TALA Samuele kanazujila maji ha mutwe wa umwe lunga. Te che ayo akulinga hanga asolole ngwo mutu wacho kamusakula hanga apwe mwanangana. Yehova yalweza Samuele hanga azujile maji ha mutwe wa Saulu. Maji jacho apema nawa a vumba lipema.

Saulu te kaso kunyonga ngwo mahasa kupwa mwanangana. Kashika iye yakumbulula kuli Samuele ngwenyi: ‘Yami nguli wa ku munyachi wa Mbenjamine, umwe munyachi ukehe wa Izalele. Mumu liaka yena unambe ngwo Yami mungupwa mwanangana?’ Yehova te kakuzanga chinji Saulu mumu iye te keshi kuzanga kulifumanyisa chipwe kulilemesa. Kashika Iye anakasakula Saulu hanga apwe mwanangana.

Alioze Saulu te hi chiswale ko, hanji lunga wa ngwaza ka. Asoko jenyi te pichi, nawa iye te lunga musuku mupema kumeso. Iye te musuku chinji kuhianyisa akwo eswe mu Izalele! Saulu nawa te kakuzomboka chinji nawa te chitakame. Atu yawahilila chinji muze anakamusakula kuli Yehova hanga apwe mwanangana. Ayo eswe yaputuka kukololoka ngwo: ‘Vulie mwanangana wetu!’

Akwa kole ja Izalele te kananungu ni tachi jeswe. Ayo nihindu te kanapinjisa chinji A-Izalele. Ha mashimbu akehe muze te Saulu hamusa ngwe mwanangana, A-Amone yeza ni kuliasa no jita. Alioze Saulu yakunga yimwe mbunga yinene ya maswalale yaya ni kuliasa ni A-Amone, chocho iye yaakumba. Ha yino atu yawahilila chinji hakupwa ni Saulu ngwe mwanangana.

Ha kupalika cha miaka, Saulu yasongwela A-Izalele ha ukumbilo unji wa akwa kole jo. Saulu nawa te kakwete umwe mwana wa hamu linji jina lienyi te Jonata. Ni Jonata neye kanakakwasa Izalele kukumba jita jinji. Akwa kole asasu chinji A-Izalele te A-Filistea. Limwe tangwa, tununu a tununu ja A-Filistea yeza hanga aliase ni A-Izalele.

Samuele yamba kuli Saulu hanga amushimbwile, mba iye ahane mulambu hanji chitapo kuli Yehova. Alioze, Samuele te kaso kwiza kawashi. Saulu yapwa ni woma ngwo A-Filistea maputuka jita, kashika yahana mulambu iye mwene. Muze Samuele heza, iye yamba kuli Saulu ngwo yena wehuka. Samuele yamwamba nawa ngwenyi: ‘Yehova makasakula mutu mweka hanga apwe mwanangana mu Izalele.’

Kulutwe lia matangwa Saulu yehuka nawa. Mba Samuele yamwamba ngwenyi: ‘Kwononokena kuli Yehova kuchahiana kulambula panga mupema. Amu yena kuwononokene kuli Yehova, kashika Yehova makuchiza wanangana wa Izalele.’

Yetwe mutuhasa kulilongesa limwe fumbo lipema ha yino yuma. Yino yinatulongesa ngwo chili chilemu chinji kwononokena kuli Yehova matangwa eswe. Nawa yinatulongesa ngwo mutu mupema, ngwe Saulu mahasa kupwa mupi. Yetwe twazangile hanga tupwe atu api, nyi ngwami?