YENA unanyingika mumu liaka lunga au analembe kuli Yehova? Mumu liaka iye anase mikanda ai kulutwe lia chilumbilo cha Yehova? Lunga au jina lienyi Hezekia. Iye kali mwanangana wa ku uto wa minyachi yaali ya Izalele. Nawa iye kali mu umwe kapinda unene. Mumu liaka?

Mumu te yizavu ya maswalale A-Asuria te hiyanongesa kulu 10 lia minyachi ya kusango. Yehova kanakecha hanga chino chilingiwe mumu atu jacho te hapwa api. Yizavu ya maswalale A-Asuria yiyiza nawa hanga yiliase jita ni wanangana wa minyachi yino yaali.

Mwanangana wa Asuria yatuma mikanda kuli Mwanangana Hezekia. Mikanda yacho ye Hezekia anasolola kuli Zambi. Mikanda yino te yinasosomba Yehova, nawa te yinatuma Hezekia hanga alitwamine kwasa jita. Kashika Hezekia yalemba ngwenyi: ‘Yehova, tulamwine kama kuli mwanangana wa Asuria. Chocho mavungu eswe makanyingika ngwo yena mwe Zambi wika.’ Shina Yehova kanakevwa yilemba ya Hezekia?

Hezekia te umwe mwanangana mupema. Iye kakapwile ngwe mianangana api a 10 lia minyachi ya Izalele, hanji ngwe tato Ahaze, Mwanangana mupi. Hezekia kanakononokena kanawa shimbi ja Yehova. Kashika, muze Hezekia hamanyisa kulemba, profeta Izaia yatuma sango jino ja Yehova kuli iye ngwenyi: ‘Mwanangana wa Asuria kechi kanjila mu Yerusaleme. Niumwe wa kuli maswalale jenyi makakundamako wakwihi. Ayo kechi kasa niumwe mwivwi mu mbonge.’

Tala ha chizulie chize chili ha lifwo lino. Yena unanyingika maswalale eswe awa hafwa aya? Ayo kali A-Asuria. Yehova yatuma mungelo wenyi, nawa ha ufuku umuwika mungelo wacho yashaha 185,000 a maswalale A-Asuria. Hohene mwanangana wa Asuria yafuna ku zuwo lienyi.

Wanangana wa minyachi yaali yaulamwina, nawa atu yapwa ni ukulungunga ha amwe mashimbu. Mba muze te Hezekia hafwa, mwanenyi Manase yapwa mwanangana. Manase ni mwanenyi Amone ayo eswe ni aali jinakapwa mianangana api. Chifuchi yichizala to ni utoji nawa ni upupilo unji. Muze mwanangana Amone hamushaha kuli tuvumbi twenyi, mwanenyi Josia yapwa mwanangana mu wanangana wa minyachi yaali.