YENA unanyingika chuma chitangu chize Noa ni asoko jenyi alingile hakufwambuka mu ulungu? Ayo yahana umwe mulambu kuli Zambi. Yena muhasa kuumona ha chizulie chino chize anauhana. Noa yahana mulambu wa yimuna hanga asakwilile kuli Zambi ha kulamwina asoko jenyi ku sanga linene lia meya.

Kuchi yena wanyonga, shina Yehova kanakazanga mulambu wacho? Ewa, iye kanakauzanga. Kashika iye anakalakenya kuli Noa ngwo kechi keza kanongesa nawa hashi ni sanga lia meya.

Ha mashimbu akehe hashi heswe yihoma, nawa Noa ni asoko jenyi yaputuka ni mwono waha haze lia ulungu. Zambi yaawahisa nawa yamba ngwenyi: ‘Yenwe chanutamba kusema ana anji. Hanga nwoke chinji ndo muze hashi heswe muhazala too ni atu.’

Mba hi kulutwe lia matangwa, muze atu te mevwa hakutwala ku sanga linene lia meya, ayo kota te kakwivwa woma unji ngwe muliza nawa kamuchiali. Kashika Zambi yahana chimwe chuma chize te muchipwa ni kweulula atu chilakenyo chenyi ngwo kuchi kapwa nawa sanga lia meya hano hashi. Yena unanyingika chuma chize Zambi anakaha ngwe cheulwiso? Mwe kongolo.

Kongolo kakusoloka chinji mwilu ha kupanguluka cha tangwa muze hikwanoka vula. Kongolo kakwete ulombo wa mutapu weswe upema. Yena hi unamono kama umwe? Yena unamono umwe ha chizulie chino?

Zambi yamba ngwenyi; ‘Yami ngunalakenya nguchi keza kanongesa nawa atu ni tushitu eswe ni sanga lia meya. Ngunase kongolo wami mu malelwa. Muze kongolo masoloka, Yami mungumumona mba mungweuluka chilakenyo chami.’

Ha chino muze yena mumona umwe kongolo yika chatamba kweuluka? Ewa, chilakenyo cha Zambi ngwo kechi keza kanongesa nawa atu ni tushitu hano hashi ni sanga linene lia meya.