1-3. Mukwa-kole muka yoze unatukaula, nawa mumu liaka mutuwahilila ha kunyingika yize Mbimbiliya yakulongesa?

 ACHINYONGA ngwe unachina umwe mukwa-kole mupi. Iye kali ni tachi jinji ni fuji jinji kuhiana yena. Unanyingika nawa ngwe iye keshi keke, mumu hiunamumono chize ashihile masepa je. Muze mweseka kumuchina, nihindu iye kanambe kukukwata. Hi mumona ngwe kwahwa mangukwata. Susumuku, mukusoloka umwe chilamwina. Iye kali ni tachi jinji kuhiana mukwa-kole ye, nawa makulakenya kukukwasa. Muwahilila chinji mu mbunge, nyi ngwami?

² Chochene, yena kanakukaula kuli umwe mukwa-kole. Tulieswe kanatukaula. Ngwe chize twalilongesa mu kapitulu yoze twahichika, Mbimbiliya yinavuluka kufwa ngwo, mukwa-kole. Niumwe mahasa kumuchina wakuhi. Tulieswe twakumona chize au mukwa-kole akushiha atu waze twazanga. Alioze Yehova kali ni ndundo jinji kuhiana au mukwa-kole, kufwa. Kali Chilamwina chetu wa zango, yoze hanasolola ngwo mahasa kunongesa mukwa-kole wacho. Nawa kanalakenya pundu kumunongesa. Mbimbiliya yakulongesa ngwo: ‘Mukwa-kole wa kusula makajimisa kali kufwa.’ (1 A-Korindu 15:26) Yono kali lusango mupema!

 ³ Tutalenu chize twakwivwa ni mutu yoze twazanga hafwa. Achi muchitukwasa kunyingika chilakenyo chize muchitwaha chiseke. Ewa, Yehova hanalakenya ngwenyi makahindwisa afu. (Izaia 26:19) Afu makaahindwisa. Achi che chilakenyo cha uhindukilo.

4. (a) Chinyengo chize evwile Yesu ha kufwa cha mutu yoze azangile chinji yika chatulongesa hakutwala kuli Yehova? (b) Usepa uka ulemu uze Yesu apwile nawo?

⁴ Hi unafwisa kama mutu yoze te wazanga chinji nyi? Muhasa kwivwa yikola ni chinyengo ku mbunge. Ha mashimbu jacho, twatamba kufupa utakamiso wa Liji lia Zambi. (Tanga 2 A-Korindu 1:3, 4.) Mbimbiliya yakutukwasa kunyingika chize Yehova ni Yesu akwivwa hakutwala ku kufwa. Yesu, yoze wembulwile yitanga ya Tato, kanyingikine yinyengo yize twakwivwa nyi twafwisa mutu yoze twazanga chinji. (Yoano 14:9) Muze apwile mu Yerusaleme, Yesu te kakumeneka Lazaru ni mandumbu jenyi, Maria ni Marta, waze te atwama mu mbonge ya Mbetaniya. Ayo kapwile masepa jenyi. Mbimbiliya yinambe ngwo: “Yesu wazangile Marta, ni mwanakwo, ni Lazaru.” (Yoano 11:5) Alioze, ngwe chize twalilongesa mu kapitulu yoze twahichika, Lazaru yafwa.

5, 6. (a) Kuchi Yesu evwile muze apwile hamuwika ni asoko ni masepa ja Lazaru waze te analili? (b) Mumu liaka chinyengo cha Yesu chakutukolweza?

⁵ Kuchi Yesu evwile ha kufwa cha sepa lienyi Lazaru? Mbimbiliya yinambe ngwo, Yesu yaya ni kumeneka asoko ni masepa ja Lazaru, waze te analili kufwa chenyi. Muze Yesu waamwene iye yanenganyana chinji. “Watwile mikuma mu spiritu, nikulipikala.” Mbimbiliya yinambe ngwo hohene, “Yesu walilile.” (Yoano 11:33, 35) Shina Yesu kalilile mumu te keshi ni kutalatala nyi? Ka. Yesu te kananyingika ngwenyi malinga chimwe chikomokeso chilemu. (Yoano 11:3, 4) Chipwe chocho, iye kevwile yikola ni chinyengo yize yakwiza ha kufwa.

 ⁶ Ewa, chinyengo chize evwile Yesu chakutukolweza. Chakutulongesa ngwo iye ni Tato, Yehova, kufwa kakuchivwila kole. Alioze Yehova kali ni ndundo ja kukumba mukwa-kole wacho! Tutalenu yize Yesu alingile mu tachi ja Zambi.

7, 8. Mumu liaka chasolokele kuli atu ngwe Lazaru kechi kuhasa kuhinduka nawa, alioze yika Yesu alingile?

⁷ Lazaru kamufunjile mu chivwenge cha liwe, alioze Yesu yeta hanga achize liwe lize aseleko. Marta yahamika mumu te hi kwapalika matangwa awana, mumu mujimba wa Lazaru te hiwaputuka kupola. (Yoano 11:39) Kulita ni manyonga ja atu, te kukushi kutalatala.

⁸ Yachizako liwe, mba Yesu yakololoka ni liji linene ngwenyi: “Lazaru tuhukamo!” Yika yalingiwile? “Mufu yatuhuka.” (Yoano 11:43, 44) Nyonga kama chiseke chize evwile atu waze apwileho! Mandumbu, asoko, masepa ni enyembo ja Lazaru eswe te kananyingika ngwo iye hafwa. Alioze, tala—mutu yoze te azanga chinji—yahinduka, yapwa mukachi ko. Achi chapwile chikomokeso kuli ayo. Atu yasambilila Lazaru ni chiseke cheswe. Chamwenemwene kufwa yachikumba.

9, 10. (a) Kuchi Yesu asolwele Yoze wamuhele ndundo jakuhindwisa najo Lazaru? (b) Kuchi kutanga sango ja Mbimbiliya ja uhindukilo muchihasa kutukwasa?

⁹ Yesu kakambile ngwenyi kalingile chikomokeso chacho ku ndundo jenyi. Ha kulemba shimbu kanda achisanyika Lazaru, iye yasolola pundu ngwenyi Yehova mwe wamuhindwishile. (Tanga Yoano 11:41, 42.) Yehova kazachishile nawa ndundo jenyi ni kulinga yikomokeso yikwo. Kuhindwisa cha Lazaru chili chimwe chikomokeso cha uhindukilo livwa uze uli mu Liji lia Zambi. a Kutanga ni  kulilongesa sango jacho muchitukwasa chinji. Sango jacho jakutulongesa ngwo Zambi keshi katonde, mumu atu waze ahindwishile kapwile twanuke ni makulwana, mapwo ni malunga, A-Izalele ni waze te hi A-Izalele ko. Sango jacho jinasolola nawa chiseke chize atu evwile! Chakutalilaho, muze Yesu ahindwishile umwe mwana-pwo mu ufwe, yisemi jenyi “alishikishilile chikolo hazehene.” (Marku 5:42) Chochene, Yehova kalingile yuma yize yaahele chiseke chize kechi keza kavulama.

¹⁰ Alioze, atu waze Yesu ahindwishile kafwile cheka. Shina achi chinalumbunuka ngwo uhindukilo wacho wapwile wamokomoko nyi? Ka. Sango jino ja mu Mbimbiliya jinasolola umwenemwene ni kutwaha kutalatala.

11. Kuchi sango ja uhindukilo wa Lazaru mujitukwasa kunyingika umwenemwene asoneka mu Chilumbununyi 9:5?

¹¹ Mbimbiliya yakulongesa ngwo afu “kanyingikine nichimwe.” (Chilumbununyi 9:5) Ayo keshi ni mwono nawa keshi kunyonga nichimwe. Sango ja Lazaru jinasolola chino. Muze Lazaru ahindukile, shina kalwezele atu chize mu malilu mwapwa nyi? Kutala kambulwile sango ja kuwema mu chitende cha kahia nyi? Ka. Mu Mbimbiliya kumushi maliji ja Lazaru waze anambe chocho. Matangwa eswe awana waze apwile mu ufwe, iye te “kanyingikine nichimwe.” Lazaru te kanapombo wika mu ufwe.—Yoano 11:11.

12. Mumu liaka mutuhasa kufuliela ngwetu uhindukilo wa Lazaru uli wamwenemwene?

¹² Sango ja Lazaru jakutulongesa nawa ngwo uhindukilo uli wamwenemwene, hi mahuza ko. Yesu kahindwishile Lazaru mukachi ka yela anji. Chipwe tetekeli a mangeleja, waze te akwivwila Yesu kole kakahamikine ha chikomokeso chacho. Ayo yamba ngwo: “Kuchi mutulinga? Mumu mutu yono [Yesu] kakulinga  yilayi yinji.” (Yoano 11:47) Atu anji ayile ni kutala mutu yoze ahindwishile mu ufwe. Mba atu anji yaafuliela kuli Yesu. Lazaru kapwile chilayi chize chasolwele ngwo Yesu kamutumine kuli Zambi. Chilayi chacho chapwile chinene, kashika asasendote A-Yunda atwamine punga hanga ashihe Yesu ni Lazaru.—Yoano 11:53; 12:9-11.

13. Ushindakenyo uka unasolola pundu ngwo Yehova mahasa kuhindwisa afu?

¹³ Shina chili chamokomoko kutayiza ngwo uhindukilo mukalingiwa nyi? Ka, mumu Yesu kalongesele ngwenyi limwe tangwa “waze eswe ali mu mafuka” makaahindwisa. (Yoano 5:28) Yehova kali Sakatanga yoze watangile mwono. Kutala chili chikalu kutayiza ngwetu iye mahasa kutanga nawa mutu nyi? Muchihasa kulingiwa nikulita ni manyonga ja Yehova. Shina iye mahasa kwiwuluka asoko jetu waze hanafu? Chipwe ngwe mwilu munazale to ni tutongonoshi, nihindu Zambi kakwaatongola eswe ha ma jina! (Izaia 40:26) Yehova mahasa kwiwuluka asoko ni masepa jetu eswe waze hanafu, kashika, iye kali ni ndundo ja kwaahindwisa.

14, 15. Kulita ni chize Yombi ambile, kuchi Yehova akwivwa hakutwala ku uhindukilo wa afu?

¹⁴ Kuchi Yehova akwivwa ha nyonga lia kuhindwisa afu? Mbimbiliya yakulongesa ngwo iye kali ni usona wa kuhindwisa afu. Lunga wa ululi, Yombi, kahulile ngwenyi: “Nyi mutu mafwa matwama nawa ni mwono?” Yombi yamba ngwenyi matwaminyina mu fuka ndo tangwa lize Zambi makamwiwuluka. Iye yamba kuli Yehova ngwenyi: “Musanyika mba mungukumbulula; muwivwa usona ha chitanga cha moko je.”—Yombi 14:13-15.

¹⁵ Achinyonga kama! Yehova ngwo usona akwivwa wa kuhindwisa afu. Kunyingika ngwo Yehova che akwivwa muchitwaha chiseke chinji. Mba kuchi uhindukilo wa kulutwe lia matangwa muukapwa? Aya makahindwisa, nawa kulihi makatwama?

16. Afu waze makahindwisa makapwa ni mwono wa mutapu uka hano hashi?

¹⁶ Sango ja mu Mbimbiliya ja uhindukilo jakutulongesa chinji ha uhindukilo uze muwiza kulutwe. Atu waze ahindwishile hano hashi yatwama nawa ni asoko jo. Uhindukilo wa kulutwe lia matangwa newo che muukapwa—alioze muukahiana chinji. Ngwe chize twamonanga mu Kapitulu 3, Zambi kanazange hanga hashi heswe hapwe paraisu. Kashika, afu kechi kaahindwisa akatwame hashi haze hanazale to ni jita, utoji ni yikola. Ayo makatwama ni mwono wa miaka yeswe ni sambukila hano hashi.

17. Atu angahi waze makahindwisa mu ufwe?

¹⁷ Aya waze makahindwisa? Yesu ngwenyi, “waze eswe ali mu mafuka makevwa liji lienyi [Yesu], makatuhuka.” (Yoano 5:28, 29) Mukanda wa Usolwelo 20:13 newo unambe ngwo: “Kalunga-lwiji wechele afu aze apwilemo; ni kufwa ni Heteze yechele afu aze apwilemo.” (Tala Apendice, ha mafwo 212-213.) Mafuka jacho makasala amokomoko. Tununu twa atu eswe waze alimo makaahindwisa. Postolo Paulu ngwenyi: “Kumukukapwa uhindukilo wa akwa ululi ni wa yihenge.” (Yilinga 24:15) Yika maliji wano analumbunuka?

18. Atu aka “akwa ululi” waze makahindwisa, nawa yika kutalatala chacho muchihasa kutuchiza?

¹⁸ Hali “akwa ululi” muhakapwa ni waze eswe avuluka mu Mbimbiliya apwileko muze Yesu te kanda achiza hano hashi. Muhasa kunyonga Noa, Apalahama, Serai, Mose, Rute, Estere ni atu akwo nawa. Amwe a kuli malunga ni mapwo jacho a ufulielo kanaavuluka mu mukanda wa A-Hepreu Kapitulu 11. Hali “akwa ululi” muhakapwa nawa tuvumbi twa Yehova waze akufwa ha mashimbu jetu. Tunawahilila chinji ha kutalatala cha uhindukilo, kutuchi kupwa nawa ni woma wa kufwa.—A-Hepreu 2:15.

19. “Yihenge” aya, nawa shimbu liaka Yehova makaaha?

¹⁹ Yika muyikalingiwa kuli yihenge waze te keshi  kuzachila hanji kwononokena Yehova mumu te kamunyingikine? Tununu twa “yihenge” jacho kechi kaavulama. No nawa makaahindwisa ni kwaaha shimbu hanga akalilongese umwenemwene wa Zambi ni kumuwayila. Ha kanunu umuwika wa mwaka, afu makaahindwisa akalichinge ni atu ashishika hano hashi hanga akawayile Yehova. Shimbu liacho mulikapwa lia chiseke chinji. Shimbu liacho kakulivuluka mu Mbimbiliya ngwo Tangwa lia Upatwilo. b

20. Ngehena yika, nawa aya akuyamo?

²⁰ Shina atu eswe waze hanafu makaahindwisa nyi? Ka. Mbimbiliya yinambe ngwo afu akwo kali mu “Ngehena.” (Luka 12:5) Jina Ngehena liakatuka ha chihela apwile ni kumbila yiswaswa chize chapwile haze lia Yerusaleme yikulu. Mwe te akwochela afu ni yiswaswa. Afu waze apwile ni kumbila mu chihela chacho, A-Yunda te kakwaamona ngwo katelele kwaafunda nawa ngwo keshi ni kutalatala cha uhindukilo. Kashika Ngehena yinalumbunuka unongeso wa mutolo. Chipwe tuhu Yesu makasopesa akwa-mwono ni afu, alioze Sopi munene kali Yehova. (Yilinga 10:42) Iye kechi kahindwisa atu api waze keshi kuzanga kwalumuna yitanga yo yipi.

21, 22. (a) Uhindukilo ukwo uka uli ko? (b) Iya mutangu yoze watambwile uhindukilo wa spiritu?

²¹ Mbimbiliya yakuhanjika nawa ha uhindukilo ukwo, wa atu waze akuya mu malilu hanga apwe yitangiwa ya spiritu. Mu Mbimbiliya, muli chilweza chimuwika chauhindukilo wa mutapu au, cha Yesu Kristu.

²² Muze Yesu amushihile, Yehova kakechele Mwanenyi wa shishika ashimbule mu fuka. (Samu 16:10; Yilinga 13:34, 35) Zambi kahindwishile Yesu, alioze hi ni mujimba wa  musunya ko. Postolo Petulu ngwenyi Kristu ‘amushihile mu musunya, alioze . . . amupwishile ni mwono wa spiritu.’ (1 Petulu 3:18) Achi chapwile pundu chikomokeso chinene. Yesu yapwa nawa ni mwono ngwe chitangiwa cha spiritu! (Tanga 1 A-Korindu 15:3-6.) Yesu iye mutangu kutambula uhindukilo wa spiritu. Alioze te hi iye wausula ko.—Yoano 3:13.

23, 24. Aya ali mu chizavu cha “mbunga yikepe ya mapanga” a Yesu, nawa angahi?

²³ Yesu hakunyingika ngwenyi mafuna mu malilu, yalweka tumbaji twenyi ashishika ngwenyi maya ‘akaaluliekele chihela.’ (Yoano 14:2) Yesu yavuluka waze makaya mu malilu ngwenyi “mbunga yikepe ya mapanga.” (Luka 12:32) Atu angahi ali mu chizavu chino chikehe cha akwa-Kristu ashishika? Kulita ni Usolwelo 14:1, postolo Yoano ngwenyi: “Namwene mwe Mwana-panga [Yesu Kristu], kanamana ha mulundu wa Zaione, ni hamwe nenyi kulakaji, ni makumi awana, ni tununu awana (144,000), kali ni jina lienyi, ni jina lia Tato, linasonewa ha mahuma jo.”

²⁴ Akwa-Kristu wano 144,000, akwo kali apostolo ashishika a Yesu, kakuya mu malilu. Shimbu lika te uhundukilo wo muuputuka? Postolo Paulu yasoneka ngwenyi uhindukilo wacho te muuputuka muze Kristu masoloka. (1 A-Korindu 15:23) Ngwe chize mukalilongesa mu Kapitulu 9, tuli ha mashimbu jacho. Ha chino, masalila a 144, 000 waze akufwa ha mashimbu jetu susumuku kakwaahindwisa ni kuya mwilu. (1 A-Korindu 15:51-55) Alioze atu anji, kali ni kutalatala cha uhundukilo wa kutwama mu Paraisu hano hashi.

25. Yika mutulilongesa mu kapitulu yoze masulaho?

²⁵ Ewa, Yehova makakumba kufwa mukwa-kole wetu kechi kapwako nawa ku miaka ya mutolo! (Tanga Izaia 25:8.) Hanji muhasa kulihula ngwe, ‘Waze akuhindwisa ni kuya mu malilu yika akuya ni kulingamo?’ Ayo makayula mu Wanangana upema wa mu malilu. Mutulilongesa Wanangana wacho mu kapitulu yoze masulaho.