YOSEFWE kahashile nawa kulihumikiza mu mbunge yenyi. Iye yamba kuli tuvumbi twenyi eswe hanga atuhuke mu zuwo. Muze iye hasala wika ni mandumbu jenyi, Yosefwe yaputuka kulila. Yetwe mutuhasa kushinginyeka kukomoka cha mandumbu jenyi, mumu ayo te kaso kunyingika mumu liaka iye te analilila. Kusongo iye yamba ngwenyi: ‘Yami nguli Yosefwe. Tata ni haliapwila uchili ni mwono?’

Mandumbu jenyi yakomoka chinji, kakahashile kuhanjika nichimwe. Ayo yevwa woma. Mba Yosefwe yamba ngwenyi: ‘Lisesa tweyenu kuno.’ Muze ayo hakundama, yaalweza ngwenyi: ‘Yami nguli ndumbwenu Yosefwe, yoze yenwe nwalanjishile mu Engitu.’

Yosefwe yanunga ni kuhanjika noo ni umbovu weswe ngwenyi: ‘Kanda nulilamikiza yenwene mumu ha kungulanjisa. Chamwenemwene Zambi unakangutuma mu Engitu hanga ngulamwine mwono wa atu. Falau hanangusa mwanangana wa chifuchi cheswe. Kashika funenu kawashi kuli tata hanga numulumbunwine yuma yino yeswe. Nawa munumulweza hanga eze ni kutwama kuno.’

Yosefwe yakwata mandumbu jenyi eswe nawa yaambejala. Muze Falau hevwa ngwo mandumbu ja Yosefwe haheta, yamba kuli Yosefwe ngwenyi: ‘Anda matemba hanga uye ni kusaka tatenu ni asoko je wize no kuno. Yami mungwaaha chihela chipema cha mu Engitu.’

Yino ye ayo alingile. Hano yena muhasa kumona chize Yosefwe analitakana ni tato muze iye heza mu Engitu ni asoko jenyi eswe.

Asoko ja Yakomba yakola yapwa anji. Waze anakaya mu Engitu kanakapwa 70 kuchinga Yakomba ni ana jenyi nawa ni ajikulu jenyi. Mba hapwile nawa mapwo ni tuvumbi anji. Chino che kutwama cho mu Engitu. Te kakwavuluka ngwo A-Izalele, mumu Zambi te hanalumuna jina lia Yakomba yamuluka jina ngwo Izalele. A-Izalele yapwa atu apema chinji kumeso ja Zambi, ngwe chize mutukamona kulutwe.