APENDICE
Mikele Mungelo wa Lutwe Iya?
MBIMBILIYA kuyishi kwamba chinji hakutwala kuli mungelo yoze anavuluka ngwo Mikele. Alioze, shimbu lieswe akumuhanjika mu yisoneko kakumusolola ngwo kali ni kukalakala. Mukanda wa Daniele, unasolola ngwo, Mikele kanase jita ni angelo api; mu mukanda wa Yundase, iye kanalihamika ni Satana; mu mukanda wa Usolwelo, iye kanase jita ni Ndiapu hamwe ni andemoniu jenyi. Hakukalila Wanangana wa Yehova ni kuliasa ni akwa-kole ja Zambi, jina Mikele linamutela— lize linalumbunuka ngwo “Iya Wapwa Ngwe Zambi?” Mba, Mikele iya?
Atu akwo keshi kwaanyingika wika ni jina limuwika. Ngwe chilweza chino, kalamba Yakomba nawa te kakumuvuluka ngwo Izalele, postolo Petulu, ngwo Semone. (Uputukilo 49:1, 2; Mateu 10:2) Chizechene nawa, Mbimbiliya yinasolola ngwo Mikele lili jina likwo lia Yesu Kristu, lize akumuvuluka mu malilu. Tutalenu yisoneko yize yinasolola ngwo iye che akumuvuluka.
Mungelo wa lutwe. Liji lia Zambi linasolola ngwo, Mikele kali “mungelo wa lutwe.” (Yundase 9) Liji lino linalumbunuka ngwo iye kali ‘mungelo mutangu.’ Hano, Mikele kanamuvuluka ngwo mungelo wa lutwe. Chino chinalumbunuka ngwo iye wika mungelo wa lutwe. Ha chino, jina “mungelo wa lutwe” mu Mbimbiliya kanalivuluka wika kuli mungelo umuwika, hi kuli angelo anji ko. Chikwo nawa, mulimo wa mungelo wa lutwe unatela wika Yesu. Mukanda 1 A-Tesalonika 4:16 unambe hakutwala kuli Mwene Yesu Kristu, ngwo: “Mwene, kumakahulumuka mwilu, ni liji lia mutambi, ni liji lia mungelo wa lutwe.” Hano liji lia Yesu kanalisolola ngwo lia umwe mungelo wa lutwe. Kashika, versu yino yinasolola ngwo Yesu mwe Mikele mungelo wa lutwe.
Mwata wa tujita. Mbimbiliya yinambe ngwo: ‘Mikele ni angelo jenyi ashile jita ni ndragau . . . ni angelo jenyi.’ (Usolwelo 12:7) Ha chino, Mikele kali Mwata wa chimwe chizavu cha tujita, angelo ashishika. Mukanda wa Usolwelo newo unambe ngwo Yesu kali Mwata wa tujita e angelo ashishika. (Usolwelo 19:14-16) Nawa postolo Paulu kanavuluka “Mwene Yesu” hamwe ni “angelo jenyi a tachi.” (2 A-Tesalonika 1:7) Mbimbiliya yinatongola Mikele ni “angelo jenyi” ni Yesu ni “angelo jenyi.” (Mateu 13:41; Mateu 16:27; 24:31; 1 Petulu 3:22) Amu Liji lia Zambi lishi kusolola ngwo kuli yizavu yaali ya angelo ashishika mu malilu ngwo—chimuwika cha Mikele, chikwo cha Yesu—kashika, Mikele hi mungelo mukwo ko, alioze kali Yesu Kristu ha chiteli chenyi mu malilu. a
a Nyi muzanga kunyingika nawa jina lia Mikele Mwana wa Zambi, tala Vulume 2, mafwo 828-829, ha Estudo Perspicaz das Escrituras, wakufambwisa kuli Yela ja Yehova.
