TALA! A-Izalele kanazauka Lwiji Yordau! Mba meya kulihi aya? Mumu ha kangonde wacho te kwakunoka vula munji ha mwaka, ha mashumbu wawene te lwiji kanazala too ni meya. Alioze, haliapwila meya hahuwa! A-Izalele kanazauka ha mavu omu ngwe chizechene azaukile Kalunga-lwiji Muchila! Mba meya eswe kulihi aya? Tutalenu.

Muze te mashimbu haheta kulu hanga A-Izalele azauke Lwiji Yordau, Yehova yamba kuli Yoshua hanga alweze kuli atu ngwo: ‘Asasendote ndo ande mushete wa usendo hanga aye nawo kulutwe lietu. Muze ayo masa molu jo mu Lwiji Yordau, mba meya mamana.’

Chocho asasendote yanda mushete wa usendo, yaya kulutwe lia atu eswe. Muze asasendote hanjila mu Lwiji Yordau, ayo yamana mu meya. Te kunapalika muhuji unene wa meya, nawa lwiji te musuku chinji. Hazehene muze ayo anjishile molu jo mu meya, meya yamana kupalika. Chili chimwe chikomokeso! Yehova kanakateta meya. Hi ha mashimbu akehe mu lwiji mwakapwile nawa meya!

Asasendote waze te anambate mushete wa usendo yaya ndo ha mashima ja lwiji muze te meya homa. Yena muhasa kwamona ha chizulie chino? Muze ayo te anamana hazehene, A-Izalele eswe yazauka Lwiji Yordau ha mavu omu!

Muze eswe te hazauka kulu, Yehova yatuma Yoshua kulweza kuli 12 a malunga a tachi jinji ngwenyi: ‘Njilenu mu lwiji haze ali asasendote ni mushete wa usendo. Nwande 12 a mawe hanga nwatumbike haze yenwe eswe munukapomba ufuku. Mba kulutwe lia matangwa, muze ana jenu makanuhula ngwo mawe wano yika analumbunuka, nukalweza ngwo, meya kanakamana kupalika muze mushete wa usendo wa Yehova wazaukile mu Yordau. Mawe wano masala ngwe cheulukiso cha chikomokeso chino!’ Yoshua ni neye yasa 12 a mawe ha mashima ja lwiji haze asasendote amanyine.

Mba hi Yoshua yamba kuli asasendote waze te anambata mushete wa usendo ngwenyi: ‘Tutukenu mu Yordau.’ Muze ayo hatutuka, meya yaputuka kupukumuka cheka.