MWANANGANA Nabukanezore yatwala mu Babilonia A-Izalele eswe waze te akufumba kanawa. Kulutwe lia matangwa, mwanangana yasakula akweze waze apema nawa alimuka. Yena muhasa kumona akweze jacho awana ha chizulie achi. Mutangu mwe Daniele, ni akwo atatu waze A-Babilonia anakaluka majina ngwo Sadrake, Meshake, Abedenego.

Nabukanezore yanyonga kululieka akweze jacho hanga akalakale ku zuwo lienyi. Muze te miaka yitatu ya fumbo hiahwa, iye yasakula wika akweze waze alimuka hanga amukwase ku milonga yenyi. Muze te ayo anatambula fumbo Mwanangana te kanazange hanga akweze jacho apwe ni tachi nawa ni mijimba yipema. Kashika iye yatuma tuvumbi twenyi hanga ahane kuli ayo eswe vinyu ni kulia chipema, ngwe chize iye ni asoko jenyi te akulia.

Tala kuli mukweze Daniele. Yena unanyingika yika iye analweze kuli Ashepenaji, mukwa lutwe wa tuvumbi? Daniele te kanamulweze ngwo iye keshi kuzanga kulia yuma yiyema ya ku meza ya mwanangana. Hohene, Ashepenaji yaputuka kulihulumba. Iye yamba ngwenyi: ‘Mwanangana hanakwata chiyulo ha yize munulia ni yize mununwa. Nawa nyi yenwe kunwapwile ni mijimba yipema ngwe akweze akwo, iye mahasa kungushaha.’

Mba Daniele yahanjika ni kafunga yoze Ashepenaji asele hanga atale iye ni masepa jenyi. Iye yamba ngwenyi: ‘Tunaliumbu, twesekenu kama ha 10 lia matangwa. Twehenu wika yilimalima hanga tulie ni meya hanga tunwe. Mba kulutwe lia matangwa munutweseka ni akweze akwo waze anali kulia cha mwanangana, hanga nutale aya waze matuhuka ni mijimba yipema.’

Kafunga yachitayiza. Hakuhwa cha 10 lia matangwa, Daniele ni masepa jenyi atatu yasoloka ni tachi jinji kuhianyisa akweze akwo eswe. Hohene kafunga yanunga ni kwaaha yilimalima hanga alie, hi kaahele nawa kulia cha mwanangana.

Hi kusongo lia miaka yitatu, akweze eswe yaatwala kuli Nabukanezore. Muze mwanangana hahwisa kuhanjika ni ayo eswe, iye yamona ngwo Daniele ni masepa jenyi atatu kanalimuka chinji. Hohene iye yasala noo ku zuwo lienyi hanga amukwase. Nawa muze mwanangana te akuhula hanji kusolola umwe mulonga kuli Daniele, Shadrake, Meshake ni Abedenego ayo te kakunyingika ha 10 lia yisuho kuhianyisa asasendote hanji atu jenyi akwa mana.