1-3. Yihula yika atu akuhula hakutwala ku kufwa, nawa makumbululo aka akuhana amwe mayingeleja?

MBIMBILIYA yinatulakenya ngwo limwe tangwa “kufwa kuchichi kapwako nawa.” (Usolwelo 21:4) Mu Kapitulu 5 twalilongesa ngwo mutuhasa kupwa ni mwono wa mutolo ha mukunda wa ukuule. Alioze nihindu atu machifwa. (Chilumbununyi 9:5) Kashika, chihula chinene mutulihula chino, ‘Yika yakulingiwa kuli mutu nyi hafwa?’

² Kumbululo lia chihula chino likwete ulemu unji, kanji-kanji muze mutufwisa mutu yoze twazanga. Mutuhasa kulihula ngwetu: ‘Kulihi kevwe aya? Shina kanatumono? Kutala mahasa kutukwasa? Mutukeza kamumona kama limwe tangwa?’

³ Mayingeleja anji kakuhana makumbululo eka ni eka ha yihula yino. Amwe kakulongesa ngwo, nyi ena uli mutu mupema, mukaya mu malilu, alioze nyi uli mutu mupi, mukawema mu kahia. Akwo ngwo, mutu nyi hafwa kakwalumuka spiritu hanga alichinge ni tulamba twenyi waze hanafu. Eka nawa ngwo, mutu nyi hafwa kakumusopesa, masemuka cheka, hanji mahinduka ngwe mutu mweka hanji kashitu.

4. Nyonga lika limuwika mayingeleja akulongesa?

⁴ Mayingeleja kakusoloka ngwe kakulongesa yuma yeka ni yeka. Alioze eswe kakulongesa nyonga limuwika. Ayo kakulongesa ngwo mutu kakwete chimwe chuma chize chakusala ni mwono nyi hafwa. Shina nyonga lino lili liamwenemwene?

5, 6. Yika yakulingiwa kuli mutu nyi hafwa?

⁵ Yehova kananyingika yize yakulingiwa kuli mutu nyi hafwa, nawa hanatulweze ngwenyi, nyi mutu hafwa, mwono wenyi wasula. Kufwa chinalumbunuka kuhona mwono. Kashika nyi mutu mafwa, wongo ni manyonga jenyi kuyishi kununga ni mwono ku chimwe chihela. * Nyi twafwa kutuchi kuhasa kutala, kwivwa hanji kunyonga chuma nichimwe.

⁶ Mwanangana Solomone kasonekene ngwenyi: ‘Afu kanyingikine nichimwe. Afu keshi kuzanga hanji kwivwa kole, nawa ngwo ‘muma wa afu kumushi milimo, manyonga, chinyingi, hanji mana.’ (Tanga Chilumbununyi 9:5, 6, 10.) Nawa Mbimbiliya yinatulweza mu Samu 146:4 ngwo, nyi mutu mafwa, ni “manyonga jenyi” kakufwa.

7. Yika Yesu ambile hakutwala ku kufwa?

⁷ Muze Lazaru sepa lia Yesu afwile, Yesu yalweza tumbaji twenyi ngwenyi: ‘Kasendo ketu Lazaru haya mu tulo.’ Alioze Yesu te keshi ni kwamba ngwenyi, Lazaru kanahwimi. Iye te kanambe ngwenyi: “Lazaru hafwa.” (Yoano 11:11-14) Hano, Yesu te kanatese kufwa ngwe tulo. Iye kakambile ngwenyi, Lazaru kapwile mu malilu hanji hamwe ni tulamba twenyi waze te hanafu. Kakambile nawa ngwenyi, Lazaru te kanamono lamba mu chitende cha kahia hanji ngwenyi, kasemuka cheka chipwe ngwenyi kalumuka kashitu. Ka, Lazaru kapwile ngwe kali mu tulo anji. Yisoneko yikwo yakutesa kufwa ngwe tulo. Mbimbiliya yinambe ngwo, muze Eshetevau afwile “wayile tulo.”  (Yilinga 7:60) Postolo Paulu neye kasonekene ngwenyi amwe akwa-Kristu ‘kapombele mu ufwe.’—1 A-Korindu 15:6.

8. Kuchi tunanyingika ngwetu, Zambi kakatutangile hanga tupwe ni kufwa?

⁸ Shina Zambi katangile Alama ni Eva hanga afwe? Ka! Yehova kaatangile hanga atwame hashi ku miaka yeswe ni mwono ungunu. Yehova katangile atu ni nyonga lia kutwama ku miaka yeswe. (Chilumbununyi 3:11) Yisemi keshi kuzanga kumona ana jo mashinakajiwa ni kufwa, ni Yehova neye che akwivwa hali yetu. Nyi Zambi katutangile hanga tutwame ku miaka yeswe, mba mumu liaka twakufwa?

9. Mumu liaka shimbi yize Yehova ahanyine kuli Alama ni Eva te hi yikalu ko?

⁹ Mu munda wa Endene, Yehova kambile kuli Alama ngwenyi: “Ku mitondo yeswe ya mu munda muhasa kulia cheswacho. Alioze ku mutondo wa chinyingi cha chipema ni chipi, kanda uliako, mumu ha tangwa muoliako kumukafwa lume.” (Uputukilo 2:16, 17) Shimbi yacho te hi yikalu ko kuyikaula, nawa Yehova kapwile ni ulite wa kulweza Alama ni Eva yipi ni yipema. Nyi te mwononokena Yehova, ayo kachi kasolwele ngwo kanavumbika chiyulo chenyi. Nawa te masolola uwahililo wo ha yuma yeswe yize ahele.

10, 11. (a) Kuchi Satana apiangwile Alama ni Eva? (b) Mumu liaka Alama ni Eva kakapwile ni haze maliongela ha yize alingile?

¹⁰ Alioze, Alama ni Eva kasakwile kwehuka Yehova. Satana kambile kuli Eva ngwenyi: “Kuma, Zambi hanambe ngwenyi, Kanda nukalia ku mitondo yeswe ya mu munda nyi?” Eva yakumbulula ngwenyi: “Ku mitondo yeswe ya mu munda tunahase kulia. Alioze ku mihuko ya mutondo uze uli mukachi ka munda, Zambi hanambe ngwenyi, Kanda nuyilia, chipwe kukwatako, kuchina munufwa.”—Uputukilo 3:1-3.

¹¹ Satana yamba ngwenyi: “Kufwa kunuchi kufwa. Mumu Zambi kananyingika ngwenyi, Ha tangwa lize munuliako meso jenu malaula, munupwa ngwe Zambi, nikunyingika chipema ni chipi.” (Uputukilo 3:4-6) Satana kazangile hanga Eva anyonge ngwe aye mahasa kusakula mwene chipema ni chipi. Ha shimbu lizeliene, Satana yalionga hakutwala ku yize te muyilingiwa nyi Eva te mehuka shimbi ya Zambi. Satana yamba ngwenyi, Eva te kechi kufwa, mba Eva yalia muhuko ni kuhanako mukwo-lunga neye yalia. Alama ni Eva kanyingikine ngwo Yehova  te hanaalweza ngwenyi, katambile kulia mihuko yacho. Muze o aulile, yehuka shimbi yipema nawa yashi yize Zambi ahele. Yino yasolwele ngwo keshi kuvumbika Tato wa mu malilu. Te keshi ni haze maliongela ha yize alingile!

12. Mumu liaka chili chinyengo muze Alama ni Eva ehukile shimbi ya Yehova?

¹² Yisemi jetu atangu kahonene vumbi kuli Sakatanga wo ni kumuvwisa chinyengo! Kuchi muwivwa nyi wakulela mwana wa lunga ni wa pwo ni zango lieswe, alioze kulutwe lia matangwa makuhona vumbi ni kulimika ne? Chino kota muchikunehena yinyengo yinji mu mbunge ni ngwami?

13. Maliji waze Yehova ambile ngwenyi, “ku fufuta mukahilukila” yika analumbunuka?

¹³ Muze Alama ni Eva ehukile shimbi ya Zambi o yatokesa uhashi wa kutwama ni mwono wa mutolo. Yehova kambile kuli Alama ngwenyi: “Uli fufuta, ndo ku fufuta mukahilukila.” (Tanga Uputukilo 3:19.) Chinalumbunuka ngwo, Alama te mapwa mavu, ngwe chize apwile muze te kanda achimutanga. (Uputukilo 2:7) Muze Alama avulumwine, yafwa hi te kechi kupwako nawa.

14. Mumu liaka twakufwa?

¹⁴ Nyi Alama ni Eva kononokene kuli Zambi kachi te ni musono kwali. Alioze muze ayo avulumwine kuli Zambi, yafwa. Shili yacho yili ngwe yimwe yikola yipi  yize twahingile kuli yisemi jetu atangu. Yetweswe twakusemuka ni shili, kashika twakufwa. (A-Roma 5:12) Alioze lino te hi nyonga lia Zambi ko. Zambi kakazangile hanga atu afwe, kashika Mbimbiliya yinavuluka kufwa ngwo “mukwa-kole.”—A-Korindu 15:26.

15. Kuchi umwenemwene hakutwala ku kufwa wakututusula?

¹⁵ Umwenemwene hakutwala ku kufwa wakututusula ku manyonga api. Mbimbiliya yakulongesa ngwo afu keshi kwivwa yikola hanji yinyengo. Kutuchi kuhasa kuhanjika no chipwe ayo kuhanjika ni yetu. Yetu kutuchi kuhasa kwaakwasa, nawa ayo kechi kuhasa kutukwasa. Afu kechi kuhasa kutulinga upi, kashika kutwatambile kwevwila woma. Alioze, mayingeleja anji kakwamba ngwo, afu kali ni mwono ku chimwe chihela nawa ngwo mutuhasa kwaakwasa, nyi twafweta mbongo kuli mangana hanji miata a mayingeleja. Alioze nyi twanyingika umwenemwene hakutwala ku kufwa, kechi kutwonga nawa.

16. Malongeso aka a mahuza hakutwala kuli afu waze mayingeja akulongesa?

¹⁶ Satana kakuzachisa uwayilo wa mahuza hanga atulingise tunyonge ngwetu afu kali ni mwono. Chakutalilaho, amwe mangana a mayingeleja kakulongesa ngwo, nyi mutu hafwa chimwe chihanda cha ku mujimba wenyi chakununga ni mwono ku chimwe chihela. Shina yingeleja ye che akulongesa, nyi hanji yakulongesa yize Mbimbiliya yakwamba hakutwala kuli afu? Satana kakuzachisa mahuza hanga apiangule atu kuli Yehova.

17. Mumu liaka longeso lia kwocha atu mu kahia kulishi kulemesa Yehova?

¹⁷ Yuma yinji yize mayingeleja akulongesa yili yipi chinji. Chakutalilaho, amwe kakulongesa ngwo atu api makawema mu kahia ka mutulo.  Longeso liacho lia mahuza kulishi kulemesa Yehova. Iye kechi keza kamwesa atu lamba lia mutapu au! (Tanga 1 Yoano 4:8.) Kuchi muwivwa nyi umwe chisemi ha kufumba mwanenyi, mocha moko jenyi ha kahia? Ena munyonga ngwe chisemi wacho kali ni mbunge yipi. Nawa kuchi kuzanga kumunyingika. Yino ye Satana anazange hanga tunyonge hali Yehova!

18. Mumu liaka kutwatambile kwivwila afu woma?

¹⁸ Amwe mayingeleja kakulongesa ngwo muze atu akufwa, kakwalumuka spiritu. Mayingeleja jacho kakulongesa ngwo twatamba kuvumbika ni kwivwila woma ma spiritu jacho mumu ngwo mahasa kupwa masepa apema hanji akwa-kole. Atu anji kakufuliela mahuza jacho. Ayo kakwivwila woma afu, kashika akuwayila afu kuhiana Yehova. Twiwulukenu ngwetu afu kechi kuhasa kwivwa nichimwe, kashika kutwatambile kwevwila woma. Yehova kali Sakatanga wetu. Iye kali Zambi wamwenemwene, kashika twatamba kuwayila wika iye.—Usolwelo 4:11.

19. Kuchi kunyingika umwenemwene hakutwala ku kufwa chakutukwasa?

¹⁹ Nyi twanyingika umwenemwene hakutwala ku kufwa, twakutusuka ku malongeso a mahuza a mayingeleja. Nawa umwenemwene uno wakutukwasa kunyingika yilakenyo yipema yize Yehova hanalakenya hakutwala ku mwono wetu kulutwe lia matangwa.

20. Yika mutulilongesa mu kapitulu yoze masulaho?

²⁰ Kushakulu, kavumbi ka Zambi yoze te avuluka ngwo Yombi, kahulile ngwenyi: “Nyi mutu mafwa matwama nawa ni mwono?” (Yombi 14:14) Kutala mutu yoze hanafu mahasa kuhinduka cheka? Kumbululo lize Zambi anatwehe mu Mbimbiliya lili lipema chinji. Mutulilongesa lio mu kapitulu yoze masulaho.