha akwa-Kristu chili ni ulemu?

⁵ Shimbu kanda akupapachisa, yena watamba kunyingika Yehova ni Yesu. Yena hiwaputuka kuchilinga ha kulilongesa Mbimbiliya. (Tanga Yoano 17:3.) Alioze hi yino wika ko. Mbimbiliya yinambe ngwo watamba ‘kuzala  too ni yinyingi’ ya upale wa Yehova. (A-Kolosu 1:9) Kukunguluka ni Yela ja Yehova muchikukwasa chinji kukolesa usepa we ni Yehova. Kashika chili chilemu kuyaya ku kukunguluka chacho mashimbu eswe.—A-Hepreu 10:24, 25.

6. Yuma yingahi watamba kunyingika hakutwala ku Mbimbiliya mba akupapachise?

⁶ Yehova keshi kushimbwila hanga yena unyingike yuma yeswe yize yili mu Mbimbiliya mba akupapachise. Chipwe hakutwala kuli Ka-Etiopia iye kakashimbwile hanga anyingike yuma yeswe mba amupapachise. (Yilinga 8:30, 31) Mumu mutukanunga ni kulilongesa hakutwala kuli Zambi ku miaka ya mutolo. (Chilumbununyi 3:11) Alioze, mba akupapachise, watamba kunyingika ni kutayiza amwe malongeso alemu a mu Mbimbiliya.—A-Hepreu 5:12.

7. Kuchi longeso lie lia Mbimbiliya linakukwase?

⁷ Mbimbiliya yinambe ngwo: ‘Mutu keshi kuhasa kupemena kuli Zambi nyi keshi ni ufulielo.’ (A-Hepreu 11:6) Kashika watamba kupwa ni ufulielo muze kanda achikupapachisa. Mbimbiliya yinatulweze ngwo, atu amwe mu mbonge yikulu ya Korindu kevwile yize tumbaji twa Yesu alongesele, ha chino, o “afulielele, yaapapachisa.” (Yilinga 18:8) Chizechene nawa, longeso lia Mbimbiliya mulikukwasa kufuliela mu yilakenyo ya Zambi ni mu ndundo ja chitapo cha Yesu chize muchihasa kutulamwina ku shili ni kufwa.—Yoshua 23:14; Yilinga 4:12; 2 Timoteu 3:16, 17.

8. Yika muyikukwasa hanga ulweze akwenu yuma yize unalilongesa?

⁸ Nyi walilongesa chinji Mbimbiliya ni kumona chize yinakukwasa ku mwono we, ufulielo we muukola.  Muzanga kulweza akwenu hakutwala ku yuma yize wakulilongesa. (Jeremia 20:9; 2 A-Korindu 4:13) Mba aya watamba kulweza?

9, 10. (a) Kuli aya yena muhasa kuputuka kwambujola yize unalilongesa? (b) Yika watamba kulinga nyi unazange kwambujola hamuwika ni mandumbu a mu chikungulwila?

⁹ Yena kota muzanga kulweza asoko, masepa, enyembo hanji atu waze wakalakala no hakutwala ku yize wakulilongesa. Nyonga liacho lili lipema, alioze muze muchilinga, hanjika mashimbu eswe ni umbovu hamwe ni zango. Kota muzanga kuputuka kwambujola hamwe ni chikungulwila. Nyi wamona ngwe hiwajama kuchilinga, muhasa kulweza Chela cha Yehova yoze wakukulongesa Mbimbiliya ngwo unazange kwambujola hamuwika ni mandumbu a mu chikungulwila. Nyi ndumbu wacho mamona ngwenyi hiwajama nawa ngwenyi unatwame nikulita ni shimbi ja mu Mbimbiliya, enu eswe aali munukaliwana ni makulwana amu chikungulwila.

¹⁰ Yika muyikalingiwa hakuliwana chacho? Makulwana amu chikungulwila, makahanjika ni yena hanga amone nyi unanyingika ni kufuliela malongeso alemu amu Mbimbiliya, nyi unakaula yize Mbimbiliya yakwamba ku mwono we wa tangwa ni tangwa, nawa nyi unazange kupwa chamwenemwene Chela cha Yehova. Iwuluka ngwe makulwana e akufunga mandumbu eswe mu chikungulwila, chipwe ni yena, kashika kanda wivwa woma wa kuhanjika no. (Yilinga 20:28; 1 Petulu 5:2, 3) Muze munuhwisa kulikungulula ni makulwana, ayo makakulweza nyi muhasa kuputuka kwambujola hamwe ni chikungulwila.

11. Mumu liaka chili chilemu kwalumuna yitanga ye mba uputuke kwambujola hamuwika ni mandumbu mu chikungulwila?

¹¹ Makulwana mahasa kukulweza ngwo watamba kwecha  yimwe yitanga ku mwono we, mba uputuke kwambujola hamuwika ni mandumbu mu chikungulwila. Mumu liaka chili chilemu kwalumuna yitanga yacho? Mumu muze mutuhanjika ni akwetu hakutwala kuli Zambi, yetu tunahanjika mu jina lia Yehova, kashika twatamba kupwa ni yitanga yize muyimuhalisa.—1 A-Korindu 6:9, 10; A-Ngalashia 5:19-21.

12. Mumu liaka atu eswe atamba kulikonyeka?

¹² Kuli nawa chuma chikwo chize watamba kulinga shimbu kanda akupapachisa. Postolo Petulu yamba ngwenyi: “Likonyekenu, nwalumuke, milonga yenu yikajimuke.” (Yilinga 3:19) Kulikonyeka yika chinalumbunuka? Chinalumbunuka kwivwa chinyengo ha yuma yipi yize twakulinga. Chakutalilaho, nyi te wakulinga utanji, watamba kulikonyeka. Nawa chipwe ngwe ku mwono we weswe wakusa tachi hanga ulinge yuma yize yalita, nihindu watamba kununga ni kulikonyeka, mumu yetweswe tuli akwa-shili nawa twakwita kuli Zambi hanga atukonekene.—A-Roma 3:23; 5:1.

13. ‘Kwalumuka’ yika chinalumbunuka?

¹³ Shina watamba kwivwa wika chinyengo ha yuma yize wakulinga? Ka. Petulu yamba ngwenyi, yena watamba nawa ‘kwalumuka.’ Chino chinalumbunuka ngwo, watamba kwecha ndako jipi ni kuputuka kulinga yuma yize yalita. Chakutalilaho, achinyonga ngwe unalinga wenyi utangu ku chimwe chihela chize kuwanyingikine. Muze hiwaheta ku chimwe chela, mba hi mumona ngwe kuma unayi ku chihela cheka. Yika watamba kulinga? Kwamba umwenemwene, mufuna hanga uye ku chihela chize te unazange kuya. Chizechene nawa, muze unalilongesa Mbimbiliya, yena kota munyingika yimwe yitanga  hanji yimwe yuma ku mwono we yize watamba kwalumuna. Nyi chenacho lipalumwise hanga ‘walumuke,’ chino chinalumbunuka kwecha yitanga yipi hanga uputuke kulinga yuma yize yalita.

14. Kuchi watamba kulihana kuli Zambi?

¹⁴ Chuma chikwo chilemu chize watamba kulinga mba akupapachise, chili kulihana che kuli Yehova. Muze mulihana kuli Yehova ha kulemba, yena mumulakenya chuma chilemu chinji ku mwono we, kuwayila wika iye ni kulinga upale wenyi.—Shimbi Yamuchiali 6:15.

15, 16. Yika yakukolweza mutu mba alihane mwene kuli Zambi?

¹⁵ Kulakenya kuwayila wika Yehova chili ngwe kulakenya kutwama hamuwika ni mutu yoze wakuzanga chinji ku mwono we weswe. Achinyonga lunga ni pwo waze analinga usendo. Nyi lunga manyingika kanawa pwo wacho, iye maputuka kumuzanga chinji hanga amumbate. Chipwe ngwe chino chili chiyulo chilemu, lunga wacho ni zango lieswe matayiza chiteli chacho mumu kanazange kasendo kenyi.

¹⁶ Muze munyingika kanawa Yehova, yena muputuka kumuzanga ni kuzanga kulinga yize muhasa hanga kumuwayila. Chino muchikulingisa hanga umulakenye mu yilemba ye ngwe unazange kumuwayila. Mbimbiliya yinambe ngwo mutu mweswe yoze mazanga kukaula Yesu, katamba “kulituna liakulu iye mwene.” (Marku 8:34) Yika chinalumunuka? Chinalumbunuka ngwo yena mwononokena chitangu Yehova ku mwono we. Nawa yize Yehova anazange yili yilemu chinji kuhiana yuma yize wakunyonga ni yize wakuzanga kulinga.—Tanga 1 Petulu 4:2.

17. Mumu liaka atu amwe keshi kulihana ene kuli Yehova?

 ¹⁷ Atu amwe keshi kulihana ene kuli Yehova, mumu kakwivwa woma ngwo kechi kuhasa kununga ni chilakenyo cho cha kumuwayila. Ayo kazangile kwivwisa Yehova yikola ku mbunge, hanji mahasa kunyonga ngwo, nyi kahanyine mwono wo kuli Yehova, iye kechi kaahula hakutwala ku yuma yize akulinga ku mwono wo.

18. Yika muyikukwasa hanga wehuke woma wakuvwisa Yehova yikola ku mbunge?

¹⁸ Zango lie kuli Yehova mulikukwasa hanga ukumbe woma wa kumuvwisa yikola ku mbunge. Musa tachi hanga ununge ni chilakenyo che chakumuwayila, mumu wakumuzanga chinji. (Chilumbununyi 5:4; A-Kolosu 1:10) Nyi walinga chocho, kuuchi kamona ngwe chili chikalu kulinga upale wa Yehova. Postolo Yoano kasonekene ngwenyi: “Lino lie zango lia Zambi ngwo, Tukafunge shimbi jenyi. Shimbi jenyi hi jikalu ko.”—1 Yoano 5:3.

19. Mumu liaka kuwatambile kwivwa woma hakuhana mwono we kuli Yehova?

¹⁹ Kuwatambile kupwa mutu mungunu mba uhane mwono we kuli Yehova. Iye keshi kutushimbwila hanga tulinge yuma yize kutushi ni uhashi wakuyilinga. (Samu 103:14) Iye makukwasa hanga ulinge yuma yize yalita. (Izaia 41:10) Fuliela kuli Yehova ni mbunge ye yeswe, nawa iye, “makalulamisa majila je.”—Yishima 3:5, 6.

20. Muze hiwalihana kulu kuli Zambi, chuma chika chize muchisulaho?

²⁰ Shina unamona ngwe hiwajama hanga uhane mwono we kuli Yehova? Muze mulihana kuli Yehova, yena hiwajama kulu hanga ulinge chuma chize muchisulaho. Katamba kukupapachisa.

21, 22. Kuchi muhasa ‘kutayiza’ ha mbunga kulihana cha ufulielo we?

 ²¹ Lweza kasongo wa chizavu cha makulwana mu chikungulwila che, hanga anyingike ngwo hiwalihana kuli Yehova nawa unazange hanga akupapachise. Ha chino, aye masakula amwe makulwana hanga ahituluke ni yena amwe malongeso alemu a mu Mbimbiliya. Nyi o matayiza ngwo yena hiwajama, makulweza ngwo mahasa kukupapachisa ha kukunguluka chinene cha Yela ja Yehova chize muchizaho. Ha kukunguluka cha  mbonge, hakupwa pande ja upapachiso jize jakuhitulula ulumbunwiso wa upapachiso. Mukwa-kuhanjika-pande kakuhula yihula yaali kuli waze anambe kupapachisa. Ha kukumbulula yihula yacho, yena ‘unatayiza’ ha mbunga kulihana cha ufulielo we.—A-Roma 10:10.

²² Mba hi makupapachisa. Makunjisa mujimba weswe mu meya. Upapachiso muusolola kuli atu eswe ngwo,  ena hiwalihana kuli Yehova nawa haliapwila hiwapwa Chela cha Yehova.

23. Yika chinalumbunuka kupapachisa ‘mu jina lia Tata, ni lia Mwana, ni lia spiritu yisandu’?

²³ Yesu kambile ngwenyi tumbaji twenyi katamba kwaapapachisa ‘mu jina lia Tata, ni lia Mwana, ni lia spiritu yisandu.’ (Tanga Mateu 28:19.) Yika chino chinalumbunuka? Chinalumbunuka ngwo, yena unatayiza wata wa Yehova ni mulimo wa Yesu mu upale wa Zambi, nawa ni chize Zambi akuzachisa spiritu yenyi yisandu hanga amanunune upale wenyi.—Samu 83:18; Mateu 28:18; A-Ngalashia 5:22, 23; 2 Petulu 1:21.

24, 25. (a) Yika upapachiso unalumbunuka? (b) Yika mutulilongesa mu kapitulu wakasula?

²⁴ Upapachiso unalumbunuka chimwe chuma chilemu chinji. Muze makunjisa mu meya, chinalumbunuka ngwo wafwa ku yitanga ye yikulu hanji wecha ndako jipi jize te ukwete. Muze makututwisamo, chino chinalumbunuka ngwo unaputuka mwono waha hanga ulinge upale wa Zambi. Chino chinasolola ngwo mulingila Yehova ku mwono we weswe. Iwuluka nawa ngwe, ena kuwahanyine mwono we ku umwe mulimo hanji ululikiso. Wauhana wika kuli Yehova.

²⁵ Kulihana che muchikukwasa kukolesa usepa we ni Zambi. (Samu 25:14) Chino kuchishi kulumbunuka ngwo mutu makamulamwina ha mukunda wa upapachiso wenyi. Postolo Paulu yasoneka ngwenyi: “Manununenu ulamwino wa yenwene ni woma ni kuchikima.” (A-Fwilipu 2:12) Upapachiso uli wika uputukilo. Alioze kuchi muhasa kulifunga mu zango lia Yehova? Kapitulu wakasula wa mukanda uno makumbulula chihula chino.