YENA unanyingika malunga wano aya, nawa yika ayo analinga? Ayo kanayi ni kwasa jita, alioze malunga waze ali kulutwe kanembi. Hanji yena muhasa kulihula ngwo: ‘Mumu liaka akwa kwimba kasokumbata tutana ni kunga ya kwasa nayo jita?’ Tutalenu mumu liaka.

Yehosofate te mwanangana wa minyachi yaali ya Izalele. Iye kanakatwama ha mashimbu ja mwanangana Ahabe ni Jezebele a ku 10 lia minyachi. Alioze Yehosofate hamwe ni tato Asa te amwe mianangana apema. Kashika, ha miaka yinji atu a ku wanangana wa ku uto wa minyachi yaali te katwama kanawa.

Alioze yikupwa chimwe chuma chize chinakevwisa A-Izalele woma. Yikwiza amwe mikeji ni kulweza kuli Yehosofate ngwo: ‘Chimwe chizavu chinene cha maswalale a A-Moape, A-Amone ni A-Meunime kaneza hanga aliase jita ni yena.’ A-Izalele anji yalikungulula mu Yerusaleme hanga ete ukwaso kuli Yehova. Ayo yaya ku tembele, kuze kwene Yehosofate yalemba ngwenyi: ‘Yehova Zambi yetu, twanyingikine chize mutulinga. Tuli alelu kulutwe lia chizavu chino chinene cha maswalale. Tukwase kama.’

Yehova yevwako, nawa yatuma umwe kavumbi kenyi hanga alweze kuli atu ngwenyi: ‘Jita yino hi ya yenwe ko, alioze ya Zambi. Yenwe nuchikwasa no jita. Munumana wika ni kutala, hanga numone chize Yehova manulamwina.’

Ha chimene chize chinakasuloho, Yehosofate yamba kuli atu ngwenyi: ‘Jikijilenu kuli Yehova!’ Mba hi iye yasa akwa kwimba kulutwe lia maswalale, ayo yaya ni kwimba ni kuhalisa Yehova. Yena unanyingika yize yapwileko muze ayo akundamine ku jita? Yehova yalinga chikomokeso hanga maswalale akwa kole aliase jita ayo ene. Muze A-Izalele ahetele ko, yawana akwa kole jo eswe te hafwa kulu!

Yehosofate kanakapwa mukwa mana ha kujikijila kuli Yehova, nyi ngwami? Ni yetwe mutuhasa kupwa akwa mana nyi twajikijila kuli Yehova.