TE HI kwapalika tukweji aali chize muze atuhukile mu Engitu, A-Izalele yaheta ku Mulundu wa Sinai, te kakuuvuluka nawa ngwo Horepe. Ha chihela chinochene he Yehova ahanjikile ni Mose ku chiputa cha mulengi wa kahia. Atu kanakalingoho matangwa anji.

Muze atu te anashimbwila, Mose yanyina ku mulundu. Kwenako, Yehova mba yahanjika ni Mose ngwo Iye kanazange hanga A-Izalele ononokene kuli Iye nawa apwe atu Jenyi apema. Muze Mose yasunuka, iye yalumbununa kuli A-Izalele yuma yeswe yize Yehova ambile. Nawa atu yamba ngwo mutwononokena kuli Yehova, mumu ayo te kanazange kupwa atu jenyi.

Mba Yehova yalinga chimwe chuma. Iye yatuhwisa mwishi helu lia mulundu, ni kukulunguza. Iye yamba nawa kuli atu ngwenyi: ‘Yami nguli Yehova, Zambi yenu yoze unakanutuhwisa mu Engitu.’ Kashika iye yaaha shimbi ngwo: ‘Kanda nuwayila niumwe zambi mukwo ndo yami wika.’

Zambi yahana nawa kuli A-Izalele shimbi jikwo livwa. Atu yevwa woma unji. Ayo yahanjika ni Mose ngwo: ‘Yena hanjika ni yetwe, mumu yetwe tuli ni woma wa Zambi nyi mahanjika ni yetwe mutufwa.’

Kulutwe lia yino yuma, Yehova yahanjika ni Mose ngwenyi: ‘Tweya kuli yami kuno ku mulundu. Yami mungukwaha yihanda yaali ya mawe, waze hingunasoneka shimbi jize yami ngunazange hanga atu ajikaule.’ Muze Mose akandukile ku mulundu. Yalinga ko 40 a matangwa ni ufuku.

Zambi kanakapwa ni shimbi jinji hanga te ahane kuli atu jenyi. Mose yasoneka shimbi jacho. Zambi yahana nawa kuli Mose yihanda yaali ya mawe. Zambi, iye mwene te hasonekoho kulu 10 lia shimbi hanga te ajilweze kuli atu eswe. Kakujivuluka ngwo Kumi lia Shimbi.

Kumi lia Shimbi jeswe jino jili ni ulemu unji. Mba alioze Zambi yahana shimbi jikwo jinji kuli A-Izalele. Shimbi jacho muli yimwe yize yinambe ngwo: ‘Ukazange Yehova Zambi ye ni mbunge ye yeswe, ni mwono we weswe, ni kunyonga che cheswe.’ Shimbi yikwo yinambe ngwo: ‘Ukazange mwenyembo we ngwe chize wakulizanga yena mwene.’ Mwana wa Zambi, Yesu Kristu, kanakamba ngwo Yehova kanakahana shimbi jino jinene jaali kuli Izalele. Kulutwe, mba mutukalilongesa chinji hakutwala kuli mwana wa Zambi ni malongeso jenyi.