TALA mihuko anambata kuli malunga wano. Tala kama utohwe wa chisunge achi cha uva. Ndo malunga aali, mba mahasa kuchimbata ku mutondo. Tala nawa makuyu ni romana. Kulihi kunakatuka mihuko yipema chize? Yinakatuka mu chifuchi cha Kanana. Euluka ngwo mu Kanana mwe te atunga Apalahama, Izake, ni Yakomba. Alioze ha mukunda wa zala yize yinakapwamo, Yakomba ni asoko jenyi, yaya ni kutunga mu Engitu. Kashika hakupalika cha miaka 216, Mose yasongwela A-Izalele hanga afune mu chifuchi cha Kanana. Ayo yaheta ha chimwe chihela mu puya chize anavuluka ngwo Kandeshe.

Atu a mu chifuchi cha Kanana te kakwete mbunge jipi. Kashika Mose yatuma ko ngendeshi 12, nawa yaalweza ngwenyi: ‘Fupenu kunyingika atu angahi atungamo, nawa tachi jika ayo akwete. Fupenu kunyingika nyi mavu jamo kali apema, nawa nyi kakukolesa mbuto. Nawa nunehako yimwe mihuko.’

Muze ngendeshi anakafuna ku Kandeshe, ayo yalweza Mose ngwo: ‘Chamwenemwene chili chimwe chifuchi chipema.’ Ha kusolola umwenemwene wacho, ayo yaneha yimwe mihuko hanga alweze Mose. Alioze 10 lia ngendeshi yijamba ngwo: ‘Atu waze atungamo kali anene-anene nawa tachi jinji akwete. Yetwe makatushaha nyi tweseka kutambula chifuchi.’

A-Izalele yevwa woma ha kwivwa maliji wano. Ayo yamba ngwo: ‘Te chipema tufwile kwetu mu Engitu hanji mu puya. Yetwe mutukafwila ku jita, mapwo jetu ni ana jetu makaakwata. Tusakulenu kasongwelo mwaha ha chihela cha Mose, hanga tufune mu Engitu!’

Alioze ngendeshi aali yajikijila kuli Yehova, nawa yeseka kuhumikiza atu. Ayo majina jo te Yoshua ni Kalemba. Ayo yamba ngwo: ‘Kanda nwivwa woma. Yehova kali hamwe ni yetwe. Muchikapwa chashi kutambula chifuchi chacho.’ Alioze atu te kasokutayiza. Ayo yazanga kushaha Yoshua ni Kalemba.

Yehova yevwa uli unji, nawa iye yamba kuli Mose ngwenyi: ‘Atu eswe waze ali ni miaka 20 hanji kuhianisa kechi kanjila mu chifuchi cha Kanana. Ayo kanakamona yikomokeso yize yami ngunakalinga mu Engitu ni mu puya, alioze ayo nihindu kaso kujikijila kuli yami. Kashika ayo malijingajinga mu puya ha 40 a miaka, ndo ha kufwa cho. Yoshua ni Kalemba wika e makanjila mu chifuchi cha Kanana.’