MBA atukwase kunyingika Mesaya, Yehova yatuma aprofeta anji hanga asoneke sango mu Mbimbiliya hakutwala ku kusemuka, mulimo ni kufwa cha Chilamwina yono alakenyene.  Uprofeto uno weswe wa mu Mbimbiliya wamanunukine hali Yesu Kristu. Uprofeto uno weswe uli wamwenemwene. Tutalenu umwe uprofeto uze unambe hakutwala ku kusemuka ni kukola cha Mesaya.

Profeta Izaia kambile ngwenyi Mesaya te mapwa wa ku chisemuko cha Mwanangana Ndawichi. (Izaia 9:7) Chochene, Yesu kasemukine ku munyachi wa Ndawichi.—Mateu 1:1, 6-17.

Mika profeta mukwo wa Zambi kambile ngwenyi yoze te mapwa mukwa kuyula te masemukina ku “Mbeteleme Efrata.” (Mika 5:2) Ha mashimbu waze Yesu asemukine, mu Izalele te mukwete mbonge jaali jize te akuvuluka ngwo Mbeteleme. Yimwe te yatwama hakamwihi ni Nazare, kusango lia chifuchi, yikwo te yatwama hakamwihi ni Yerusaleme mu Yunda. Mbeteleme yize te yatwama hakamwihi ni Yerusaleme te kakuyivuluka ngwo Efrata. Yesu mwe asemukine kulita ni chize uprofeto wambile!—Mateu 2:1.

Uprofeto ukwo wa Mbimbiliya wambile ngwo Mwana wa Zambi te ‘mamusanyika ku Engitu.’ Yesu kayile nenyi mu Engitu muze te uchili mwana-kemba. Alioze kafunyine nenyi muze te Heronde hafwa, chocho uprofeto yiumanunuka.—Hozeia 11:1; Mateu 2:15.

Ha mushete uli ha lifwo 200, hali yisoneko yize yili mwishi lia chikuma “ Uprofeto” yize yinambe hakutwala kuli Mesaya. Yitese ni yisoneko yize yili mwishi lia chikuma “Umanunuko.” Yisoneko yacho muyikolesa ufulielo we ha umwenemwene wa Liji lia Zambi.

Ha kuhengula versu jino, nyingika ngwo jize jili uprofeto kajisonekene miaka yinji kunyima muze Yesu te kanda achisemuka. Yesu kambile ngwenyi: ‘Yuma yeswe yize asonekene hakutwala kuli yami mu Shimbi ya Mose ni mu mikanda ya Aprofeta ni ya Masamu yatamba kumanunuka.’ (Luka 24:44) Ngwe chize muhasa kumona mu Mbimbiliya ye, uprofeto wacho—weswe wamanunukine!