YENA unanyingika zuwo lino liaka? Yili yimwe mbalaka yipema ya uwayilo wa Yehova. Kakuyivuluka nawa ngwo tabernakulu. Atu kanakahwisa utungilo wayo muze te hikwapalika mwaka umuwika chize muze atuhukile mu Engitu. Yena unanyingika ni nyonga liaya anakayitunga?

Ni nyonga lia Yehova. Muze te Mose uchili ku mulundu wa Sinai, Yehova yamulweza chize mayitunga. Iye yamba ngwenyi yitunge nawa ndo yipwe yashi ha kuyisokwola. Yihanda yayo te mahasa kuyimbata ku chihela chikwo, ni kuyipachika nawa cheka. Kashika muze A-Izalele anakapwa ni kututulwoka mu chihela cheka ni cheka mu puya, ayo te kakumbata mbalaka yacho.

Nyi yena watala mukachi lia chipatulo chikehe kusongo lia mbalaka, muhasa kumona umwe mushete hanji kasha. Uno te kakuuvuluka ngwo mushete wa usendo. Helu lia mushete hali angelo aali hanji akerupimi akulinga ni oru, kali kumasongo eswe ni aali a mushete. Zambi yasoneka nawa Kumi lia Shimbi ha yihanda yaali ya mawe, mumu Mose te hanapalula atangu. Mawe jacho te kakwatulika muchima lia mushete wa usendo. Nawa mwapwile umwe musenge wa manaa. Yena uneuluka manaa yika?

Ndumbu ya Mose Arone yamusakula kuli Yehova hanga apwe sasendote wa lutwe. Iye te kakusongwela atu mu uwayilo wa Yehova. Ana jenyi noo te asasendote.

Haliapwila tala mu chipatulo chinene cha mbalaka. Chili chinene kaali keswe kuhianyisa kachipatulo kakehe. Yena unamona umwe mushete ukehe muze munatuhuka kamwishi? Chino che chilumbilo haze asasendote te akwochela chuma cha vumba lipema chize anavuluka ngwo insensu. Muli nawa chikwachilo cha ndeya chize chili ni temo shimbiali. Nawa chuma chamuchitatu chili mukachi ka chipatulo meza. Helu lia meza hali mbolo 12.

Muchipanga cha tabernakulu mwapwile yimwe mbashila yinene, te kakuyizalisa ni meya. Asasendote e te akusana meya jacho. Mwapwile nawa chilumbilo chinene. He te akwochela yimuna yize te ayo akushaha ngwe mulambu kuli Yehova. Mbalaka yacho te yatwama mukachi lia chilombo, cha A-Izalele.