SOLOMONE te uchili mukweze muze apwile mwanangana. Iye te kakuzanga chinji Yehova nawa te kakukaula shimbi jipema jize tato Ndawichi amulongesele. Yehova yawahilila chinji ni Solomone, kashika ha umwe ufuku mu chilota chenyi Yehova yamuhula ngwenyi: ‘Solomone, yika unazange hanga yami ngukwehe?’

Ha chino Solomone yakumbulula ngwenyi: ‘Yehova Zambi yami, yami nguchili kanuke chinji chanyingikene kuyula. Kashika ngwehe kama mana hanga nguhase kuyula atu je kanawa.’

Yehova yawahilila chinji ha yize Solomone echile kuli iye. Chocho Yehova yamba ngwenyi: ‘Amu yena weta mana kuwetele mwono wa miaka yinji, chipwe upite ka, yami mungukwaha mana anji waze niumwe kanda achipwa kama no. Alioze yami mungukwaha nawa yuma yize yena kuwechile, upite ni uhenya.’

Ha mashimbu akehe mapwo aali yeza kuli Solomone ni umwe mulonga. Umwe yalumbununa ngwenyi: ‘Pwo au katwana ku zuwo limuwika ni yami. Yami yingusema umwe mwana wa lunga, mba hakupalika cha matangwa aali ni neye yasema umwe mwana wa lunga. Alioze ha umwe ufuku mwanenyi yafwa. Mba muze te yami ngunapombo, iye yasa mwanenyi wa kufwa ku sali liami, hi yanda wa yami. Muze yami hinahinduka yingumona mwana hafwa, alioze yingunyingika ngwo auze te hi mwanami ko.’

Pwo mukwo yamba ngwenyi: ‘Ka! Mwana wa mwono ni wami, mufu ni wenyi!’ Pwo mutangu yamba ngwenyi: ‘Ka!’ Mwana wa kufwa mwe ni wenyi, alioze wa mwono ni wami!’ Chenacho mapwo jacho anakazwela. Yika Solomone anakalinga?

Iye yatuma hanga anehe yimwe njangu, muze hayineha iye yamba ngwenyi: ‘Tetenu mwana au wa mwono mu yihanda yaali, nawa hanenu kuli mapwo wano yihanda ya mwana wacho.’

Naye ya mwana wa mwono yateta ngwenyi: ‘Ka! Ngunaliumbu kanda nushaha mwana. Muhanenu kuli iye!’ Alioze pwo mukwo yamba ngwenyi: ‘Kanda numuhana kuli niumwe wa kuli yetwe; mutetenu ha yihanda yaali.’

Hohene, Solomone yamba ngwenyi: ‘Kanda nushaha mwana! Muhanenu kuli pwo mutangu. Iye mwe naye wamwenemwene.’ Solomone yanyingika ngwo naye wamwenemwene te kakuzanga chinji mwanenyi, kashika pwo wacho anakazanga kumuhana kuli pwo mukwo hanga achine kumushaha. Muze atu evwile chize Solomone apatwile mulonga wacho, ayo yevwa chiseke chinji ha kupwa ni umwe mwanangana wa mana.

Mu wanangana wa Solomone, Zambi yawahisa chinji atu ha kutatwisa mbuto, ja tiliku, sevada, makuyu, uva ni kulia chikwo chipema. Atu te kakuzala mazalo apema nawa te katwama mu mazuwo apema. Te mukwete yuma yinji yipema yize te yakukumbana kuli atu eswe.