ATU waze akutayiza longeso lia tuzambi atatu, kakwamba ngwo Zambi kali atu atatu—Tata, Mwana ni Spiritu Musandu. Kakwamba nawa ngwo, wano eswe atatu kalita umwe ni mukwo, eswe kali akwa-ndundo-jeswe nawa keshi ni uputukilo. Kulita ni longeso lia tuzambi atatu, Tata kali Zambi, Mwana kali Zambi ni Spiritu Musandu neye kali Zambi, alioze kali Zambi umuwika.

Atu anji waze akutayiza longeso lia tuzambi atatu ayo ene kakwamba ngwo keshi kuhasa kulilumbununa. Nihindu ayo kakunyonga ngwo kota lili longeso lia mu Mbimbiliya. Mu Mbimbiliya liji lia  “tuzambi atatu” kulishimo. Shina mu Mbimbiliya muli chimwe chikuma hakutwala ku longeso lia tuzambi atatu? Mba tukumbulule chihula chino, tutalenu chisoneko chize atu akutanga mba alongese chikuma cha tuzambi atatu.

Mukanda wa Yoano 1:1 unambe ngwo: “Ha uputukilo Mwe Liji te hwali. Liji hamuwika ni Zambi ali. Liji Iye Zambi.” Mu kapitulu yomwene, Yoano yalumbununa nawa ngwenyi, “Liji” mwe Yesu. (Yoano 1:14) Amu Liji analivuluka ngwo Zambi, kashika atu anji akulongesa ngwo Mwana ni Tata kali Zambi umuwika.

Nyingika ngwe, chihanda chino cha yisoneko ya Mbimbiliya kachisonekene chitangu mu limi lia Ngregu. Hi kulutwe lia matangwa, akwa-kulumbununa yalumbununa yisoneko ya Ngregu mu malimi akwo. Akwa-kulumbununa Mbimbiliya anji, kakasonekene ngwo “Liji te Zambi.” Mumu liaka? Ha mukunda wa yinyingi yo ya limi lia Ngregu, akwa-kulumbununa jacho yanyonga ha maliji wano ngwo “Liji te Zambi” chatamba kwalumbununa mweka. Kuchi te? Tala yimwe yilweza: “O Logos [Liji] te zambi.” (A New Translation of the Bible) “Liji te umwe zambi.” (The New Testament in an Improved Version) “Liji te hamuwika ali ni Zambi nawa te chisemewa cho chimuwika.” (The Translator’s New Testament) Kulita ni ulumbunwiso uno, Liji hi mwene Zambi ko. a Alioze hamukunda wa wata wenyi mukachi ka yitangiwa ya Yehova, Liji kanamuvuluka ngwo umwe zambi. Hano, liji “zambi” linalumbunuka “mukwa-ndundo.”

Atu anji kanyingikine limi lia Ngregu lize asonekene nalio Mbimbiliya. Mba kuchi muhasa kunyingika yize postolo  Yoano te anambe? Achinyonga ha chilweza chino: Nyi umwe longeshi kanalumbunwina alongi jenyi chimwe chikuma. Alioze ayo kanakakajala. Yika alongi mahasa kulinga? Ayo mahasa kuhula longeshi wo yikuma yikwo. Chochene, kuhula yikuma yikwo muchaakwasa kunyingika chikuma chacho kanawa. Chizechene nawa, mba tupwe ni ulumbunwiso wa Yoano 1:1, chatutamba kufupa mu Mukanda wa Yoano yikuma yikwo hakutwala ku ulemu wa Yesu. Kunyingika yikuma yikwo hakutwala ku chikuma chino muchikukwasa kupwa ni ulumbunwiso uze walita.

Chakutalilaho, tala yize Yoano asonekene mu kapitulu 1 versu 18 ngwenyi: “Niumwe kanda achimona Zambi [Mukwa-Ndundo-Jeswe] nilimwe tangwa.” Alioze, atu hanamono Yesu, mwe Mwana, kashika Yoano ambile ngwenyi: “Liji [Yesu] walipwishile mutu wa musunya, watwamine hakachi ketu mba twamwene uhenya wenyi.” (Yoano 1: 14) Kuchi te Mwana mahasa kupwa mwe Zambi Mukwa-Ndundo-Jeswe? Chikwo nawa, Yoano yasoneka ngwenyi: “Liji liapwile hamwe ni Zambi.” Kuchi mutu mahasa kupwa hamwe ni mutu mukwo nawa ha mashimbu woene mapwa mutu yomwene? Chikwo nawa, kulita ni Yoano 17:3, Yesu kambile pundu ngwo iye kalisa ni Tato wa mu malilu. Iye kavulukile Tato ngwo “Zambi wamwenemwene umuwika.” Kusongo, Yoano yasoneka ngwenyi: “Yino yinasonewa, hanga nukafuliele Yesu iye mwe Kristu, mwe Mwana Zambi.” (Yoano 20:31) Ngwe chize wamona, Yesu keshi ni kumuvuluka ngwo Zambi, alioze ngwo Mwana wa Zambi. Versu jino jikwo ja Mukanda wa Yoano jinasolola chize chatamba kumulumbununa Yoano 1:1. Yesu mwe Liji, kali ‘umwe zambi’ ha mukunda wa ulemu uze iye alinawo, alioze iye hi Zambi ko Mukwa-Ndundo-Jeswe.

Achinyonga nawa ha chilweza cha longeshi ni alongi. Nyi alongi jacho nihindu kanakakajala, chipwe ngwe hevwa ulumbunwiso ukwo wa longeshi, yika mahasa kulinga? Ayo mahasa kufupa longeshi mweka hanga evwe ulumbunwiso ukwo hakutwala ku chikuma chacho. Nyi ulumbunwiso wa longeshi wamuchiali unalita ni wa longeshi mutangu, kukakajala cho  muchihasa kuhwa. Chizechene nawa, nyi kushi ni ushindakenyo wa yize Yoano asonekene hakutwala kuli Yesu ni Zambi Mukwa-Ndundo-Jeswe, muhasa kufupa chikuma chacho mu mikanda yikwo ya mu Mbimbiliya. Tala yuma yize Mateu asonekene. Hakwamba yuma ya ku matangwa akusula, iye yatongola maliji a Yesu ngwenyi: ‘Hakutwala ku tangwa lize ni ola yize niumwe kayinyingikine, chipwe angelo a mwilu, chipwe Mwana ka, alioze Tata wika.’ (Mateu 24:36) Kuchi maliji wano anasolola ngwo Yesu hi Zambi Mukwa-Ndundo-Jeswe ko?

Yesu kambile ngwenyi Tata kananyingika yuma yinji kuhiana Mwana. Nyi Yesu te mwe Zambi Mukwa-Ndundo-Jeswe, kachi te kananyingika yuma yeswe chizechene ngwe Tato. Kashika, Mwana ni Tata hi mutu umuwika ko. Chipwe chocho, amwe mahasa kwamba ngwo: ‘Yesu kapwile ni yisemewa yaali. Kashika, hano iye te kanahanjika ngwe mutu wa musunya.’ Alioze, chipwe chocho, yika mba mutwamba ha spiritu yisandu? Nyi spiritu yisandu ni Tata kali Zambi umuwika, mumu liaka Yesu kakambile ngwenyi spiritu yisandu yinanyingika yize Zambi ananyingika?

Muze mununga ni kulilongesa Mbimbiliya, munyingika yuma yinji hakutwala ku yisoneko ya mu Mbimbiliya yize yinalite ni chikuma chino. Yisoneko yacho yinasolola umwenemwene hakutwala kuli Tata, Mwana, ni spiritu yisandu.—Samu 90:2; Yilinga 7:55; A-Kolosu 1:15.