NOA te kakwete pwo umwika ni ana atatu. Ana jenyi te kakwavuluka ngwo Sheme, Hame ni Yafwe. Ana eswe te kakwete mapwo jo. Ha chino asoko eswe ja Noa kanakapwa nake.

Zambi yatuma Noa hanga alinge chimwe chuma chinene. Iye yamulweza hanga atunge umwe ulungu unene. Ulungu wacho wapwile unene chinji, alioze walifwa te ngwe umwe mushete unene nawa usuku chinji. Zambi yamba ngwenyi; ‘uulinge ni yipatulo yitatu nawa yisuku-yisuku.’ Yipatulo yacho yapwile ya Noa ni asoko jenyi, ni tushitu, nawa yikwo te ya kutulikila kulia chize ayo eswe te mafupa.

Zambi yatuma Noa kulinga ulungu upema hanga uchine kunjila meya. Zambi yamba ngwenyi: ‘Munguneha sanga linene lia meya hanga ngunongese atu ni yuma yeswe hano hashi.’

Noa ni ana jenyi yononoka kuli Yehova nawa yaputuka ni utungilo wa ulungu. Mba alioze atu akwo yaputuka kwaseha. Atu jacho kanakanunga mu upi wo. Niumwe unakatayiza wakwihi muze Noa ahanjikile hakutwala ku yize te Zambi malinga.

Utungilo wa ulungu unakalinga mashimbu anji mumu te unene chinji. Ha kupalika cha miaka yinji yiuhwa. Mba Zambi yatuma Noa hanga anjise tushitu mu ulungu. Zambi yamba ngwo anjise tushitu a mutapu weswe, aali aali, kuji ni chihwo. Alioze hali tushitu a mutapu ukwo Zambi yamba kuli Noa hanga anjise shimbiali. Zambi yamba nawa ngwo anjise tujila a mutapu weswe. Noa yalinga nikulita ni yeswe yize Zambi anakamutuma.

Mba, hi Noa ni asoko jenyi yanjila mu ulungu. Chocho Zambi yayika chikolo. Muchima, lia ulungu Noa ni asoko jenyi yashimbwila. Achi shinginyeka kama ngwe ni yena uli mu ulungu hamwika ni ayo, nunashimbwila. Shina mukwiza lume sanga lia meya ngwe chize Zambi anakamba, nyi?