MUMU liaka yipanga ya Yeriku yinapuzuka? Yinapu ngwe mbomba akongako. Alioze ha matangwa jacho mbomba te jatwamineko; chipwe mata a kahia te katwamineko. Chino chili chikomokeso chikwo cha Yehova! Tulilongesenu chize yino yinakapwa.

Evwa yize Yehova ambile kuli Yoshua: ‘Yena ni maswalele je munujinga mbonge. Ha tangwa munuyijinga kamuwika ndo ha tangwa liamuchisambano. Munumbata mushete wa usendo hamwe ni yenwe. Asasendote shimbiali ndo maya kulutwe nawa memba yitavwi yo.

‘Ha tangwa lia muchishimbiali yenwe ndo munujinguluka mbonge yisuho shimbiali. Mba munwimba chikolo yitavwi, nawa yenwe eswe munukololoka chikolo ngwe jita. Chocho mba yipanga ya Yeriku muyikapuzuka!’

Yoshua ni atu akwo yalinga yize Yehova anakalweza. Muze ayo te anajinga, eswe yahola kulu. Niumwe kakahanjikile. Eswe yevwa wika kwimba cha yitavwi ni mishindo ya yiliato. Akwa kulimika ni atu ja Zambi mu Yeriku kota kanakevwa woma unji. Yena unamono lungoji auze muchila ha kapenda? Kapenda wacho waya? Ewa, Rahape yalinga chize amulwezele kuli ngendeshi waze aali. Asoko jenyi eswe kanakatwama mu zuwo lienyi ni kutala.

Mba hi ha tangwa lia muchishimbiali, muze hajinguluka mbonge yisuho shimbiali, yemba yitavwi, maswalele yakololoka, mba yipanga yipuzuka. Hohene Yoshua yamba ngwenyi: ‘Shahenu eswe ali mu mbonge nawa yochenu. Ochenu yuma yeswe. Shina wika prata, oru, unengu ni utale, yitulikenu hanga nukayiwezele ha upite mu mbalaka ya Yehova.

Yoshua yamba kuli ngendeshi aali ngwenyi: ‘Yenu ku zuwo lia Rahape, hanga numuchizemo iye hamuwika ni asoko jenyi.’ Rahape ni asoko jenyi yaalamwina, ngwe chize ngendeshi anakamulakenya.