YOSEFWE te uchili wika ni miaka 17 muze ayile nenyi mu Engitu. Kuzekwene yamulanjisa kuli umwe lunga jina lienyi te Potifwa. Potifwa te kakukalakalila mwanangana wa mu Engitu, yoze anavuluka ngwo Falau.

Yosefwe te kakukalakalila chinji mwene wene, Potifwa. Kashika muze Yosefwe te hakola, Potifwa yamusa ngwe kalayi wa yuma yeswe ku zuwo lienyi. Mba, mumu liaka Yosefwe ali mu zuwo lia ususu? Ha mukunda wa pwo lia Potifwa.

Yosefwe yapwa umwe lunga mupema ku mujimba ni ku meso, kashika pwo lia Potifwa yamuzanga hanga alipombe nenyi. Yosefwe te kananyingika ngwo chino chili chuma chipi chinji, kashika iye kakachilingile. Pwo lia Potifwa yevwa uli unji. Kashika muze mukwo-lunga ahetele ku zuwo, iye yalionga ngwenyi: ‘Yosefwe mutu mupi kamba kulipomba ni yami.’ Potifwa yatayiza mahuza jacho nawa yevwila Yosefwe uli unji. Kashika iye yasa Yosefwe mu zuwo lia ususu.

Kalayi yoze te wakufunga zuwo lia ususu yamona ngwo Yosefwe kumana te mutu mupema. Kashika iye yamusa ngwe kalayi wa funge eswe. Kulutwe lia yino yuma, Falau yevwila uli mukwa kumwaha musenge ni mukwa kumulingila mbolo, kashika yaasa mu zuwo lia ususu. Ha umwe ufuku, ayo eswe aali yapwa ni yimwe yilota, mba alioze te kaso kunyingika ulumbunwiso wa yilota yacho. Ha tangwa lize linakasuloho, Yosefwe yamba ngwenyi: ‘Ngulwezenu yilota yenu.’ Muze ayo hamulweza yilota yacho, Yosefwe, ni ukwaso wa Zambi yahana ulumbunwiso wa yilota yo.

Yosefwe yamba kuli mukwa kuhana musenge ngwenyi: ‘Ha kupalika cha matangwa atatu, yena makakuchiza mu zuwo lia ususu, mukapwa nawa mukwa kuhana musenge kuli Falau.’ Yosefwe yamba nawa ngwenyi: ‘Muze yena mutuhuka muno, ulweza kuli Falau hakutwala kuli yami, nawa ungukwasa kama hanga ngutuhuke mu chihela chino.’ Alioze kuli mukwa kulinga mbolo, Yosefwe yamba ngwenyi: ‘Ha kupalika cha matangwa atatu, Falau makakuteta mutwe.’

Ha kupalika cha matangwa atatu, yichipwa chochene ni kulita ni chize Yosefwe ambile. Falau yateta mutwe wa mukwa kumulingila mbolo. Alioze kuli mukwa kumwaha musenge, yamuchiza mu zuwo lia ususu yaputuka nawa kulingila mwanangana. Mba alioze iye yavulama Yosefwe! Iye kakalwezele kuli Falau hakutwala kuli Yosefwe, chocho iye yanunga mu zuwo lia ususu.