MU Mbimbiliya muli umwe mukanda anavuluka ngwo Rute. Chino chili chimwe chishima cha amwe asoko waze te atwama ha mashimbu waze A-Izalele te achili ni akwa kuyula. Rute te umwe mwana pwo wa ku chifuchi cha Moape; iye te hi wa ku vungu lia Zambi ko, Izalele. Alioze, muze Rute anyingikine hakutwala kuli Zambi wamwenemwene Yehova, iye yaputuka kupwa ni zango linji hali Yehova. Noemi te umwe pwo kashinakaji, iye mwe wakwashile Rute hanga anyingike Yehova.

Noemi te umwe pwo Ka-Izalele. Iye ni mukwo-lunga, ni ana jenyi aali yaya ni kutunga ku chifuchi cha Moape, mumu mu Izalele te kulia chikehe chilimo. Kulutwe lia matangwa lunga lia Noemi yafwa. Hi mba ana ja Noemi yambata ana-mapwo aali A-Moape, majina jo te Rute ni Orpa. Alioze, muze te hikwapalika 10 lia miaka, ana a malunga aali ja Noemi yafwa. Noemi ni ana-mapwo aali yanyenganyana chinji! Yika mba te Noemi malinga?

Limwe tangwa Noemi yanyonga kuhiluka kuli atu jenyi. Rute ni Orpa te kanazange kutwama nenyi hamuwika, kashika ni ayo yamukaula. Alioze muze te haheta ndambu kusuku mu tapalo, Noemi yamba kuli atembwa-anenyi ngwenyi: ‘Hilukenu ku mazuwo ja anoko.’

Chocho, Noemi yahana mbeju kuli atembwa-anenyi hanga alishike no. Ayo yaputuka kulila, mumu te ayo kakuzanga chinji Noemi. Ayo yamba ngwo: ‘Hi chocho ko! Mutuya ni yena kuli atu je.’ Alioze Noemi yaakumbulula ngwenyi: ‘Yenwe ndo nuhiluke, ana jami. Muchipwa chipema nyi nwahiluka ku zuwo.’ Mba hi Orpa yafuna ku zuwo. Alioze Rute kakafunyine.

Noemi yatala kuli iye yamba ngwenyi: ‘Orpa hafuna. Ni yena funa kwe.’ Alioze Rute yamukumbulula ngwenyi: ‘Kanda ungushinjila hanga ngukuhichike! Ngweche nguye ni yena! Kweswako yena muoya, ni Yami munguya, nawa kweswako yena mutwama ni Yami mungutwama. Atu je kumakapwa atu jami, nawa Zambi ye kumakapwa Zambi yami. Kweswako yena mukafwila, ni yami kokwene kwe mungukafwila, akangufunde kokwene.’ Muze Rute hamba chocho, hi Noemi yecha kumushinjila hanga afune ku zuwo.

Mba hi mapwo wano aali yaaheta ku Izalele. Ayo yatunga kuzekwene. Rute yaputuka kukalakala mu minda, mumu te ha mashimbu akuhela sevada. Umwe lunga jina lienyi Mboaze yecha Rute hanga ahele sevada mu minda yenyi. Yena unanyingika naye ya Mboaze te iye? Te Rahape, wa mu mbonge ya Yeriku.

Limwe tangwa Mboaze yamba kuli Rute ngwenyi: ‘Yami hinevwa yuma yeswe hakutwala kuli yena, ni umbovu uze yena ulinawo hali Noemi. Yami ngunanyingika chize yena wahichika tatenu ni noko, ni chifuchi che, hanga wize utwame ni atu waze te kanda uchinyingika. Yehova awahilile hali yena!’

Rute yakumbulula ngwenyi: ‘Mwata yena uli ni umbovu unji kuli yami. Yena wangwaha chiseke chinji hakuhanjika ni yami.’ Mboaze yazanga chinji Rute, nawa yikupalika mashimbu akehe ayo yalimbata. Chino chinakaneha chiseke chinji kuli Noemi! Nawa Noemi kanakawahilila chinji muze Rute ni Mboaze anakasema mwana mutangu, yamuluka jina ngwo Opete. Hi kulutwe lia matangwa, Opete yapwa kako ya Ndawichi, mutukalilongesa chinji kulutwe hakutwala kuli Ndawichi.