KANUKE au mupema nyi? Jina lienyi Samuele. Lunga au unakwata ha mutwe wa Samuele jina lienyi Eli, sasendote wa lutwe wa Izalele. Tato ya Samuele Elekana ni naye Hana kananeha Samuele kuli Eli.

Samuele te uchili wika ni miaka yiwana hanji yitano. Alioze iye te matwama ku tabernakulu ya Yehova, hamuwika ni Eli ni asasendote akwo. Mumu liaka Elekana ni Hana anahana mwana mukehe chize Samuele hanga alingile Yehova mu Tabernakulu? Tutalenu.

Ku miaka ya kunyima, Hana te kakunyenganyana chinji. Mumu te keshi kusema, alioze iye te kakuzanga chinji kupwa ni umwe mwana. Limwe tangwa Hana yaya ku tabernakulu ya Yehova, iye yalemba ngwenyi: ‘Yehova, kanda unguvulama kama! Nyi yena wangwaha umwe mwana, Yami ngunakulakenya ngwami mungukakwahayo hanga akulingile ha miaka yeswe ya mwono wenyi.’

Yehova yakumbulula kulemba cha Hana, hi kulutwe lia tukweji iye yashita Samuele. Hana te kakuzanga chinji mwanenyi, nawa iye yaputuka kumulongesa shimbi ja Yehova muze te uchili kanuke. Iye yalweza mukwo-lunga ngwenyi: ‘Muze Samuele makola nawa masumuka, yami mungumutwala ku tebernakulu hanga alingile Yehova kuzekwene.’

Yenayi tunamono ha chizulie chino Elekana ni Hana analingi. Nawa Samuele te kakumufumba kanawa kuli yesemi jenyi, iye te kakuwahilila chinji kulingila Yehova muzemwene mu mbalaka ya Yehova. Miaka yeswe Hana ni Elekana te kakuyaya ni kuwayila mu mbalaka yacho yipema, nawa ni kumeneka mwano. Nawa miaka yeswe Hana te kakunuka chimwe chikuto chaha chize kuchishi moko hanga achitwale kuli Samuele.

Samuele kanakalingila Yehova mu tabernakulu ha miaka yinji, iye te kakumuzanga chinji kuli Yehova ni kuli atu. Alioze ana ja sasendote wa lutwe Eli, Hofni ni Finehase te api. Ayo te kakulinga yuma yipi, nawa te kakupiangula akwo hanga ashililike kuli Yehova. Eli kachi te kanakaachiza mu usasendote, alioze iye yeecha.

Mukweze Samuele kakechele ngwo yuma yipi yize te akulinga mu tabernakulu kuli akwo yimukwike kulingila Yehova. Alioze atu akehe te akwete zango lia umwenemwene kuli Yehova, kashika te hikwapalika miaka yinji chize muze Yehova ahanjikile ni umwe mutu. Muze te Samuele hakola ndambu, yikupwa chimwe chuma:

Samuele te kanapombo mu tabernakulu, limwe liji yilimusanyika. Iye yakumbulula ngwenyi: ‘Yami uno.’ Yahinduka yaya kuli Eli yamba ngwenyi: ‘Yami uno, yena wangusanyika, kashika Yami neza.’

Alioze Eli yamukumbulula ngwenyi: ‘Yami chakusanyikine; yako upombe.’ Samuele yafuna ni kupomba.

Liji liacho yiliza nawa kamuchaali yilimusanyika ngwo: ‘Samuele!’ Hohene Samuele yahinduka yaya nawa kuli Eli. Iye yamba ngwenyi: ‘Yami uno, yena wangusanyika, kashika yami neza.’ Alioze Eli yamukumbulula ngwenyi: ‘Yami chakusanyikine, mwanami. Yako kwe upombe. Mba Samuele yafuna ha muhela.

Liji yilimusanyika nawa kamuchitatu ngwo: ‘Samuele!’ Hohene Samuele yaya kuli Eli. Iye yamba ngwenyi: ‘Yami uno, yena mwe wangusanyika nawa.’ Hazehene Eli yanyingika ngwo, kota Yehova unamusanyieka. Kashika Eli yamba kuli Samuele ngwenyi: ‘Yako upombe, nyi makusanyika nawa, yena ndo utayize ngwo: “Amba Yehova, mumu kavumbi ke kanapanjika.”’

Che Samuele anakakumbulula muze Yehova anakamusanyika nawa. Yehova yalweza Samuele ngwenyi, lamba munguneha kuli Eli ni kuli ana jenyi. Kulutwe lia matangwa, Hofni ni Finehase yafwila mu jita yize te anase ni A-Filistea, muze achilwezele kuli Eli, hohene iye yalimbuka, yamakuka kota ni neye yafwa. Ha yino yuma, liji lia Yehova yilipwa lia umwenemwene.

Samuele yakola yapwa mukwa kuyula wa kasula mu Izalele. Muze iye te hapwa kashinakaji, atu yamwita ngwo: ‘Sakula umwe mwata hanga ayule hali yetwe.’ Samuele kakazangile kuchilinga, mumu Yehova te mwe mwata wo. Alioze Yehova yamwamba ngwenyi, panjika atu.