TALA yize yinapuko haliapwila. Alama ni Eva kanaahumu mu munda upema wa Endene. Yena unanyingaka mumu liaka?

Mumu kalinga chuma chipi chinji. Kashika Yehova anaahumu. Yena unanyingika upi uka Alama ni Eva alinga?

Ayo kalinga chuma chize Zambi anakamba ngwo kanda achilinga. Zambi yamba kuli ayo ngwo munuhasa kulia ku mihuko ya mitondo ya mu munda. Alioze Zambi yamba nawa kuli ayo ngwo kanda nulia ku muhuko wa umwe mutondo, mumu nyi nuaulia munufwa. Zambi yatulika mutondo wacho ngwo wa iye mwene. Yetwe tunanyingika ngwo chili chipi chinji kwanda chuma chambala, nyi ngwami? Mba, yika yinakapwako?

Limwe tangwa, muze Eva te ali ukawenyi mu munda, umwe kapela yahanjika nenyi. Achi nyonga kama! Kapela yamba kuli Eva hanga alie ku muhuko wa mutondo uze Zambi anakaamba ngwo kanda nuulia. Muze Yehova alingile tupela, iye kakaalingile hanga apwe ni kuhanjika. Kashika, ndo te umwe mutu mahasa kuhanjikisa kapela. Mutu wacho mba iya?

Hi Alama ko. Alioze ndo apwe umwe mutu yoze Zambi alingile ku mashimbu akunyima muze te kanda achilinga hashi. Mutu wacho kali umwe mungelo, nawa yetwe tuchikuhasa kumumona. Mungelo wacho yevwa chipululu chinji. Iye yanyonga ngwo chatamba kupwa mwata ngwe Zambi. Nawa iye yazanga ngwo atu ononokene wika kuli iye, hi kuli Yehova ko. Mungelo wacho mwe unakahanjikisa kapela.

Mungelo wacho yahasa kwongo Eva. Muze iye yamba kuli Eva ngwo mapwa ngwe Zambi ni malia ku muhuko wacho, Eva yataiza. Chocho, Eva yalia nawa ni Alama neye yalia. Alama ni Eva yehuka kuli Zambi, kashika ayo anakatokesa munda wo upema muze te atwama.

Alioze Zambi kumakafunga hanga hashi heswe hakapeme ngwe chizechene mwapwile mu munda wa Endene. Kulutwe mba mutulilongesa chize yena muhasa kutwamamo. Mba alioze, haliapwila tutalenu yika yapwa kuli Alama ni Eva.