TALA yitemo ni amendoa yinachila ku mukombo au, hanji mutango. Uno uli mukombo wa Arone. Yitemo ni mihuko yino yinachila yasokanga ku mukombo wa Arone ha ufuku umuwika! Tutalenu mumu liaka.

A-Izalele te henda mu puya amwe matangwa anji. Atu akwo te haputuka kunyonga ngwo Mose katambile kupwa kasongwelo wo, nawa ni Arone neye te katelele kupwa sasendote wa lutwe. Kora te kali umwe wa kuli waze anyongene chocho, nawa ni Ndatane, Apirame hamwe ni 250 a tusongwelo ja atu. Ayo eswe yaya kuli Mose nawa yamba ngwo: ‘Mumu liaka yena unalisa helu lia yetwe eswe?’

Mose yamba kuli Kora ni kuli tumbaji twenyi ngwenyi: ‘Hamene chimene, munwanda yikwachilo ya kahia munusamo insensu. Mba nukeze ku tabernakulu ya Yehova. Mutukatala iya yoze Yehova makasakula.’

Tangwa lize linakasulaho, Kora ni tumbaji twenyi 250 yeza ku tabernakulu. Nawa kunakeza atu akwo anji hanga akwase malunga jacho. Yehova yevwa uli unji. Mose yamba ngwenyi: ‘Sosolokenu ku mambalaka ja malunga wano api. Kanda nukwata ni chimwe cha kuli ayo.’ Atu yevwako, nawa yasosoloka ku mbalaka ya Kora, Ndatane ni ya Apirame.

Hohene Mose yamba ngwenyi: ‘Mba yenu mununyingika yiya yoze Yehova hanasakula. Hashi muhapulika nawa muhamina malunga wano api.’

Muze Mose hamanyisa kuhanjika, hashi yihapulika. Mbalaka ya Kora ni yuma yenyi yeswe ni ya Ndatane ni Apirame ni waze eswe apwile no yanjila mwishi lia mavu, mba ayo eswe yaashikila mu mavu. Muze atu evwile miteto ya waze te ananjila mu mavu, ayo yamba ngwo: ‘Tuchinenu! Hanga hashi hachine kutumina ni yetwe!’

Kora ni tumbaji twenyi 250 te achili hakamwihi ni tabernakulu. Kashika Yehova yatuma kahia, hohene ayo eswe yawema. Hohene Yehova yamba kuli mwana wa Arone, Eleazare hanga ande yikwachilo ya kahia ya atu waze afwa, hanga ayitungile chilumbilo. Chilumbilo chino te chakukalakala ngwe utowezo kuli A-Izalele, kashika Arone ni anenyi ayo e te makalakala ngwe asasendote a Yehova.

Mba Yehova te kanazange kuhana ushindakenyo ngwo Arone ni anenyi e iye anakasakula hanga apwe asasendote. Nawa iye yamba kuli Mose ngwenyi: ‘Hanjika ni tusongwelo eswe a minyachi ya Izalele hanga eze ni mikombo yo. Ku munyachi wa Levi, Arone ni iye anehe mukombo wenyi. Munusa mikombo yeswe mu tabernakulu kulutwe lia mushete wa usendo. Mukombo wa lunga yoze Yami hingunasakula ngwe sasendote kumuusoka yitemo.’

Chimene chize chinakasuloho, muze Mose ayile ni kuyitala, yawana mukombo wa Arone kuli yitemo ni amendoa jachila kulu! Haliapwila yena muhasa kunyingika mumu liaka Yehova anakasokesa yitemo ku mukombo wa Arone?