YENA unanyingika yize kanuke au wa pwo anambe? Iye kanalweze kuli pwo au hakutwala kuli profeta wa Yehova mwe Elisha, ni yikomokeso yize Yehova anakatuma hanga iye alinge. Pwo au kaso kunyingika ni chimwe hakutwala kuli Yehova, mumu iye hi Ka-Izalele ko. Tutalenu, mumu liaka kanuke au ali ku zuwo lia pwo au.

Pwo au kali Ka-Seria. Mukwo-lunga jina lienyi Naamane kapitau wa chizavu cha maswalale a A-Seria. A-Seria kanakakwata kanuke au wa A-Izalele, yamutwala kuli pwo lia Naamane hanga apwe ndungo yenyi.

Naamane te kakwete yimwe yikola yipi chinji yize anavuluka ngwo mbumba. Yikola yacho muyihasa kusulisa misunya ya mu mujimba wa mutu. Kashika, kanuke au yamba kuli pwo lia Naamane ngwenyi: ‘Nyi muchipema kuli yenwe, mwata wami mahasa kuya kuli profeta wa Yehova mu Izalele. Iye makawuka mbumba yize mwata wami ali nayo.’ Mba hi maliji jacho yaheta kuli mukwo-lunga.

Naamane yazanga chinji hanga amuwuke; kashika iye yakwata chiyulo cha kuya ku Izalele. Muze iye ahetele ku Izalele yaya ku zuwo lia Elisha. Elisha yatuma kavumbi kenyi hanga alweze kuli Naamane ngwo aye alikuvule mu Lwiji Yordau yisuho shimbiali. Chino yichineha uli unji kuli Naamane, iye yamba ngwenyi: ‘Ngiji ja kumahetu jili jipema kuhiana ja muno mu Izalele!’ Chocho Naamane yaya kwenyi.

Mba alioze umwe wa kuli tuvumbi twenyi yamba ngwenyi: ‘Mwata, nyi Elisha te kakutuma hanga ulinge chimwe chuma chikalu kachi yena wachilinga. Haliapwila mumu liaka yena kuwazangile kuya hanga ulikuvule ngwe chize iye amba?’ Hi Naamane yapanjika kuli kavumbi kenyi yaya yalikuvula yisuho shimbiali. Muze iye halinga chocho, mba mujimba wenyi yiupwa ungunu nawa yiupema!

Naamane yawahilila chinji. Iye yahiluka kuli Elisha yamba ngwenyi: ‘Haliapwila yami nanyingika ngwami Zambi wa Izalele mwe Zambi umuwika wamwenemwene hashi heswe. Kashika, ngunaliumbu, tambula mulambu wami.’ Alioze Elisha yakumbulula ngwenyi: ‘Ka, yami chichikuutambula.’ Elisha te kananyingika ngwo chili chipi chinji iye kutambula mulambu wacho, mumu Yehova mwe wa ukile Naamane. Alioze kavumbi wa Elisha mwe Ngehaze yazanga mulambu wacho.

Ngehaze yalinga chino. Muze Naamane te haya, Ngehaze yamukaula fuji. Yamba kuli iye ngwenyi: ‘Elisha kangutuma hanga ngukulweze ngwo iye kanazange kutambula mulambu we, mumu kweza amwe masepa ni kumumeneka.’ Maliji wano te mahuza. Alioze Naamane te kaso kunyingika ngwo wano te mahuza; kashika iye yahana yimwe yuma kuli Ngehaze.

Mba muze Ngehaze hafuna ku zuwo, Elisha te hanyingika kulu yize iye alinga. Yehova mwe unakamusolwela. Elisha yamwamba ngwenyi: ‘Ha mukunda wa chino chuma yena walinga, mbumba ya Naamane muyiza hali yena.’ Chino che chinakapwa hali Ngehaze!

Yika yetwe mutuhasa kulilongesa ku yuma yeswe yino? Chitangu, ni yetwe ndo tupwe nikuhanjika hakutwala kuli Yehova, ngwe chize kanuke yoze wa pwo anakalinga. Chino muchihasa kupwa chipema chinji. Chamuchiali, yetwe chatutambile kupwa ni kulizata ngwe chize Naamane apwile chitangu, mba alioze chatutamba kwononokena kuli tuvumbi twa Zambi. Hi chamuchitatu, ni yetwe kanda tupwa ni kuhanjika mahuza ngwe chize alingile Ngehaze. Yetwe twalilongesa yuma yinji ha kutanga Mbimbiliya, nyi ngwami?