TE hikwapalika miaka ni miaka—10 lia miaka, 20 a miaka, 30 a miaka, 39 a miaka! Nihindu A-Izalele te achili mu puya. Alioze, miaka yeswe ai Yehova yafunga atu jenyi. Iye yaalisa ni manaa. Iye ha mwalwa yaasongwela ni lelwa ha ufuku ni mulenge wa kahia. Ha miaka yeswe ai mazalo jo kakasuwikile chipwe molu jo kakajimbile.

Mba yikuheta kakweji mutangu wa 40 a miaka chize muze akatukile mu Engitu. A-Izalele yatwama nawa cheka ku Kandeshe. Hano he te apwile muze atumine 12 a ngendeshi ku chifuchi cha Kanana, muze te kanda achilinga 40 a miaka. Miriame ndumbu ya Mose wa pwo kanakafwila muzemwene mu Kandeshe. Chizechene ngwe ku mashimbu akunyima, hazehene yapwa ni kapalia.

Atu te kaso kuhasa kuwana meya. Kashika ayo yaputuka kulinyenyeta kuli Mose ngwo: ‘Mala kachi te muhapwa nyi tunakafwa. Mumu liaka unakatuchiza ku Engitu, hanga utunehe kuma kuno kushi kusoka mihuko? Kushi mbuto, kushi makuyu, kushi uva, kushi romana. Kushi meya akunwa.’

Muze Mose ni Arone haya ku tabernakulu hanga alembe, Yehova yamba kuli Mose ngwenyi: ‘Kungulula atu eswe hamuwika. Hanjika ku liwe ali lili kulutwe lia ayo eswe. Mukutuhuka meya anji hanga atu eswe ni yimuna yo anwe.’

Hi Mose yakungulula atu eswe, mba yamba ngwenyi: ‘Panjikenu yenwe kunushi kujikijila kuli Zambi! Shina Arone ni yami mutunutuhwishila meya ku lino liwe nyi?’ Hohene Mose yalamba mukombo wenyi kaali keswe ku liwe liacho, mba yikutuhuka muhuji wa meya anji. Kapwile meya anji akunwa waze te makumbana kuli atu ni yimuna.

Alioze, Yehova yevwila Mose ni Arone uli unji. Yena unanyingika mumu liaka? Mumu Mose ni Arone kanakamba ngwo ayo e matuhwisa meya ku liwe. Kumana, Yehova mwe unakatuhwisa meya jacho. Ha kuhona kuhanjika umwenemwene hakutwala ku yuma yino, Yehova yamba ngwo maamwesa lamba. Yehova yaamba nawa ngwo ‘Yenwe kunuchi kusongwela nawa atu jami mu chifuchi cha Kanana.

Kulutwe lia matangwa A-Izalele yahichika Kandeshe. Hakupalika cha matangwa, ayo yaheta ku mulundu wa Shinare. Hohene kusongo lia mulundu, Arone yafwa. Iye kapwile ni 123 a miaka muze afwile. A-Izalele yapwa ni yinyengo yinji nawa yalila Arone ha 30 a matangwa. Mwanenyi Eleazare, yapwa Sasendote wa lutwe wa vungu lia Izalele.