1, 2. (a) Shina ena munyingika kanawa mutu wa lufuma ha kunyingika wika jina lienyi? Lumbununa. (b) Yika atu akunyonga hali Yesu?

KULI atu anji alufuma hano hashi. Ena kota unanyingika majina ja amwe akuli atu jacho. Kunyingika wika jina kuchishi kulumbunuka ngwo unanyingika kanawa mutu wacho. Chino kuchishi kulumbunuka nawa ngwo unanyingika kanawa yuma yeswe hakutwala ku mwono wenyi ni yize akuzanga.

² Ena kota hiunevu hakutwala kuli Yesu Kristu, chipwe ngwe hikwapalika miaka 2,000 chize muze apwile hano hashi. Alioze atu anji keshi kunyingika chize Yesu apwile hano hashi. Amwe kakwamba ngwo kapwile wika lunga mupema, eka ngwo kapwile profeta, akwo kakufuliela ngwo iye mwe Zambi. Kuchi yena wakunyonga hali Yesu?—Tala Maliji Akusongo 12.

3. Mumu liaka chili chilemu kunyingika Yehova ni Zambi ni Yesu Kristu?

³ Chili chilemu kunyingika umwenemwene hakutwala kuli Yesu. Mumu liaka? Mbimbiliya yinambe ngwo: “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.” (Yoano 17:3) Ewa, nyi wanyingika umwenemwene hakutwala kuli Yehova ni Yesu, muhasa kupwa ni mwono wa mutolo mu paraisu hano hashi. (Yoano 14:6) Nawa, kunyingika Yesu muchikukwasa, mumu iye kali chilweza chipema cha chize muhasa kutwama kanawa ni akwenu. (Yoano 13:34, 35) Mu Kapitulu 1,  twalilongesanga umwenemwene hakutwala kuli Zambi. Haliapwila mutunyingika yize Mbimbiliya yakulongesa hakutwala kuli Yesu.

4. Yika majina “Mesaya” ni “Kristu” analumbunuka?

⁴ Muze Yesu te kanda achisemuka, Yehova te hanalakenya mu Mbimbiliya ngwenyi, makatuma Mesaya, hanji Kristu. Jina “Mesaya” linakatuka mu limi lia Hepreu. Jina “Kristu” linakatuka mu limi lia Ngregu. Majina wano kanalumbunuka ngwo Zambi te masakula Mesaya ni kumwaha chimwe chihela chilemu. Mesaya makamanununa yilakenyo yeswe ya Zambi. Kashika, ni yena Yesu mahasa kukukwasa kanawa musono. Alioze, muze te kanda achisemuka, atu anji te kakulihula ngwo, ‘Iya kevwe makapwa Mesaya?’

5. Shina tumbaji twa Yesu kafulielele ngwo iye kali Mesaya?

⁵ Tumbaji twa Yesu kakahamikine ngwo iye mwe Mesaya yoze alakenyene. (Yoano 1:41) Chakutalilaho, Semone Petulu, kambile kuli Yesu ngwenyi: “Yenu nuli mwe Kristu.” (Mateu 16:16) Kuchi mutuhasa kupwa ni shindakenyo ngwetu chamwenemwene Yesu mwe Mesaya?

6. Kuchi Yehova akwashile atu ashishika hanga anyingike Mesaya?

⁶ Muze Yesu te kanda achisemuka, aprofeta ja Zambi kasonekene yuma yinji yize te muyikwasa atu kunyingika Mesaya. Kuchi chino te muchaakwasa? Achinyonga, nyi makutuma hanga uye ni kupatwiza mutu yoze kanda uchimona kama kuze atu akunyinyina mashinyi hanji ndeke. Nyi umwe mutu makulweza chize mutu wacho apwa, ena muupwa ni uhashi wa kuwana mutu wacho. Chimuwika nawa, Yehova kazachishile aprofeta hanga atulweze yuma yize te Mesaya malinga ni yize te  muyilingiwa kuli iye. Umanunuko wa uprofeto weswe au we wakwashile atu ashishika hanga anyingike kanawa Yesu ngwo mwe Mesaya.

7. Uprofeto uka waali unasolola ngwo Yesu mwe Mesaya?

⁷ Tutalenu uprofeto waali. Utangu, miaka 700 kunyima muze Yesu te kanda achisemuka, profeta Mika yamba ngwenyi, Mesaya makasemukina mu mbonge yikehe ya Mbeteleme. (Mika 5:2) Aku kwe Yesu asemukinyine! (Mateu 2:1, 3-9) Wamuchiali, Daniele kambile ngwenyi Mesaya makasoloka ha mwaka 29 M.J. (Daniele 9:25) Uno uli uprofeto waali ha uprofeto unji uze wasolola pundu ngwo Yesu mwe Mesaya alakenyene.—Tala Maliji Akusongo 13.

8, 9. Yika yalingiwile ha upapachiso wa Yesu yize yasolwele ngwo iye mwe Mesaya?

⁸ Yehova kasolwele pundu ngwo Yesu mwe Mesaya. Zambi kalakenyene kuhana Yoano Chipapachisa chimwe chilayi hanga te anyingike Mesaya. Muze ayile kuli Yoano hanga amupapachise mu Lwiji Yordau ha mwaka 29 M.J., Yoano kamwene chilayi chacho. Mbimbiliya yakutulweza yize yalingiwile: “Muze te hamupapachisa, Yesu machitutuka mu meya, kumanyi malilu yazuluka kuli iye, yamona spiritu wa Zambi kanahulumuka ngwe katele, nikwiza hali iye. Liji yilituhuka mu malilu ngwo, Yono mwe Mwanami, ngunamuzange chikolo, muli iye ngunawahilila.” (Mateu 3:16, 17) Muze Yoano amwene ni kwivwa chilaya chacho, yanyingika  ngwenyi, Yesu mwe Mesaya. (Yoano 1:32-34) Ha tangwa liacho, Yesu yapwa Mesaya muze Yehova asele spiritu yenyi hali iye. Iye mwe asakwile kuli Zambi hanga apwe Kasongo nawa Mwanangana.—Izaia 55:4.

⁹ Uprofeto wa Mbimbiliya, maliji ja Yehova mwene, ni chilayi chize ahanyine ha upapachiso wa Yesu yasolwele ngwo Yesu mwe Mesaya. Mba kulihi Yesu  akatukile, nawa te kuchi apwa? Tutalenu yize Mbimbiliya yinambe.

10. Yika Mbimbiliya yakulongesa hakutwala kuli Yesu muze te kanda achiza hano hashi?

¹⁰ Mbimbiliya yakulongesa ngwo Yesu kapwile mu malilu muze te kanda achiza hano hashi. Mika kambile ngwenyi Mesaya “chikota chenyi cha ku miaka, kwe ku miakulwila.” (Mika 5:2) Yesu mwene kambile ha yisuho yinji ngwenyi kapwile mu malilu muze te kanda achiza ni kusemuka hano hashi. (Tanga Yoano 3:13; 6:38, 62; 17:4, 5.) Chipwe muze te kanda achiza hano hashi, Yesu kapwile ni usepa upema ni Yehova.

11. Mumu liaka Yesu apwila mulemu chinji ku meso ja Yehova?

¹¹ Yesu kali mulemu chinji ku meso ja Yehova. Mumu liaka? Mumu Zambi katangile Yesu muze te kanda achitanga yuma yikwo yeswe. Kashika Yesu amuvuluka ngwo “swana wa yuma yeswe atangile.” * (A-Kolosu 1:15) Yehova nawa kakuzanga chinji Yesu mumu Iye mwene mwe wamutangile. Kashika amuvuluka ngwo “Mwanenyi wa wika.” (Yoano 3:16) Yesu wika nawa mwe azachishile kuli Yehova hanga atange yuma yikwo. (A-Kolosu 1:16) Yesu wika nawa mwe avuluka ngwo “Liji,” mumu Yehova kamuzachishile hanga ahane sango ni malongeso kuli angelo ni atu.—Yoano 1:14.

12. Kuchi tunanyingika ngwetu Yesu ni Zambi hi mutu umuwika ko?

¹² Atu amwe kafuliela ngwo Yesu ni Zambi kali mutu umuwika. Alioze Mbimbiliya kuyishi kulongesa chocho.  Mbimbiliya yinambe ngwo Yesu kamutangile, che kwamba ngwo Yesu kali ni uputukilo. Alioze Yehova, mwe watangile yuma yeswe, kashika, keshi ni uputukilo. (Samu 90:2) Ngwe Mwana wa Zambi, Yesu kanda achinyonga kama ngwenyi apwe ngwe Zambi. Mbimbiliya yakulongesa pundu ngwo Tata kali munene kuhiana Mwana. (Tanga Yoano 14:28; 1 A-Korindu 11:3.) Yehova wika mwe “Mukwa-Ndundo-Jeswe.” (Uputukilo 17:1) Iye kali munene ni ndundo jinji kuhiana atu eswe mu chifuchi.—Tala Maliji Akusongo 14.

13. Mumu liaka Mbimbiliya yinambe ngwo Yesu “che kulifwa cha Zambi yoze keshi kumoneka”?

¹³ Yehova ni Mwanenyi, Yesu, kakalakalile hamuwika ha miaka yinji muze te kanda achitanga malilu ni hashi. Ayo kakolesele chinji zango lio hakachi kwo! (Yoano 3:35; 14:31) Yesu kembulwile yitanga ya Tato, kashika Mbimbiliya yakumuvuluka ngwo “che kulifwa cha Zambi yoze keshi kumoneka.”—A-Kolosu 1:15.

14. Kuchi Mwana mulemu wa Yehova ejile ni kusemuka hano hashi?

¹⁴ Mwana mulemu wa Yehova yatayiza kuhichika malilu ni kusemukina hano hashi. Kuchi chino chalingiwile? Yehova yalinga chikomokeso ha kuchiza mwono wa Mwanenyi mu malilu ni kuusa mujimo Maria yoze te kanda achilimona kama ni lunga. Ha chino, Yesu te keshi ni tato wa musunya. Kashika, Maria kasemene mwana mungunu, ni kumuvuluka ngwenyi Yesu.—Luka 1:30-35.

15. Kuchi muhasa kunyingika kanawa Yehova?

¹⁵ Muhasa kulilongesa chinji hakutwala kuli Yesu, mwono wenyi, ni yitanga yenyi ha kutanga mikanda ya mu Mbimbiliya kuputuka ni Mateu, Marku, Luka, ni  Yoano. Mikanda yacho kakuyivuluka ngwo Evangelu. Yize mutangamo muyikukwasa hanga unyingike kanawa Yehova mumu Yesu kali chifwa cha Tato. Kashika Yesu wambile ngwenyi: “Yoze wangumona, hamona mwe Tata.”—Yoano 14:9.

16. Yika Yesu alongesele? Malongeso ja Yesu kuli te akukatuka?

¹⁶ Atu anji kapwile ni kuvuluka Yesu ngwo “Longeshi.” (Yoano 1:38; 13:13) Chuma chilemu chinji chize alongesele chapwile “sango lipema lia Wanangana.” Wanangana wacho uka? Uli unguvulu wa Zambi wa mu malilu uze mukayula hashi heswe, ni kuneha yiwape kuli atu waze akwononokena Zambi. (Mateu 4:23) Yuma yeswe yize Yesu alongesele te ya Yehova. Yesu yamba ngwenyi: ‘Yuma yize nakulongesa hi ni yami ko, alioze ya yoze wangutumine.’ (Yoano 7:16) Yesu kanyingikine ngwenyi Yehova kanazange hanga atu evwe sango lipema lia kwamba ngwo Wanangana wa Zambi muukayula hashi heswe.

17. Kulihi Yesu te akulongesela? Mumu liaka ahondanganyine chinji hanga alongese akwo?

¹⁷ Kulihi Yesu te akulongesela? Kweswako apwile ni kuwana atu. Kapwile ni kulongesa mu yihunda, mu ma mbonge, ha yitanda ni ku mazuwo ja atu. Iye te keshi kushimbwila atu hanga aye kuli iye. Iye mwe te wakuya kuli ayo. (Marku 6:56; Luka 19:5, 6) Yesu kahondanganyine ni kupalikisa mashimbu anji ni tachi jenyi hanga alongese atu. Mumu liaka? Mumu te kananyingika ngwenyi che Zambi azangile hanga iye alinge nawa mumu te kakwononokena Tato mashimbu eswe. (Yoano 8:28, 29) Yesu nawa kambulwile sango lipema mumu te kakwivwila atu keke. (Tanga Mateu 9:35, 36.) Iye te kakumona chize mangana a mayingeleja akuhona kulongesa  atu umwenemwene hakutwala kuli Zambi ni ku Wanangana wenyi. Kashika, kazangile kukwasa atu anji hanga evwe sango lipema.

18. Yitanga yika ya Yesu yize yena wazanga chinji?

¹⁸ Yesu te kakuzanga chinji atu ni kwaafunga. Kapwile chimbovu nawa te mwashi kuhanjika nenyi. Chipwe twanuke no te kakuzanga kukundama kuli iye. (Marku 10:13-16) Yesu te keshi katonde. Iye te keshi kuzanga kalimbalimba ni uhenge. (Mateu 21:12, 13) Ha mashimbu jenyi mapwo te keshi kwavumbika ni kwalemesa. Alioze Yesu kavumbikile mapwo ni kwaalemesa. (Yoano 4:9, 27) Yesu nawa kapwile mukwa-kulikehesa. Chakutalilaho, ha umwe ufuku, yasanyisa molu ja apostolo jenyi, mulimo uze te wapwile wa tupinji.—Yoano 13:2-5, 12-17.

19. Chilweza chika chinasolola ngwo Yesu kanyingikine yuma yize atu te akufupa ni kusolola nawa ngwo kazangile kwaakwasa?

¹⁹ Yesu kanyingikine yuma yize atu te akufupa, mba kazangile kwaakwasa. Yino yasolokele pundu muze akuzachishile ndundo ja Zambi hanga awuke atu. (Mateu 14:14) Chakutalilaho, umwe lunga mukwa-mbumba yakundama kuli iye ni kwamba ngwe: “Nyi mupala, muhasa kungupemesa.” Yesu yevwila lunga wacho keke ha kumona lamba lienyi. Ha chino, iye yazanga kumukwasa. Mba Yesu yolola kwoko lienyi, yakwata lunga wacho, ni kumwamba ngwenyi: “Ngunapale; pwako mupema!” Hazehene mukwa-mbumba yamuwuka! (Marku 1:40-42) Achinyonga kama chiseke chize lunga wacho evwile!

20, 21. Kuchi Yesu ali chilweza chipema cha kwononokena Zambi?

²⁰ Yesu kali chilweza chipema cha kwononokena Zambi. Chipwe ngwe kamumwesene lamba kuli akwa-kole  jenyi nihindu kashishikile kuli Tato. Chakutalilaho, muze amwesekele kuli Satana iye kakavulumwine. (Mateu 4:1-11) Amwe akuli asoko jenyi kakamufulielele ngwo kali Mesaya, alioze ngwo “kanazaluka.” Nihindu, Yesu yanunga ni kulinga mulimo wa Zambi. (Marku 3:21) Muze akwa-kole jenyi te akumuhungumiona, Yesu te kakushishika kuli Zambi nawa te keshi kweseka kwaalinga upi niumwe.—1 Petulu 2:21-23.

²¹ Chipwe muze Yesu te anamono lamba ni yikola ya kufwa, nihindu aye yashishika kuli Yehova. (Tanga A-Fwilipu 2:8.) Achinyonga kama chize anyongonwene ha tanga lize afwile. Yamumbulumuna, yamulamikiza yuma ya mahuza, yamuhisa kuli ngaji a kalimbalimba, yamusa mu zuwo lia ususu, yamuchoka kuli mbunga, yamulamba shikote kuli maswalale ni kumuhata ha mutondo.  Muze te anafu yateta ngwenyi: “Chinamanunuka!” (Yoano 19:30) Ha matangwa atatu muze te Yesu hafwa, Yehova yamuhindwisa nawa yamwaha mujimba wa spiritu. (1 Petulu 3:18) Hakupalika cha jimwe poso, Yesu yafuna mu malilu, ‘yatwama ku kwoko lia chindume lia Zambi’ ni kutwaminyina hanga amupwise Mwanangana.—A-Hepreu 10:12, 13.

22. Amu Yesu ashishikile kuli Tato, kutalatala chika tuli nacho haliapwila?

²² Tuli ni kutalatala cha mwono wa mutolo mu paraisu kulita ni upale wa Yehova, mumu Yesu kashishikile kuli Tato. Mu kapitulu yoze masulaho, mutulilongesa chize kufwa cha Yesu chinatwehe kutalatala cha mwono wa mutolo.