MUZE mwanangana Joroboame te hafwa, mianangana eswe te akuyula 10 lia minyachi ya kusango ya Izalele te api. Mwanangana Ahabe te mupi chinji kuhianyisa akwo eswe. Yena unanyingika mumu liaka? Ha mukunda wa pwo lienyi, Jezebele mwe mwanangana-wa-pwo.

Jezebele te hi Ka-Izalele ko. Iye te mwana wa mwanangana wa A-Sendone. Iye te kakuwayila Mbale zambi wa mahuza, nawa iye yashinjila Ahabe ni A-Izalele akwo hanga awayile Mbale. Jezebele te kakwivwila chinji Yehova kole, kashika iye ashahile maprofeta anji ja Zambi. Alioze akwo yaswama mu yimwe yivwenge hanga achine kwashaha. Muze Jezebele te akuzanga chuma cheswacho, iye hanji te kakushaha mwenyacho hanga achitambule.

Tangwa likwo mwanangana Ahabe te kananyenganyana chinji. Jezebele yamuhula ngwenyi: ‘Mumu liaka yena musono unanyenganyana?’

Ahabe yakumbulula ngwenyi: ‘Mumu ha yize Nabote angwamba. Yami nazanganga kulanda munda wenyi wa vinyu. Alioze iye kangwamba ngwo ka.’

Jezebele yamulweza ngwenyi: ‘Kanda ulipikala. Yami mungukutambwilawo.’

Chocho Jezebele yasoneka mikanda kuli amwe makulwana a mu mbonge yize te atwama Nabote. Iye yamba ngwenyi: ‘Tumenu amwe malunga api hanga ambe kuli Nabote ngwo iye kashililika kuli Zambi ni kulli mwanangana. Mba munukwata Nabote munumutwala haze lia mbonge hanga numushehe ni mawe.’

Muze Jezebele hevwa ngwo Nabote hafwa, yalweza kuli Ahabe ngwenyi: ‘Katuka hanga uye ukazuke munda wa vinyu wa Nabote.’ Kuchi yena wanyonga, Jezebele te kanatela kumumwesa lamba ha yize alinga, nyi?

Mba kulutwe lia matangwa, Yehova yatuma Jehu hanga amumwese lamba. Muze Jezebele hevwa ngwo Jehu kaneza iye yalulieka meso jenyi nawa yafupa kulipwisa mupema. Alioze muze Jehu ahetele yamona Jezebele kali helu lia kapenda, Jehu yamba kuli malunga waze te ali mu zuwo ngwenyi: ‘Muhololenu hashi!’ Malunga jacho yatayiza, ngwe chize yena unamono ha chizulie. Ayo yamuholola hashi, chocho iye yafwa. Chino che kusula cha mwono wa Jezebele mwanangana-wa-pwo.