YIWANYINO ya matangwa akunanga yize atu anji akuwahilila musono, kuyishi kukatuka mu Mbimbiliya. Kulihi mba yiwanyino yacho yakatukile? Nyi muya mu umwe utulikilo wa mikanda muwana mikanda yinji yize yinahanjika hakutwala ku yiwanyino ya matangwa akunanga yize atu anji akulinga musono. Tutalenu yimwe yilweza.

Chizomboka. Mukanda Encyclopædia Britannica unambe ngwo mu Usendo Waha mushi ushindakenyo uze unasolola kuwahilila cha chizomboka. Kuchi chiwanyino cha Chizomboka chaputukile? Chaputukile kuli atu waze te keshi kuwayila Yehova. Chipwe ngwe kakwamba ngwo kanewuluka uhindukilo wa Yesu, alioze ndako jize jakusoloka ha mashimbu a Chizomboka hi ja akwa-Kristu ko. Chakutalilaho, hakutwala ku “Mbalu wa Chizomboka” Encyclopædia Britannica yinambe ngwo: “Mbalu kali chilayi cha atu waze keshi kuwayila Yehova nawa chilayi cha kukola cha mbuto.

Yiwanyino ya Mwaka Waha. Tangwa ni ndako ja yiwanyino yacho ya Mwaka Waha yalisa nikulita ni yifuchi. Hakutwala ku uputukilo wa chiwanyino chacho, Enciclopédia World Book, yinambe ngwo: “Nguvulu wa A-Roma Júlio César kasele tangwa 1 lia kakweji wa Janeiro ngwe tangwa lia Mwaka Waha, ha 46 M.J. A-Roma te kakuwahilila tangwa liacho hanga ahalise Jano, zambi wa yajilo, ni yikolo ni uputukilo. Kakweji wa Janeiro kwe kuneza jina Jano, zambi wa mahuma aali—likwo kulutwe likwo kunyima.” Kashika, Yiwanyino ya Mwaka Waha yinakatuka ku ndako ja waze te keshi kuwayila Yehova.

Halloween (Tangwa lia Akwa Wanga). Enciclopédia Americana yinambe ngwo: “Ndako ja Tangwa lia Akwa Wanga jinakatuka ku chiwanyino cha Druida (asasendote ashakulu a celta) muze Yesu te kanda achisemuka. Celta te kakulinga yiwanyino hanga ahalise tuzambi two aali anene—zambi wa mwalwa ni zambi wa afu waze te akulingila chiwanyino ha tangwa 1 lia kakweji wa Novembro, ha kuputuka cha Mwaka Waha wa celta. Chiwanyino chacho chakuhalisa afu, kulutwe lia matangwa hi yachisa mu ndako ja akwa-Kristu.”

Yiwanyino Yikwo. Tuchikuhasa kulumbununa yiwanyino yeswe yize akulinga hano hashi. Alioze, yiwanyino yize yakuhalisa atu hanji ululikiso wa atu keshi kuyitayiza kuli Yehova. (Jeremia 17:5-7; Yilinga 10:25, 26) Mba unyingike nyi yiwanyino ya ulembelo yakuwahilila Zambi chatamba kunyingika kanawa uputukilo wayo. (Izaia 52:11; Usolwelo 18:4) Shimbi ja Mbimbiliya jize jili ha Kapitulu 16 mu mukanda uno mujikukwasa hanga unyingike chize Zambi akunyonga hakutwala ku yiwanyino yize atu akulinga.