YIKUPALIKA miaka yaali, nihindu Yosefwe te uchili mu zuwo lia ususu. Mukwa kuhana musenge kuli mwanangana yamuvulama. Alioze ha umwe ufuku Falau yapwa ni yimwe yilota yilemu yaali, nawa iye yazanga kunyingika ulumbunwiso wa yilota yacho. Unamono chize iye anapombo? Ha chimene, Falau yasanyika malunga jenyi akwa mana yaalweza yuma yize iye alotele. Mba alioze ayo kakahashile kuhana ulumbunwiso wa yilota yenyi.

Hohene hi mukwa kuhana musenge mba yeuluka kama Yosefwe. Iye yamba kuli Falau ngwenyi: ‘Muze yami napwile mu zuwo lia ususu mwapwile umwe lunga te wakuhasa kulumbununa yilota.’ Falau yatuma kawashi kusaka Yosefwe ku zuwo lia ususu.

Falau yalweza yilota yenyi kuli Yosefwe ngwenyi: ‘Yami yingumona ngombe shimbiali atohwa nawa apema. Mba yingumona nawa ngombe shimbiali awangama nawa api a yifwaha-yifwaha. Mba ngombe waze te awangama yalia waze te atohwa.

‘Mu chilota chamuchiali, Yami yingumona mieho shimbiali yinene yipema yili ku chishachi chimuwika. Nawa yingumona mieho shimbiali yalela, yahuhuka. Alioze mieho yacho yalela nawa yahuhuka yiputuka kulia mieho yipema.’

Yosefwe yamba kuli Falau ngwenyi: ‘Yilota yeswe ni yaali yili ni ulumbunwiso umuwika. Ngombe shimbiali atohwa ni mieho shimbiali yinene yinalumbunuka miaka shimbiali, nawa ngombe shimbiali awangama ni mieho shimbiali yahuhuka yinalumbunuka miaka yikwo shimbiali. Mukukapwa miaka shimbiali ya kulia chinji mu Engitu. Mba hi mukukapwa nawa miaka shimbiali ya kutepuluka cha kulia.’

Kashika Yosefwe yamba kuli Falau ngwenyi: ‘Sakula umwe lunga wa mana hanga akunge kulia ha miaka shimbiali yipema. Chocho atu kechi kafwa ni zala ha kwiza cha miaka shimbiali yipi muze kulia muchikatepuluka.’

Falau yazanga shimbi yacho. Iye yasakula Yosefwe hanga akunge kulia ni kuchitulika. Mutu mulemu chinji mu Engitu te Falau, wamuchiali yapwa Yosefwe, lunga wa lufuma munji.

Ha kupalika cha miaka nake, ha mashimbu a zala, Yosefwe yamona amwe malunga kaneza. Yena unanyingika aya? Ayo kali 10 lia mandumbu ja Yosefwe! Tato Yakomba mwe unakaatuma mu Engitu, mumu kulia mu Kanana te hichahwamo. Yosefwe yeuluka mandumbu jenyi, alioze ayo kakamweulukile. Yena unanyingika mumu liaka? Mumu Yosefwe te hapwa mukulwana, nawa kuzala chenyi te hichapwa cheka.

Yosefwe yeuluka ngwo, muze iye te uchili mukweze kanakalota mandumbu jenyi kanaliumbu hashi kuli iye. Yena uneuluka yuma yacho? Kashika Yosefwe yanyingika ngwo kumana Zambi mwe wamutumine mu Engitu, ha chimwe chitela chipema. Kuchi yena wanyonga, yika Yosefwe anakalinga? Tutalenu.