TALA kama asoko wano anji. Wano kali ana 12 ja Yakomba. Yakomba kali nawa ni ana a mapwo. Yena unanyingika majina ja ana jenyi? Tunyingikenu amwe a kuli ayo.

Liya yasema Rupene, Simeone, Levi, ni Yunda. Muze Rakele amwene ngwo kechi kupwa ni ana, iye yevwa yinyengo yinji. Kashika Rakele yahana ndungo yenyi Mbila kuli Yakomba, mba Mbila yasema ana aali, waze anavuluka ngwo Ndane ni Napatali. Alioze Liya ni neye yahana ndungo yenyi Zelupa kuli Yakomba, Zelupa yasema Ngate ni Ashe. Kulutwe lia matangwa, Liya yasema nawa ana aali, Yisaka ni Zapulone.

Hi mba, Rakele neye yasema umwe mwana. Yamuluka jina ngwo Yosefwe. Kulutwe mutukalilongesa chinji hakutwala kuli Yosefwe, mumu iye kapwile mutu mulemu chinji. Wano kapwile ana 11 a malunga waze Yakomba asemene ni Rakele ni Liya, muze te unachitwama ni Lapane tato ya Rakele.

Yakomba kanakapwa nawa ni ana a mapwo, alioze mu Mbimbiliya muli jina lia mwana wa pwo umuwika. Jina lienyi te Ndina.

Mba yikuheta mashimbu hanga Yakomba akwate chiyulo cha kuhichita Lapane hanga ahiluke ku Kanana. Kashika iye yakunga asoko jenyi ni yimuna yenyi yinji ya mapanga ni ngombe, mba yalinga wenyi.

Muze Yakomba ni asoko jenyi te kanda achiheta ku Kanana, Rakele yasema nawa mwana mukwo. Chino chapwile muze ayo te achili mu wenyi. Kushita chacho chapwile chikalu chinji kuli Rakele, kashika iye anakafwa ha kusema mwana wacho. Alioze mwana wacho yasemuka kanawa. Yakomba yamuluka jina ngwo Mbejamine.

Tweulukenu majina ja ana 12 a Yakomba mumu muli ayo mwe munakeza vungu lia Izalele. Ha chino minyachi 12 ya Izalele yinambate majina 10 a ana ja Yakomba ni majina akwo aali a ana ja Yosefwe. Izake kanakatwama nawa miaka yinji ni mwono muze ana eswe wano asemukine, kota iye kanakevwa chiseke chinji hakupwa ni ajikulu anji. Alioze tutalenu yize yinakapwa kuli mujikulu wenyi Ndina.