MUZE atu yoka hano hashi, anji yaputuka kulinga upi ngwe Kene. Alioze umwe lunga te kalisa no. Lunga wacho jina lienyi te Enoke. Enoke te umwe lunga wa hamu. Atu eswe waze apwile ha kachi kenyi kapwile ni kulinga yuma yipi, alioze Enoke yanunga ni kulingila Zambi.

Yena unanyingika mumu liaka atu jacho te apwile ni kulinga yuma yipi? Achi nyonga kama, iya yoze unakatuma Alama ni Eva hanga ehuke kuli Zambi ni kulia ku muhuko uze Zambi anakaakanjisa ngwo kanda aulia? Ewa, umwe mungelo mupi. Mbimbiliya yinamuvuluka ngwo Satana. Iye kakuzanga hanga atu eswe apwe api.

Limwe tangwa Yehova Zambi yatuma Enoke hanga ambujole yimwe shimbi kuli atu jacho, yize ayo kakayizangile. Shimbi yacho yino: ‘Mukwiza limwe tangwa lize Yehova manongesa atu eswe api.’ Atu jacho yevwa uli unji ha kwivwa shimbi yino. Ayo kota kanakafupa kushaha Enoke. Kashika Enoke ndo te apwe mukwa hamu hanga ahanjike kuli atu ha yize te Zambi malinga.

Zambi kakechele hanga Enoke atwame mashimbu anji mukachi ka atu jacho api. Enoke kanakatwama wika 365 a miaka ni mwono. Mumu liaka tunambe ngwo “365 a miaka wika”? Mumu ha mashimbu jacho atu te kakwete tachi jinji nawa te kakutwama miaka yinji. Ngwe chilweza chino, Metusela mwana wa Enoke kanakatwama 969 a miaka ni mwono!

Mba muze Enoke yafwa, atu yapihia nawa chinji. Mbimbiliya yinambe ngwo ‘manyonga jo eswe a mu mbunge te api wika matangwa eswe,’ nawa ha chino ‘ungulungulu yiwoka hashi heswe.’

Yena unanyingika chitela cha mumu liaka kwapwile upi unji hano hashi ha matangwa jacho? Mumu Satana kanakawana jila yikwo yaha hanga ashinjile atu kulinga yuma yipi. Mutukalilongesa yuma yacho kulutwe.