YENA unamono yize analinga aha? Wano eswe kali tujita a Izalele. Malunga jacho kanahetama hanga anwe meya. Lunga unamana hakamwihi ni ayo jina lienyi Ngideone mukwa kuyula. Iye kanaatala chize ayo ananu meya.

Tala kanawa kunwa cha malunga awa chinalisa. Amwe kanachikula mitwe yo ndo ha meya. Alioze umuwika kanaswita meya ni kwoko lienyi hanga ahase kutala yize muyipwa kuli iye. Chino te chili ni ulemu, mumu Yehova te hanambe kuli Ngideone ngwo, ndo usakule wika malunga waze anatalatala ha kunwa meya. Zambi yamba ngwenyi, akwo eswe, ndo wahilwise ku zuwo. Tutalenu mumu liaka.

A-Izalele te hapwa nawa mu kapalia. Mumu ayo te kaso kwononokena kuli Yehova. Atu a ku Mindiane yaputuka kwayula ni kwamwesa lamba. Kashika A-Izalele yaputuka kukololoka kuli Yehova hanga akwase, mba Yehova yevwa kukololoka cho.

Yehova yatuma Ngideone hanga akunge yimwe mbunga ya maswalale, mba Ngideone yakunga 32,000 a tujita. Alioze, te kuli mbunga ya maswalale 135,000 a malunga hanga aliase ni Izalele. Mba alioze, Yehova yamba kuli Ngideone ngwenyi: ‘Malunga uli noo oka naye.’ Mumu liaka Yehova anakamba chocho?

Mumu te nyi Izalele makumba jita yacho, ayo te manyonga ngwo kayikumba ku tachi jo. Ayo te mahasa kunyonga ngwo chipwe Yehova katukwashile yetwe ene mutuyikumba. Kashika Yehova yamba kuli Ngideone ngwenyi: ‘Ambila malunga waze eswe anevu woma hanga ahiluke kwo ku zuwo. Muze Ngideone halinga chocho, 22,000 a tujita yahiluka ku zuwo. Iye yasala wika ni 10,000 a malunga a tujita hanga aliase ni 135,000 a maswalale akwa kole.

Alioze, panjika! Yehova yamba nawa ngwenyi: ‘Nihindu atu oka naye.’ Kashika iye yatuma Ngideone hanga eseke malunga jacho ha kunwa meya mu ka-lwiji aka, malunga eswe waze anachikula mitwe yo ha kunwa meya yaahilwisa ku zuwo. Yehova yalakenya ngwenyi: ‘Yami mungukwaha kukumba ni 300 a malunga waze atalatala ha kunwa meya.’

Mashimbu akuliasa jita yaheta. Ngideone yateta 300 a malunga jenyi mu yizavu yitatu. Iye yahana kuli malunga eswe yitavwi ni masoka mu chima lia milondo. Muze haheta ha muchima ufuku, ayo yajingilika chilombo cha akwa kole jo. Hazehene, ayo eswe hamuwika yemba yitavwi yo nawa yapopola milondo yo, ni kukololoka ngwo: ‘Katana wa Yehova ni wa Ngideone!’ Akwa kole jo muze halaula hi yaputuka kwivwa woma unji. Ayo eswe yaputuka kuchina, mba A-Izalele yakumba jita.