ANA wano aali, kalisa chinji, nyi ngwami? Yena unanyingika majina jo? Chinyanga kali Esau, kanuke yoze unafunga mapanga jina lienyi Yakomba.

Esau ni Yakomba te ana-apasa ja Izake ni Rebeka. Tato Izake, te kakuzanga chinji Esau, mumu te chinyanga mupema nawa te kakuneha kulia kuli asoko jenyi. Alioze Rebeka te kakuzanga chinji Yakomba, mumu te iye kalihumikiza nawa te chimbovu.

Kako Apalahama te uchili ni mwono, kashika yetwe mutuhasa kunyonga chize Yakomba te akuzanga kwivwa Apalahama muze mahanjika hakutwala kuli Yehova. Apalahama kanakafwa ni 175 a miaka, muze ana-apasa te hakumbunyisa miaka 15.

Muze Esau te hapwa ni 40 a miaka yambata mapwo aali a mu chifuchi cha A-Kanana. Chino chinakaneha yinyengo yinji kuli Izake ni Rebeka, mumu mapwo jacho te keshi kuwayila Yehova.

Limwe tangwa yikupwa chimwe chuma chize Esau evwilile chinji uli hali mwana-kwo Yakomba. Yikuheta mashimbu hanga Izake awahise mwanenyi wa mukulwana. Amu te Esau mwe mukulwana wa Yakomba yatwaminyina hanga atambule chiwape chacho. Alioze Esau te hanalanjisa kulu chiteli chenyi cha kutambula chiwape kuli Yakomba. Nawa, muze ayo eswe ni aali asemukine Zambi yamba ngwo Yakomba mwe te matambula chiwape chacho. Chenacho chinakapwa. Izake yahana chiwape kuli mwanenyi Yakomba.

Kulutwe lia matangwa, muze Esau yachinyingika iye yevwila Yakomba uli unji. Yevwa uli unji nawa yamba ngwenyi, mungushaha Yakomba. Muze Rebeka achivwile, iye yalipikala chinji. Kashika iye yamba kuli mukwo-lunga Izake ngwenyi: ‘Muchipwa chipi chinji nyi Yakomba neye mambata umwe mwana-pwo wa A-Kanana.’

Ha chino Izake yasanyika mwanenyi Yakomba yamulweza ngwenyi: ‘Kanda umbata ni umwe pwo wa kuli A-Kanana. Alioze ndo uye ku zuwo lia kakenu Mbetule ku Panda-narame. Ukambateko umwe wa kuli ana ja Lapane.’

Yakomba yapanjika maliji a tato, chocho yalinga wenyi usuku ku Panda-narame, kuze te atunga asoko jenyi.