1, 2. Kulihi mutuhasa kuwana uswamino musono?

ACHINYONGA ngwe unakatuka kuwande. Kwilu mukulaa pwi, mukuputuka fuji yinji hamwe ni mihenyo. Hi susumuku mukuputuka kunoka vula munji. Mufupa chimwe chihela hanga uchinyinemo. Muwahilila chinji nyi wamona chimwe chihela chipema nawa chomu!

² Yetu tunapalika mu yuma mutapu wacho musono. Yuma hano hashi yinayi ni kupiha chinji. Kota muhasa kulihula ngwe, ‘Kulihi munguhasa kuwana uswamino?’ Mukwa-masamu kasonekene ngwenyi: “Kumavuluka Yehova ngwenyi, Iye uchinyino wami kanda mbonge yami ni Zambi yami yoze namufuliela.” (Samu 91:2) Ewa, Yehova mahasa kutuhuzulula ku milonga yetu musono, ni kutwaha kutalatala chipema cha yuma ya kulutwe lia matangwa.

3. Kuchi Yehova mahasa kupwa uchinyino wetu?

³ Kuchi Yehova mahasa kutufunga? Iye mahasa kutukwasa hanga twehuke kapinda wetu, mumu iye kali ni ndundo jinji kuhiana mutu mweswao yoze mahasa kutulinga upi. Chipwe ngwe chimwe chuma chipi muchilingiwa kuli yetu haliapwila, mutuhasa kupwa ni shindakenyo ngwetu Yehova makalilulieka yuma kulutwe lia matangwa. Mbimbiliya yinatukolweza ngwo: “Lifungenu mu zango lia Zambi.” (Yundase 21) Twatamba kukundama kuli Yehova mba iye atukwase ha mashimbu akalu. Alioze kuchi mutuhasa kuchilinga?

4, 5. Kuchi Yehova akusolola zango lienyi hali yetu?

⁴ Mba tununge ni kukundama kuli Yehova twatamba kunyingika chize iye akutuzanga. Nyonga ha yuma yeswe yize  Yehova hanalingi hali yetu. Iye hanatwehe hashi hapema ni kuzalisaho ni mitondo ni tushitu apema. Hanatwehe nawa kulia ni meya apema waze twakunwa. Ni ukwaso wa Mbimbiliya, Yehova hanatulongesa jina lienyi ni yitanga yenyi yipema. Kuhiana yuma yeswayi, iye hanasolola zango lienyi hali yetu, hakutuma Mwanenyi Yesu hano hashi, ni kumwecha hanga ahane mwono wenyi hali yetu. (Yoano 3:16) Ha mukunda wa chitapo chacho, yetu haliapwila tuli ni kutalatala chipema cha kulutwe lia matangwa.

⁵ Yehova hanase Wanangana wa Mesaya, umwe nguvulu wa mu malilu uze kwasala hakehe hanga uhwise lamba lieswe. Wanangana wacho muukapwisa hashi heswe paraisu, mutu mweswe makatwama ni sambukila ni uwahililo ku miaka ya mutolo. (Samu 37:29) Jila yikwo yize Yehova akutusolwela zango yili usongwelo uze akutwaha hanga tutwame kanawa musono. Nawa kanazange hanga tulembe kuli iye, mumu iye kakwivwa kulemba chetu mashimbu eswawo. Chochene Yehova kakusolola zango lienyi hali yetweswe.

6. Kuchi watamba kutayiza zango lia Yehova?

⁶ Kuchi watamba kutayiza zango lia Yehova? Ha kusolola ngwe, unawahilila chinji ha yuma yeswe yize Yehova akukulingila. Alioze, atu anji musono keshi kusolola usakwililo ha yuma yacho. Chipwe ha mashimbu ja Yesu, yitanga yoyene atu apwile nayo. Limwe tangwa, Yesu yawuka kumi lia akwa-mbumba, alioze umuwika wika mwe wasakwilile Yesu. (Luka 17:12-17) Yetu tunazange kupwa ngwe lunga yono wasakwilile Yesu. Yetu mashimbu eswe twatamba kusakwilila kuli Yehova.

7. Kuchi mutuhasa kuzanga chinji Yehova?

⁷ Yetu nawa twatamba kusolola zango lietu hali Yehova. Yesu kambile kuli tumbaji twenyi ngwenyi, katamba kuzanga Yehova ni mbunge yo yeswe, ni mwono wo weswe, ni manyonga jo eswe. (Tanga Mateu 22:37.) Yika maliji wano analumbunuka?

8, 9. Kuchi mutuhasa kusolola kuli Yehova ngwetu twakumuzanga?

 ⁸ Shina twatamba wika kwamba ngwetu, twakuzanga Zambi? Ka. Nyi twakuzanga Yehova ni mbunge yetu yeswe, ni mwono wetu weswe, ni manyonga jetu eswe, mutusolola zango liacho ku yitanga yetu. (Mateu 7:16-20) Mbimbiliya yakulongesa ngwo, nyi twakuzanga Zambi mutwononokena shimbi jenyi. Kutala chili chikalu kuchilinga? Ka, mumu ‘shimbi ja Yehova hi jikalu ko.’—Tanga 1 Yoano 5:3.

⁹ Nyi mutwononokena Yehova, mutupwa ni sambukila hamwe ni uwahililo ku mwono. (Izaia 48:17, 18) Mba yika muyitukwasa hanga tununge ni kukundama kuli Yehova? Tutalenu.

10. Mumu liaka watamba kununga ni kulilongesa hakutwala kuli Yehova?

¹⁰ Kuchi muhasa kupwa sepa lia Yehova? Kupalikila mu longeso lie lia Mbimbiliya, ena hiwanyingika kanawa Yehova nawa hiwapwa ni usepa upema ni iye. Usepa wacho uli ngwe kahia kaze ena unazange hanga kachine kujima. Alioze kahia kakufupiwa kunyi mba kahone kujima, ni yena watamba kununga ni kulilongesa hakutwala kuli Yehova mba usepa wenu ununge ni kukola.—Yishima 2:1-5.

11. Kuchi wakwivwa ha kulilongesa Mbimbiliya?

¹¹ Muze mununga ni kulilongesa Mbimbiliya, munyingika yuma yize muyikukwata chinji ku mbunge. Achitala chize tumbaji aali a Yesu evwile muze Yesu aalumbunwine uprofeto wa mu Mbimbiliya. Ayo yamba ngwo: “Mbunge jetu te kujevwile chivukuminya muli yetu shimbu ahanjikanga ni yetu mu jila, alumbununanga kuli yetu ye Yisoneko, nyi?”—Luka 24:32.

12, 13. (a) Yika muyihasa kulingiwa ku zango lize tukwete hali Zambi? (b) Kuchi mutuhasa kukolesa zango lietu kuli Yehova?

¹² Chizechene ngwe tumbaji waze evwile kuwaha chinji  ku mbunge ha kunyingika Yisoneko, ni yena kota wevwile kuwaha chinji muze waputukile kulilongesa Mbimbiliya. Chino chakukwashile kunyingika Yehova ni kumuzanga. Kanda wecha zango liacho hanga likekeme.—Mateu 24:12.

¹³ Amu hiwapwa sepa lia Zambi, watamba kulikolweza chinji hanga usepa wenu ukole. Watamba kununga ni kulilongesa hakutwala kuli iye ni kuli Yesu nawa ni kunyonga ha yize unalilongesa ni chize muhasa kuyikaula ku mwono we. (Yoano 17:3) Muze mutanga hanji mulilongesa Mbimbiliya, lihule ngwe: ‘Yika yino yinangulongesa hakutwala kuli Yehova Zambi? Nawa mumu liaka natamba kumuzanga ni mbunge yami yeswe, ni mwono wami weswe?’—1 Timoteu 4:15.

14. Kuchi kulemba chakukolesa zango lietu kuli Yehova?

¹⁴ Nyi uli ni umwe sepa mupema, ena wakuhanjika nenyi mashimbu eswe, nawa kuhanjika chacho chakununga ni kukolesa usepa wenu. Chizechene nawa, ni mutuhanjika nyi Yehova mashimbu eswe mu yilemba, chino muchinunga  ni kukolesa zango lietu hali iye. (Tanga 1 A-Tesalonika 5:17.) Kulemba chili chawana chipema cha Tata yetu wa mu malilu. Twatamba kuhanjika nenyi ni mbunge yeswe mashimbu eswe. (Samu 62:8) Kutwatambile kuhilwokela maliji amuwika mu yilemba yetu, alioze twatamba kunyingika ulumbunwiso wa yize tunambe. Chochene, ni mutununga ni kulilongesa Mbimbiliya, ni kulemba ni mbunge yeswe, zango lietu kuli Yehova mulikola.

15, 16. Kuchi wakumona mulimo wakwambujola sango lipema?

¹⁵ Nyi tunazange kukundama kuli Yehova, yetu nawa twatamba kulweza akwetu hakutwala kuli Yehova. Kuhanjika ni akwetu hakutwala kuli Yehova chili chiwape chipema. (Luka 1:74) Nawa chino chili chiteli chize Yesu ahanyine kuli akwa-Kristu eswe amwenemwene. Mutu ni mutu katamba kwambujola sango lipema lia Wanangana wa Zambi. Shina hiwaputuka kwambujola sango lipema?—Mateu 24:14; 28: 19, 20.

¹⁶ Postolo Paulu kamwene ngwenyi, mulimo wakwambujola uli ulemu, kashika, auvulukile ngwenyi “chuma chahiana.” (2 A-Korindu 4:7) Kuhanjika ni akwenu hakutwala kuli Yehova ni upale wenyi uli mulimo ulemu uze muhasa kulinga ku mwono we. Yili yimwe jila yize muwayilamo Yehova, nawa iye malemesa yize mulinga. (A-Hepreu 6:10) Kwambujola muchihasa nawa kukuyukisa hamwe ni atu waze makupanjika, mumu unakwase akwenu ni yena-mwene hanga nukundame kuli Yehova ni kushimbwila mwono wa mutolo. (Tanga 1 A-Korindu 15:58.) Shina kuli umwe mulimo uze muhasa kukwaha chiseke chacho kuhiana uno?

17. Mumu liaka mulimo wakwambujola katamba kuulinga kwashi-washi?

 ¹⁷ Mulimo wakwambujola katamba kuulinga kawashi-washi. Twatamba ‘kwambujola lie Liji’ ni ‘kuhondangana nalio’ kawashi-washi. (2 Timoteu 4:2) Atu katamba kwivwa hakutwala ku Wanangana wa Zambi. Mbimbiliya yinambe ngwo: “Tangwa linene lia Yehova linakundama; Linakundama fuji-fuji!” Songo lia yuma yacho ‘kulichi kuhona!’ (Zefania 1:14; Habakuke 2:3) Ewa, kwasala hakehe, Yehova manongesa upi weswe uze Satana akuneha hano hashi. Amu yuma yacho kanda yichilingiwa, atu katamba kwaatoweza hanji mahasa kusakula kuwayila Yehova.

18. Mumu liaka twatamba kuwayila Yehova hamwe ni akwa-Kristu akwo amwenemwene?

¹⁸ Yehova kanazange hanga tumuwayile hamwe ni akwa-Kristu akwo amwenemwene. Mbimbiliya yinambe ngwo: “Tulitalenu umwe ni mukwo ni kulikasumuna ku zango ni yitanga yipema. Kanda twehuka kulikungulula hamuwika, ngwe ndako ya amwe, alioze nukalishinjile, ni kuhiana chikolo shimbu munumona lie tangwa linakundama.” (A-Hepreu 10:24, 25) Kashika, twatamba kusa tachi hanga tupwe ni kuya ku kukunguluka cheswe. Kukunguluka chacho chakutwaha uhashi wa kulikolweza ni kulitakamisa umwe ni mukwo.

19. Yika muyihasa kutukwasa hanga tuzange mandumbu ni mapangi jetu?

¹⁹ Muze muya ku kukunguluka, yena muwanako masepa apema waze makukwasa hanga uwayile Yehova. Ena muwanamo mandumbu ni mapangi eka ni eka waze ali ngwe yena, waze akusa tachi hanga awayile Yehova. Nawa ngwe chize uli yena, no kali akwa-shili nawa kakulinga yuma yize kuyalitelele. Nyi makulinga chimwe chuma chize kuchalitele, sako tachi hanga waakonekene. (Tanga A-Kolosu 3:13.) Lihulikile wika ha yitanga yipema ya mandumbu ni mapangi je akwa-Kristu, nyi walinga chocho, chino muchikukwasa kwaazanga ni kukundama kuli Yehova.

20, 21. “Mwono wamwenemwene” yika unalumbunuka?

 ²⁰ Yehova kanazange hanga masepa jenyi eswe apwe ni mwono upema. Mbimbiliya yinatulongesa ngwo, mwono wetu wa kulutwe lia matangwa muukapwa upema chinji kuhiana uze tuli nawo musono.

²¹ Kulutwe lia matangwa, mutukatwama ni mwono wa miaka yeswe, hi wika ko kutwama ni miaka 70 hanji 80. Mutukawahilila ni “mwono wa mutolo” ni mijimba yingunu, sambukila, hamwe ni chiseke mu paraisu yipema. Kashika Mbimbiliya yinauvuluka ngwo, “mwono wamwenemwene.” Yehova kanatulakenya mwono wamwenemwene, twatamba kusa tachi haliapwila hanga ‘tulalaminye ku mwono’ wacho.—1 Timoteu 6:12, 19.

22. (a) Kuchi mutuhasa ‘kukakaminya mwono wamwenemwene’? (b) Mumu liaka kutuchi kuhasa kuzuka mwono wa mutolo ku tachi ja yetwene?

²² Kuchi mutuhasa ‘kukakaminya mwono wamwenemwene’? ‘Hakulinga yuma yipema,’ ni ‘kupwa ni yitanga yipema ya kulumbama.’ (1 Timoteu 6:18) Maliji wano kanalumbunuka ngwo twatamba kukaula yuma yize tunalilongesa mu Mbimbiliya. Chipwe chocho, mwono wamwenemwene kuwatalile wika ha tachi ja yetwene. Kutuchi kuhasa kuzuka mwono wa mutolo ku tachi jetu. Mumu uli chawana cha “vumbi lia” Yehova kuli tuvumbi twenyi. (A-Roma 5:15) Tata yetu wa mu malilu kanazange kuhana chawana chino kuli tuvumbi twenyi ashishika.

23. Mumu liaka watamba kukwata yiyulo yipema musono?

²³ Achilihule ngwe, ‘Shina nakuwayila Zambi kulita ni chize Mbimbiliya yakulongesa?’ Nyi mumona ngwe, watamba kwalumuna yimwe yuma ku mwono we, watamba kuchilinga kawashi-washi. Nyi twajikijila muli Yehova ni kulinga yuma yeswe yize mutuhasa hanga tumwononokene, iye mapwa uchinyino wetu. Iye manunga ni kufunga tuvumbi  twenyi ashishika ha matangwa wano akusula a hano hashi hapi ha Satana. Ha chino, Yehova makatulamwina hanga tutwame ni mwono wa mutolo mu Paraisu, ngwe chize alakenyene. Ewa, nyi wakwata yiyulo yipema musono, ena mukahasa kupwa ni mwono wamwenemwene!