1, 2. Yika Yehova anazange hali asoko?

YEHOVA ZAMBI mwe waputukile umbachiso utangu. Mbimbiliya yinatulweze ngwo, iye yatanga pwo mutangu “yamuneha kuli” lunga. Alama yawahilila chinji ni kwamba ngwenyi: “Yono chifwaha cha ku yifwaha yami; musunya wa ku musunya wami.” (Uputukilo 2:22, 23) Yino yinatulweza ngwo Yehova kanazange hanga waze alimbata awahilile.

² Alioze, atu anji keshi kupwa ni uwahililo mu usoko wo. Chipwe chocho, mu Mbimbiliya muli shimbi jinji jize mujikwasa mutu ni mutu mu usoko hanga apemese usoko wo ni kuwahilila hamuwika.—Luka 11:28.

3, 4. (a) Kuchi lunga atamba kutwama ni mukwo-pwo? (b) Mumu liaka chili chilemu lunga ni pwo kulikonekena?

³ Mbimbiliya yinambe ngwo lunga mupema kakutwama ni kufunga mukwo-pwo ni zango hamwe ni vumbi. Tanga A-Efwesu 5:25-29. Lunga katamba kuzanga chinji mukwo-pwo. Katamba nawa kumufunga kanawa. Nawa katambile kulinga chuma nichimwe chize muchimuneha yikola ku mbunge.

⁴ Yika lunga atamba kulinga nyi mukwo-pwo malinga yuma yize kuyalitele? Malunga kanaalweze ngwo: “Zangenu akwenu-mapwo, kanda nupwa asasu kulimika no.” (A-Kolosu 3:19) Malunga, iwulukenu ngwenu ni yenu nwakulinga yuma yize kuyalitele. Nawa ni nunazange hanga Zambi anukonekene, nwatamba kukonekena mapwo  jenu. (Mateu 6:12, 14, 15) Muze lunga ni pwo malikonekena ni mbunge yeswe, chino muchaakwasa kupwa ni uwahililo mu ulo wo.

5. Mumu liaka lunga atamba kulemesa mukwo-pwo?

⁵ Yehova kanazange hanga lunga alemese mukwo-pwo. Lunga katamba kunyonga kanawa ha yuma yize mukwo-pwo anafupu. Chino chili chikuma chilemu chinji. Nyi lunga keshi kutwama kanawa ni mukwo-pwo, Yehova mahasa kulituna kupanjika kulemba chenyi. (1 Petulu 3:7) Yize yakulemesa atu kumeso ja Yehova yili zango lize ayo akwete kuli iye. Iye keshi kwamba ngwenyi lunga kali ni ulemu unji kuhiana pwo.

6. Maliji akwamba ngwo lunga ni pwo kali “musunya umuwika,” yika analumbunuka?

⁶ Yesu kambile ngwenyi, lunga ni pwo “hi aali nawa ko, alioze musunya umuwika.” (Mateu 19:6) Ayo katamba kulizanga ni kushishika kuli umwe ni mukwo. (Yishima 5:15-21; A-Hepreu 13:4) Malunga ni pwo waze alimbata katambile kupwa ni kuzo muze mazanga kulisumbakenya. (1 A-Korindu 7:3-5) Lunga katamba kwiwuluka ngwenyi, mutu niumwe “kechi kupwa ni kole ha musunya wenyi mwene, alioze maulela, maufunga.” Kashika lunga katamba kuzanga ni kulembejeka mukwo-pwo. Kuhiana chuma cheswacho, pwo kakuzanga hanga lunga lienyi apwe chimbovu nawa mukwa zango linji hali iye.—A-Efwesu 5:29.

7. Mumu liaka mu usoko mwatamba kupwa mwata?

⁷ Usoko weswe watamba kupwa ni mwata, yoze masongwela asoko hanga ahase kukalakala hamuwika ni kulivwashana. Mbimbiliya yinambe mu mukanda 1 A-Korindu 11:3, ngwo: “Kristu iye we mutwe wa lunga mweswe; lunga, iye mutwe wa pwo, Zambi iye mutwe wa Kristu.”

8. Kuchi pwo mahasa kusolola vumbi kuli mukwo-lunga?

 ⁸ Malunga eswe kakulinga uhenge. Alioze nyi pwo makwasa yiyulo ya mukwo-lunga ni kulivwashana ni mbunge yeswe, asoko eswe mayuka. (1 Petulu 3:1-6) Mbimbiliya yinambe ngwo: ‘Pwo akase vumbi mukwo lunga.’ (A-Efwesu 5:33) Kuchi mba mutwamba nyi lunga ni pwo keshi kuwayila mu ulembelo umuwika? Pwo nihindu katamba kusolola vumbi kuli mukwo-lunga. Mbimbiliya yinambe ngwo: “Yenu mapwo zeyelenu kuli akwenu-malunga; hanga chipwe kachi amwe keshi kwononoka ku lie liji lia Zambi, akaazuke ni liji liakuhi ku kwenda cha akwo-mapwo, ha kutala ku kwenda chenu cha vumbi.” (1 Petulu 3:1, 2) Pwo yoze ukwete yitanga yipema mahasa kukwasa mukwo-lunga hanga anyingike ni kuvumbika ufulielo wenyi.

9. (a) Yika pwo atamba kulinga ni mahona kulivwashana ni mukwo-lunga? (b) Chiyulo chika anahane kuli mapwo mu mukanda wa Titu 2:4, 5?

⁹ Yika pwo mahasa kulinga nyi mahona kulivwashana ni mukwo-lunga? Aye katamba kusolola manyonga jenyi  kuli mukwo-lunga ni vumbi lieswe. Chakutalilaho, Sara kambile chimwe chuma kuli Apalahama chize iye kakachizangile, alioze Yehova yalweza Apalahama ngwenyi: “Panjika ku liji lienyi.” (Uputukilo 21:9-12) Chakupwa chikalu chinji lunga mukwa-Kristu kukwata chiyulo chakasula chize muchilimika ni yize Mbimbiliya yakwamba, kashika, mukwo-pwo katamba kumukwasa. (Yilinga 5:29; A-Efwesu 5:24) Pwo yoze ukwete yitanga yipema kakufunga kanawa usoko wenyi. (Tanga Titu 2:4, 5.) Nyi mukwo-lunga ni ana jenyi mamona mulimo ulemu uze iye akulinga, o mamuzanga ni kumuvumbika chinji.—Yishima 31:10, 28.

10. Yika Mbimbiliya yinambe hakutwala ku kulihandununa ni kulilakula?

¹⁰ Ha mashimbu amwe waze alimbata kakulipupula kukwata chiyulo cha kulihandununa hanji kulilakula. Alioze, Mbimbiliya yinambe ngwo: “Pwo kanda alihandununa ni mukwo-lunga” nawa ngwo “lunga kanda akahichika mukwo-pwo.” (1 A-Korindu 7:10, 11) Kuli amwe mashimbu akalu chinji waze lunga ni pwo mahasa kulihandununa, alioze chino chili chiyulo chilemu. Mba kuchi mutwamba hakutwala ku kulilakula? Mbimbiliya yinasolola ngwo, chuma chimuwika chize muchihasa kutwala lunga ni pwo hanga alilakule chili utanji.—Mateu 19:9.

11. Yika ana anafupu chinji kuhiana chuma cheswacho?

¹¹ Yisemi, katamba kupalikisa mashimbu anji ni ana jo. Ana jenu kakuzanga kupwa hamwe ni yenu, kashika nwatamba kwaalongesa hakutwala kuli Yehova kuhiana chuma cheswacho.—Shimbi Yamuchiali 6:4-9.

12. Yika yisemi atamba kulinga hanga afunge kanawa ana jo?

¹² Hashi ha Satana hanayi ni kupihia chinji, nawa atu  amwe mahasa kuzanga kulinga upi hali ana jetu, chipwe kulisumbakenya no kutachi. Yisemi amwe chakwaakalila chinji kuhanjika ni ana jo hakutwala ku chikuma chacho. Alioze yisemi katamba kutoweza ana jo hakutwala kuli atu amutapu au ni kwaalongesa chize mahasa kweehuka. Yisemi, nwatamba kufunga kanawa ana jenu. *—1 Petulu 5:8.

13. Kuchi yisemi atamba kufumba ana jo?

¹³ Yisemi nuli ni chiteli cha kulongesa ana jenu hanga  apwe ni yitanga yipema. Kuchi munuhasa kulongesa ana jenu? Ana jenu kanafupu fumbo, alioze fumbo liacho kuliatambile kupwa likalu hanji lia uswi. (Jeremia 30:11) Kashika kunwatambile kufumba ana jenu ha shimbu lize nuli ni uli. Kanda nuhanjika maliji apwa ngwe “kutuwa cha katana” ni kwaalemeka ku mbunge. (Yishima 12:18) Longesenu ana jenu hanga anyingike mumu liaka o atamba kunwonokena.—A-Efwesu 6:4; A-Hepreu 12:9-11; tala Maliji Akusongo 30.

14, 15. Mumu liaka ana atamba kononokena yisemi jo?

¹⁴ Yesu te kakwononokena Tato mashimbu eswe, chipwe muze te hichashiko. (Luka 22:42; Yoano 8:28, 29) Yehova kanazange nawa hanga ana ononokene yisemi jo.—A-Efwesu 6:1-3.

¹⁵ Ana, chipwe ngwe muchipwa chikalu kwononokena yisemi jenu, iwulukenu ngwenu, nyi munukaula yiyulo yo, Yehova ni yisemi jenu manuzanga chinji. *—Yishima 1:8; 6: 20; 23:22-25.

16. (a) Kuchi Satana akweseka akweze hanga alinge yuma yipi? (b) Mumu liaka chili chilemu kulikata ni atu waze akuzanga Yehova?

¹⁶ Ndiapu mahasa kuzachisa masepa je ni akweze akwo hanga akushinjile kulinga yuma yipi. Iye kananyingika ngwo yeseko yacho muyihasa kupwa yikalu chinji kuyikumba. Chakutalilaho, Ndina mwana wa Yakomba, kapwile ni masepa waze te keshi kuzanga Yehova. Chino chinakamunehena lamba linji hamwe ni usoko wenyi. (Uputukilo 34:1, 2) Nyi mulikata ni atu waze keshi kuzanga Yehova, ayo mahasa kukushinjila hanga ulinge yuma yize Yehova keshi kuzanga, yize muyihasa kuneha yinyengo yinji hali yena, hali asoko je ni kuli Zambi. (Yishima 17:21, 25) Chino, chinasolola ngwo chili chilemu kulikata ni atu waze akuzanga Yehova.—1 A-Korindu 15:33.

17. Chiteli chika mutu ni mutu alinacho mu usoko?

¹⁷ Nyi mutu mweswe mu usoko makaula shimbi ja Zambi, o mehuka kapalia ni milonga yinji. Kashika, nyi uli lunga, zanga mukwenu-pwo ni kumusolwela umbovu. Nyi uli pwo, vumbika mukwenu-lunga ni kulikehesa kuli iye, ha kwimbulula chilweza cha pwo yoze anasolola mu mukanda wa Yishima 31:10-31. Nyi uli chisemi, longesa ana je hanga azange Zambi. (Yishima 22:6) Nyi uli tata, songwela “kanawa” usoko we. (1 Timoteu 3:4, 5; 5:8) Nawa yenu ana, ononokenu yisemi jenu. (A-Kolosu 3:20) Iwulukenu ngwenu, mutu mweswe mu usoko, mahasa kulinga uhenge, alioze likehesenu ni kulikonekena umwe ni mukwo. Chochene, mu Mbimbiliya muli usongwelo wa Yehova uze mutu mweswe mu usoko mahasa kukaula.