1. Mumu liaka Ka-Etiopia, chilolo cha Kandase, echile hanga amupapachise?

 “MEYA wawa; Mba chika chinangukwika kutambula upapachiso?” Chihula chino kachihulile kuli umwe Ka-Etiopia, chilolo cha Kandase kusekulu yitangu. Mukwa-Kristu yoze te akuvuluka ngwo Fwilipe yamulumbunwina ngwenyi Yesu mwe Mesaya yoze alakenyene. Maliji a mu Yisoneko  waze Ka-Etiopia amulongesele kamukwachili ku mbunge, mba yalinga nikulita ni yize alilongesele. Iye yasolola ngwo te kanazange amupapachise!—Yilinga 8:26-36.

2. Mumu liaka watamba kunyonga chinji ha upapachiso?

² Nyi hiwalilongesa kanawa tupitulu atangu a mukanda uno ni umwe chela cha Yehova, yena muhasa kulihula ngwo: ‘Chika chinangukwika kutambula upapachiso?’ Hiwalilongesa mu Mbimbiliya chilakenyo cha mwono wa mutolo mu Paraisu. (Luka 23:43; Usolwelo 21:3, 4) Hiwalilongesa nawa chize afu apwa, ni kutalatala cha uhindukilo. (Chilumbununyi 9:5; Yoano 5:28, 29) Kota hiwaputuka kukunguluka ni Yela ja Yehova, nawa hiwamona ngwo ayo kali mu uwayilo wamwenemwene. (Yoano 13:35) Chuma chilemu chinji nawa, hiwaputuka kupwa ni usepa upema ni Yehova Zambi.

3. (a) Shimbi yika Yesu ahanyine kuli tumbaji twenyi? (b) Kuchi upapachiso wa mu meya akuulinga?

³ Kuchi muhasa kusolola ngwo yena unazange kuwayila Zambi? Yesu kambile kuli tumbaji twenyi ngwenyi: ‘Yeenu . . . nukatayise tumbaji a ku mavungu eswe, nikuapapachisa.’ (Mateu 28:19) Yesu kahichikile chilweza hakumupapachisa mu meya. Kakamuhinjilile meya mu mujimba hanji ha mutwe. (Mateu 3:16) Liji “upapachiso” linakatuka mu limi lia ngregu lize linalumbunuka “kunjisa mu meya.” Kashika, upapachiso wa akwa-Kristu unalumbunuka kunjisa mutu mu meya.

4. Yika upapachiso wa mu meya wakusolola?

⁴ Upapachiso wa mu meya uli chuma chilemu chize atamba kukaula waze eswe anazange kupwa ni usepa upema ni Yehova Zambi. Upapachiso wakusolola kuli mbunga zango lie lia kuwayila Zambi. Wakusolola nawa ngwo yena uli ni chiseke chakulinga upale wa Yehova. (Samu 40:7, 8) Nyi mufupa akupapachise, watamba kulinga yuma yize yafupiwa.

5. (a) Chuma chika chitangu watamba kulinga mba akupapachise? (b) Mumu liaka kukunguluka ni akwa-Kristu chili chilemu?

⁵ Yena hiwaputuka kulinga chuma chitangu. Chuma chika? Kulilongesa chinyingi cha Yehova Zambi ni Yesu Kristu, kupalikila mu longeso lia Mbimbiliya. (Tanga Yoano 17:3.) Alioze kuli nawa yuma yinji yize mulilongesa. Akwa-Kristu kakuzanga ‘kuzala too ni yinyingi’ ya upale wa Zambi. (A-Kolosu 1:9) Kukunguluka ni Yela ja Yehova muchikukwasa chinji hakutwala ku chikuma chino. Chili chilemu kuyaya ku kukunguluka chacho. (A-Hepreu 10:24, 25) Kukunguluka mashimbu eswe muchikukwasa kunyingika kanawa Zambi.

6. Shina watamba kunyingika yuma yeswe ya mu Mbimbiliya mba akupapachise nyi?

⁶ Alioze, kuwatambile kunyingika yuma yeswe ya mu Mbimbiliya mba akupapachise. Ka-Etiopia, chilolo cha Kandase, kapwile ni chimwe chinyingi, alioze kafupiwile ukwaso hanga anyingike ulumbunwiso wa yimwe Yisoneko. (Yilinga 8:30, 31) Ni yena nawa, kuchili yuma yinji yize mulilongesa. Chochene, kuchikuhasa kulilongesa yuma yeswe hakutwala kuli Zambi. (Chilumbununyi 3:11) Shimbu kanda achikupapachisa, watamba kunyingika kanawa ni kutayiza malongeso alemu a mu Mbimbiliya. (A-Hepreu 5:12) Malongeso jacho kali umwenemwene hakutwala ku kupwa cha afu ni ulemu wa jina lia Zambi ni Wanangana wenyi.

7. Kuchi longeso lia Mbimbiliya mulikukwasa?

⁷ Kuwatambile kupwa wika ni yinyingi, mumu ‘mutu keshi kuhasa kupemena kuli Zambi nyi keshi ni ufulielo.’ (A-Hepreu 11:6) Mbimbiliya yinatulweze ngwo muze amwe atu a mu mbonge yikulu ya Korindu evwile sango lipema kuli akwa-Kristu, ayo “afulielele, yaapapachisa.” (Yilinga 18:8) Ni musono nawa, kupwa ni longeso lia Mbimbiliya muchikukwasa kufuliela ngwe Mbimbiliya yili yakuhwima  kuli Zambi. Longeso lia Mbimbiliya mulikukwasa nawa kupwa ni ufulielo ha yilakenyo ya Zambi ni ha ukuule wa Yesu.—Yoshua 23:14; Yilinga 4:12; 2 Timoteu 3:16, 17.

8. Yika muyikukwasa kwambujola kuli akwenu yuma yize unalilongesa?

⁸ Muze ufulielo we muwoka, kuchikuhasa kuswekela akwenu yuma yize unalilongesa. (Jeremia 20:9) Mwopwa ni zango linji lia kwambujola kuli akwenu hakutwala kuli Zambi ni upale wenyi.—Tanga 2 A-Korindu 4:13.

9, 10. (a) Kuli aya yena muhasa kuputuka kwambujola umwenemwene wa mu Mbimbiliya? (b) Yika watamba kulinga nyi unazange kwambujola sango lipema hamuwika ni Yela ja Yehova?

⁹ Muputuka kwambujola umwenemwene wa mu Mbimbiliya ni vumbi lieswe kuli asoko je, masepa je, enyembo je ni kuli waze wakalakala no. Ha kupalika cha matangwa, hanji muzanga kuya ni kwambujola hamuwika ni Yela ja Yehova. Nyi wapwa ni nyonga liacho, hanjika ni chela cha Yehova yoze wakulilongesa nenyi Mbimbiliya. Nyi mamona ngwo hiwapwaho kuya nikwambujola hamwe ni Yela ja Yehova, makalulieka hanga makulwana aali a mu chikungulwila akaliwane ni yena ni longeshi we.

¹⁰ Chino muchikukwasa kunyingika kanawa amwe makulwana a mu chikungulwila, waze akufunga mapanga ja Zambi. (Yilinga 20:28; 1 Petulu 5:2, 3) Nyi makulwana mamona ngwo unanyingika malongeso alemu a mu Mbimbiliya ni kwaatayiza, ni kukaula shimbi ja Zambi, nawa ni unazange pundu kupwa Chela cha Yehova, ayo makulweza ngwo hiwapwaho kwambujola ku mbunga ngwe mukwa-kwambujola yoze kanda achipapachisa.

11. Yika watamba kwecha mba wambujole sango lipema ni Yela ja Yehova?

¹¹ Hanji makulwana mahasa kumona ngwo watamba  kwecha ndako jimwe jize uchili najo mba wambujole sango lipema ni Yela ja Yehova. Ndako jacho mujihasa kupwa yitanga yipi yize wakulinga kutenga. Kashika muze muwita hanga upwe mukwa-kwambujola yoze kanda achipapachisa watamba kwehuka utanji, uzengi ni kunwa makanya ni yuma yikwo yipi.—Tanga 1 A-Korindu 6:9, 10; A-Ngalashia 5:19-21.

12. Mumu liaka kulikonyeka chili chilemu?

¹² Kuli yuma yikwo yize watamba kulinga shimbu kanda akupapachisa. Postolo Petulu yamba ngwenyi: “Likonyekenu, nwalumuke, milonga yenu yikajimuke.” (Yilinga 3:19) Kulikonyeka chinalumbunuka kwivwa chinyengo ha chuma chize walinga. Kulikonyeka chili chilemu kuli yoze wakulinga yuma ya luchisa, ni yoze te keshi kulinga yuma ya luchisa. Mumu liaka? Mumu tulieswe akwa-shili waze afupiwa ukonekeno wa Zambi. (A-Roma 3:23; 5:12) Muze te kanda uchililongesa Mbimbiliya, kuwanyingikine upale wa Zambi. Mba kuchi te muhasa kutwama nikulita ni upale wenyi? Kashika kulikonyeka chili chilemu.

13. Kwalumuka yika chinalumbunuka?

¹³ Mutu yoze walikonyeka katamba nawa ‘kwalumuka.’ Kuwatambile kwivwa wika chinyengo ha yuma yize te wakulinga. Alioze, watamba nawa kwecha yitanga yeswe yikulu ni kupwa ni hamu lia kununga ni kulinga yuma yipema. Kulikonyeka ni kwalumuka yili yuma yize mutu atamba kulinga chitangu mba amupapachise.

14. Chuma chika chilemu chize watamba kulinga shimbu kanda achikupapachisa?

¹⁴ Kuli nawa chuma chikwo chilemu chize watamba kulinga mba akupapachise. Watamba kulihana yena mwene kuli Yehova Zambi.

15, 16. Kulihana kuli Zambi yika chalumbunuka, nawa yika yakulingisa mutu hanga alinge chocho?

 ¹⁵ Nyi mulemba hanga ulihane kuli Yehova Zambi, unamulakenya ngwe muwayila wika iye matangwa eswe ku mwono we. (Shimbi Yamuchiali 6:15) Mumu liaka chatamba mutu kulihana kuli Zambi? Achinyonga nyi umwe lunga kanazange kunyingika umwe pwo hanga amumbate. Muze manyingika kanawa yitanga yenyi yipema, muchipwa chashi iye kuzanga pwo wacho. Ha kupalika cha matangwa, mahasa kumwita hanga amumbate. Tunanyingika ngwetu kulimbata chikwete milimo yinji. Alioze zango lie mulimulingisa hanga ambate pwo wacho.

¹⁶ Muze munyingika kanawa Yehova ni kumuzanga chinji, mumuwayila matangwa eswe ni mbunge ye yeswe. Mweswawo mazanga kukaula Mwana wa Zambi, Yesu Kristu, katamba “kulituna liakulu iye mwene.” (Marku 8:34) Twakulituna yetwene hakumbila usolo ni manyonga jetu waze mahasa kutukinda kwononokena Zambi ni mbunge yetu yeswe. Kashika shimbu kanda achikupapachisa, chuma chitangu watamba kusa kulutwe ku mwono we chili kulinga upale wa Yehova Zambi.—Tanga 1 Petulu 4:2.

17. Mumu liaka amwe akwivwa woma wa kulihana kuli Zambi?

¹⁷ Amwe keshi kulihana kuli Yehova mumu woma akwivwa wa kulinga chino chuma chilemu. Kakwivwa woma ngwo hanji Zambi makaasopesa nyi mapwa akwa-Kristu waze alihana. Kakuchina kulihana kuli Yehova hakunyonga ngwo maakamuvwisa yinyengo mumu kechi kahasa kumuwayila.

18. Yika muyikukwasa mba ulihane kuli Yehova?

¹⁸ Nyi muzanga chinji Yehova, mulihana kuli iye ni kulinga yize yinalite ni kulihana che. (Chilumbununyi 5:4) Muze hiwalihana, muzanga kwenda “ngwe chinatela  Mwene mu upemeno weswe.” (A-Kolosu 1:10) Nyi wazanga chinji Zambi, kuchi kunyonga ngwe kulinga upale wenyi chili chikalu. Mutayiza maliji a postolo Yoano waze asonekene ngwenyi: “Lino lie zango lia Zambi ngwo, Tukafunge shimbi jenyi. Shimbi jenyi hi jikalu ko.”—1 Yoano 5:3.

19. Mumu liaka kuwatambile kwivwa woma wa kulihana kuli Zambi?

¹⁹ Kuwatambile kupwa mutu yoze keshi uhenge mba ulihane kuli Zambi. Yehova kanyingika kanawa chize wapwa nawa keshi kushimbwila hanga ulinge yize kuchikuhasa. (Samu 103:14) Iye kanazange hanga uyuke, nawa makutakamisa ni kukukwasa. (Tanga Izaia 41:10.) Muhasa kupwa  ni ushindakenyo ngwe nyi wafuliela muli Yehova ni mbunge ye yeswe, “makalulamisa majila je.”—Yishima 3:5, 6.

20. Mumu liaka watamba kusolola ku mbunga ngwenyi unalihana kuli Yehova?

²⁰ Kunyonga ha yuma yize twalilongesa muchikukwasa kulihana kuli Yehova ha kulemba. Mweswawo wazanga  Zambi katamba nawa kusolola ku mbunga ngwenyi, ‘kanatayiza hanga akatambule ulamwino.’ (A-Roma 10:10) Kuchi muhasa kulinga chocho?

21, 22. Kuchi muhasa ‘kulitayijila’ yena mwene ufulielo we ku mbunga?

²¹ Nyi unazange akupapachise, lweza kasongwelo wa chizavu cha makulwana a mu chikungulwila che. Iye makasakula makulwana waze mahituluka ni yena mu yihula yimwe ya malongeso alemu a mu Mbimbiliya. Nyi makulwana mamona ngwo watela kukupapachisa, ayo makulweza ngwo makakupapachisa ha kukunguluka muchizaho. a Ha mashimbu a upapachiso hakupwa pande jize jakuhitulula ulumbunwiso wa upapachiso. Mukwa-kuhanjika pande kakwita waze mapapachisa akumbulule ni liji linene yihula yaali, ‘alitayijile’ ene ufulielo wo ku mbunga.

²² Upapachiso we wakusolola ngwo mutu kalihana kuli Zambi nawa ngwo hapwa Chela cha Yehova. Hakupapachisa mutu, mujimba wenyi weswe kakuunjisa mu meya hanga asolole ku mbunga ngwo kalihana kuli Yehova.

23. Kupapachisa mutu “mu jina lia Tata, ni lia Mwana, ni lia Spiritu Musandu” yika chinalumbunuka?

²³ Yesu kambile ngwenyi tumbaji twenyi katamba kwaapapachisa “mu jina lia Tata, ni lia Mwana, ni lia Spiritu Musandu.” (Mateu 28:19) Achi chinalumbunuka ngwo mutu yoze maapapachisa kanatayiza wata wa Yehova Zambi ni wa Yesu Kristu. (Samu 83:18; Mateu 28:18) Kananyingika nawa chize yakuzata spritu yisandu ya Zambi, chipwe ngwetu, tachi jenyi.—A-Ngalashia 5:22, 23; 2 Petulu 1:21.

24, 25. (a) Yika upapachiso unalumbunuka? (b) Chihula chika chatela kumbululo?

²⁴ Upapachiso hi kunjisa wika mutu mu meya ko. Unalumbunuka chuma chilemu chinji. Kukunjisa mu meya chinalumbunuka ngwo wafwa ku yitanga ye yikulu. Kukututwisa mu meya chinalumbunuka ngwo haliapwila mutwama kulita ni upale wa Zambi. Iwuluka nawa ngwe, ena walihana kuli Yehova Zambi, hi ku mulimo, hanji kuli mutu, chipwe ku umwe ululikiso ko. Kulihana che ni upapachiso yili uputukilo wa usepa we ni Zambi—usepa uze upema chinji.—Samu 25:14.

²⁵ Upapachiso hi ulamwino ko. Postolo Paulu yasoneka ngwenyi: “Manununenu ulamwino wa yenwene ni woma ni kuchikima.” (A-Fwilipu 2:12) Upapachiso uli wika uputukilo.Muhasa kulihula ngwe, Kuchi munguhasa kulifunga mu zango lia Zambi? Kapitulu yoze masulaho makumbulula chihula chino.