1. Kulemba chika mutulilongesa haliapwila?

ATU anji hano hashi kananyingika kulemba chize avuluka ngwo Tata Yetu hanji Kulemba cha Mwene. Yesu kazachishile kulemba chino hanga alongese tumbaji twenyi chize atamba kulemba. Yika iye echile mu kulemba chacho? Nawa mumu liaka kulemba chacho chili ni ulemu kuli yetu musono?

2. Yuma yika yitatu yize Yesu atulongesele hanga twite ha kulemba?

² Yesu kambile ngwenyi: “Lembenu ngwenu, Tata nuli mu malilu, jina lienu lipwe lisandu. Wanangana wenu wize. Upale wenu ulingiwe hashi chizechene ngwe unalingiwa mwilu.” (Tanga Mateu 6:9-13.) Mumu liaka Yesu atulongesele hanga twite yuma yacho yitatu ha kulemba chetu?—Tala Maliji Akusongo 20.

3. Yika twatamba kunyingika hakutwala ku Wanangana wa Zambi?

³ Twalilongesa ngwetu Zambi jina lienyi Yehova. Nawa twalilongesa upale wa Zambi hali atu ni hano hashi. Mba maliji a Yesu akwamba ngwo, “Wanangana wenu wize” yika analumbunuka? Mutulilongesa hakutwala ku Wanangana wa Zambi, yuma yize muukalinga, ni chize muukapwisa jina lia Zambi lisandu.

4. Wanangana wa Zambi yika, nawa iya makauyula?

⁴ Yehova hanase unguvulu wa mu malilu nawa hanasakula Yesu apwe Mwanangana wa unguvulu wacho. Mbimbiliya yinavuluka unguvulu wacho ngwo, Wanangana wa Zambi. Yesu kali “Mwanangana wa mianangana mwe Mwene wa ene.” (1 Timoteu 6:15) Yesu kali ni  uhashi wakulinga yuma yipema kuhiana manguvulu ja atu. Aye kali ni ndundo jinji kuhiana manguvulu eswe a hano hashi.

5. Kulihi Wanangana wa Zambi unayulila? Hali muukayula?

⁵ Muze Yesu amuhindwishile, yikupalika matangwa makumi awana, yahiluka mu malilu. Ha chino, Yehova yamusakula hanga apwe Mwanangana mu Wanangana wenyi. (Yilinga 2:33) Wanangana wa Zambi uli mu malilu, alioze muukayula hashi heswe. (Usolwelo 11:15) Kashika Mbimbiliya yakuvuluka Wanangana wa Zambi ngwo “Wanangana wenyi wa mwilu.”—2 Timoteu 4:18.

6, 7. Yika yapwisa Yesu mwanangana mupema kuhiana mianangana ja atu?

⁶ Mbimbiliya yinambe ngwo, Yesu kali Mwanangana munene kuhiana mianangana eswe a hano hashi, mumu “Iye wika mukwa mwono wa mutolo.” (1 Timoteu 6:16) Mianangana eswe a hano hashi kakufwa, alioze Yesu kechi keza kafwa. Yuma yeswe yipema yize Yesu makalinga hali yetu muyikapwa ya mutolo.

⁷ Uprofeto wa Mbimbiliya unambe ngwo, Yesu makapwa Mwanangana mukwa-ululi nawa mukwa-keke: “Spiritu ya Yehova makahwimina hali iye, spiritu wa malinjiekela ni yinyingi, spiritu wa yiyulo ni ndundo, spiritu ya mana ni woma wa Yehova. Uwahililo wenyi muukapwa mu woma wa Yehova. Kechi kayula nikulita ni chize meso jenyi mamona; kechi kapatwila nikulita ni chize matwi jenyi mevwa; alioze makayula yiswale ni ululi, makapatwila yimbovu a hashi, ni katonde ka.” (Izaia 11:2-4) Shina unazange kupwa ni mwanangana wamutapu au nyi?

8. Kuchi tunanyingika ngwetu, Yesu kechi kayula ukawenyi?

⁸ Zambi hanasakula atu hanga akayule hamwe ni Yesu mu unguvulu wa mu malilu. Chakutalilaho, postolo  Paulu kambile kuli Timoteu ngwenyi: “Nyi mutunyongonona mu lamba, chocho mutukayula hamwe nenyi,” ngwe mianangana. (2 Timoteu 2:12) Atu angahi makayula ngwe mianangana hamwe ni Yesu?

9. Atu angahi makayula hamwe ni Yesu? Nawa shimbu lika Zambi aputukile kwaasakula?

⁹ Ngwe chize twalilongesa mu Kapitulu 7, mu umwe usolwelo postolo Yoano kamwene Yesu hapwa Mwanangana mu malilu hamwe ni mianangana akwo 144,000. Aya ali mu chizavu cha 144,000? Yoano yalumbununa ngwenyi, o “kali ni jina [lia Yesu], ni jina lia Tato, linasonewa ha mahuma jo.” Iye yamba nawa ngwenyi: Wano kali “waze akukaula mwe Mwana-panga kweswako maya. Wano aalanjile hakachi ka atu.” (Tanga Usolwelo 14:1, 4.) Atu 144,000 kali akwa-Kristu ashishika waze Zambi akusakula hanga ‘akayule hashi ngwe mianangana’ hamwe ni Yesu. Muze o akufwa, kakwaahindwisa hanga aye mu malilu. (Usolwelo 5:10) Kukatuka ha matangwa ja apostolo, Yehova kakusakula akwa-Kristu ashishika hanga apwe mu chizavu cha mianangana 144,000.

10. Mumu liaka kusa Yesu ni 144,000 hanga ayule atu chinasolola zango lia Yehova?

¹⁰ Yehova kakutuzanga chinji kashika akusakula atu hanga ayule hamwe ni Yesu. Yesu makapwa mwanangana mupema mumu kanatunyingika kanawa. Nawa kananyingika yika chinalumbunuka kupwa mutu ni kumona lamba. Paulu kambile chize Yesu akwivwa hali yetu, ngwenyi, Yesu mahasa kutwivwila “keke ha kukokoloka chetu” mumu neye “hanamweseka ha yuma yeswe chizechene ngwe yetu.” (A-Hepreu 4:15; 5:8) Akwa-Kristu 144,000 kananyingika kanawa lamba lize twakumona. Mumu no kakupinda ni uhenge hamwe  ni yikola. Kashika mutuhasa kupwa ni shindakenyo ngwetu, Yesu ni atu 144,000 kechi kanyingika wika chize twakwivwa, alioze makanyingika nawa lamba lize twakumona.

11. Mumu liaka Yesu alongesele tumbaji twenyi alembe hanga upale wa Zambi ulingiwe mu malilu?

¹¹ Yesu kalongesele tumbaji twenyi alembe hanga upale wa Zambi ulingiwe mu malilu. Mumu liaka? Twalilongesanga mu Kapitulu 3 ngwo, Satana Ndiapu kalimikine ni Yehova. Muze Satana halinga chocho, Yehova yamwecha hamwe ni angelo api hanji andemoniu hanga atwame mu malilu ha amwe mashimbu. Kashika, hi eswe ko mu malilu te akulinga upale wa Zambi. Mu Kapitulu 10, mutukalilongesa chinji hakutwala kuli Satana ni andemoniu.

12. Yuma yaali yilemu yika yize anasolola mu Usolwelo 12:10?

¹² Mbimbiliya yinambe ngwo, muze Yesu amupwishile Mwanangana mu Wanangana wa Zambi, yasa jita ni Satana. (Tanga Usolwelo 12:7-10.) Versu 10 yinasolola yuma yaali yilemu yize yalingiwile. Wanangana wa Zambi yiuputuka kuyula muze Yesu Kristu amupwishile Mwanangana ni kuhanga Satana mu malilu ni kumunyasa hashi. Ngwe chize mutulilongesa, yuma yino yalingiwile kulu.

13. Yika yalingiwile mu malilu, muze ahangilemo Satana?

¹³ Mbimbiliya yinasolola chiseke chize evwile angelo ashishika muze ahangile Satana ni andemoniu jenyi mu malilu. Tunatange chino: “Ivwenu chiseke, yenu malilu, ni yenu nwatwamamo!” (Usolwelo 12:12) Haliapwila mu malilu muli sambukila ni kulivwashana, mumu eswe waze alimo kanalingi upale wa Zambi.

14. Yika yakulingiwa hano hashi ha kuhanga Satana mu malilu?

 ¹⁴ Alioze mwono hano hashi unalise chinji ni wa mu malilu. Atu kakumona lamba linji, “mumu Ndiapu hanahulumuka” hano hashi nawa “kali ni ufwatulo wunji mumu kananyingika mwaka ukepe wika ali nawo.” (Usolwelo 12:12) Satana kali ni ufwatulo unji. Mumu hanamuhange mu malilu, nawa kanayingika ngwenyi hikwasala hakehe hanga amwonwone. Iye kakulinga yeswe yize mahasa hanga anehe lamba ni yikola kuli atu eswe hano hashi.

15. Upale wa Zambi hano hashi uka?

¹⁵ Alioze upale wa Zambi hano hashi kuwalumukine. Iye nihindu kanazange hanga atu angunu ni kutwama mu paraisu hano hashi. (Samu 37:29) Mba kuchi Wanangana wa Zambi muukamanununa nyonga lino?

16, 17. Yika mukanda wa Daniele 2:44 unatulweze hakutwala ku Wanangana wa Zambi?

¹⁶ Uprofeto wa Daniele 2:44 unambe ngwo: “Ha matangwa ja mianangana aze Zambi ya mwilu makakolesa umwe wanangana uze kuuchi kanonga. Chipwe chiyulo chawo kechi kachiswanyisa kuli atu eka. Muukafwenya mawanangana ano akwo ni kuasulisa, alioze wene muukakola wa mutolo.” Yika uprofeto uno unatulongesa hakutwala ku Wanangana wa Zambi?

¹⁷ Chitangu, unatulweze ngwo, Wanangana wa Zambi te muuputuka kuyula ha “matangwa ja mianangana aze.” Chino chinalumbunuka ngwo, mianangana amwe te manunga ni kupwa hano hashi muze Wanangana wa Zambi muuputuka kuyula. Chamuchiali, ngwo, Wanangana wa Zambi te muuyula ku miaka ya mutolo nawa kechi kuusalakana kuli wanangana weka. Chamuchitatu ngwo, Wanangana wa Zambi te muwasa jita ni mianangana a hano hashi. Wanangana wa Zambi te  muukumba jita yacho nawa we wika muusala ni kuyula hashi heswe. Ha chino, atu te mapwa ni Wanangana upema uze kanda achipwa nawo kama.

18. Kuchi avuluka jita yakasula yize Wanangana wa Zambi muyikasa ni mianangana a hano hashi?

¹⁸ Kuchi Wanangana wa Zambi muukayula hashi heswe? Muze jita ya kasula yize avuluka ngwo Armagedone kanda yichiputuka, andemoniu makapiangula “mianangana a yifuchi yeswe ya hashi, mukuakungulwila ku jita ya tangwa linene lia Zambi Mukwa-Ndundo-Jeswe.” Chochene, mianangana a hashi heswe makasa jita ni Wanangana wa Zambi.—Usolwelo 16:14, 16, tala Maliji Akusongo 10.

19, 20. Mumu liaka tunafupu Wanangana wa Zambi hanga uyule hashi heswe?

¹⁹ Mumu liaka tunafupu Wanangana wa Zambi? Ha mukunda wa yitela yitatu. Chitangu, yetweswe tuli akwa-shili, twakuyiza nawa twakufwa. Alioze Mbimbiliya yinambe ngwo, mu Wanangana wa Zambi mutukatwama ku miaka ya mutolo. Mukanda wa Yoano 3:16 unambe ngwo: “Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.”

²⁰ Chitela chamuchiali chize tunafupila Wanangana wa Zambi chili ngwo, mumu tuli hamwe ni atu waze akwete yitanga yipi. Atu anji kakuhanjika mahuza, kakwiya nawa kakulinga utanji. Etu kutuchi kuhasa kuhwisa yitanga yacho, alioze Zambi makayihwisa. Atu waze ananungu ni kulinga yuma yipi makaanongesa mu jita ya Armagedone. (Tanga Samu 37:10.) Chitela chamuchitatu chili ngwo, mianangana ja atu kakwete yitanga yipi, mbunge yikalu ni kalimbalimba. O keshi kuzanga kukwasa atu hanga ononokene Zambi. Kashika Mbimbiliya  yakwamba ngwo, ‘Mutu ni mapwa ni chiyulo helu lia mukwo kakumupinjisa.’—Chilumbununyi 8:9.

21. Yika Wanangana wa Zambi muukalinga hanga upale Zambi ukalingiwe hano hashi?

²¹ Muze jita ya Armagedone muyihwa, Wanangana wa Zambi muukasa shindakenyo ngwo upale wa Zambi unalingiwa hano hashi. Chakutalilaho, muukachiza ko Satana ni andemoniu jenyi. (Usolwelo 20:1-3) Ha chino niumwe makayiza wakuhi. Ha mukunda wa ukuule, atu eswe ashishika makapwa ni mwono wa mutolo mu Paraisu. (Usolwelo 22:1-3) Wanangana muukahalisa jina lia Zambi. Yika maliji wano analumbunuka? Kanalumbununa ngwo, muze Wanangana wa Zambi muuyula hano hashi, atu eswe waze makapwaho makahalisa jina lia Yehova.—Tala Maliji Akusongo 21.

22. Kuchi tunanyingika ngwetu, Yesu kakamupwishile Mwanangana ha shimbu lize-liene amuhindwishile hanji muze apwile hano hashi?

²² Yesu kalongesele tumbaji twenyi hanga alembe ngwo: “Wanangana wenu wize.” Maliji wano kanasolola ngwo Wanangana wa Zambi te muwiza kulutwe lia matangwa. Yehova chitangu te masa wanangana wenyi ni kupwisa Yesu Mwanangana wamwo. Shina Yesu kamupwishile Mwanangana ha shimbu lize-liene afunyine  mu malilu? Ka, iye te katamba kushimbwilako. Ha mashimbu amwe muze Yesu te hamuhindwisa, Petulu ni Paulu yalumbununa kanawa chikuma chino ha kuchitesa ni uprofeto uli mu Samu 110:1 hakutwala kuli Yesu. Mu uprofeto wacho Yehova kanambe ngwenyi: “Twama ku chindume chami ndo mungupwisa akwa kole je chitwamo cha yiliato ye.” (Yilinga 2:32-35; A-Hepreu 10:12, 13) Ha mashimbu angahi Yesu te atamba kushimbwila hanga Yehova amupwise Mwanangana?

23. (a) Ha shimbu lika Yesu aputukile kuyula ngwe Mwanangana mu Wanangana wa Zambi? (b) Yika mutulilongesa mu kapitulu masulaho??

²³ Ha miaka yinji kunyima lia mwaka 1914, amwe akwa-Kristu angunu yanyingika ngwo mwaka 1914 te muupwa ulemu chinji mu uprofeto wa Mbimbiliya. Yuma yize yalingiwile ha mwaka 1914 yinasolola ngwo yize ayo ambile yili yamwenemwene. Yesu yaputuka kuyula ngwe Mwanangana ha mwaka wacho. (Samu 110:2) Ha shimbu liacho, yanyasa Satana hano hashi, kashika, “mwaka ukepe wika ali nawo.” (Usolwelo 12:12) Kapitulu yoze masulaho mutulilongesa yuma yize yinasolola ngwo tuli ha mashimbu jacho. Mutulilongesa nawa ngwetu kwasala hakehe hanga Wanangana wa Zambi umanunune upale wa Zambi hano hashi.—Tala Maliji Akusongo 22.