YENA unanyingika pwo au mupema uneza ni kulitakana ni Ndawichi? Jina lienyi Abigale. Iye te umwe pwo wa yitanga yipema, kanakakanjisa Ndawichi kulinga chuma chipi. Alioze chitangu tutalenu yize yinakapwa kuli Ndawichi, mba mutunyingika hakutwala kuli Abigale.

Muze te Ndawichi hachina Saulu, iye yaswama ku chivwenge. Mandumbu jenyi ni asoko jenyi akwo yalichinga hali iye kuzekwene. Ayo eswe te kali mu unji wa 400 a malunga, hi Ndawichi yapwa mwata wo. Ndawichi yaya kuli mwanangana wa Moape yamwamba ngwenyi: ‘Ngunaliumbu tayiza kama tata ni mama hanga atwame ni yenwe ndo muze mungunyingika chize muchipwa hali yami.’ Hi Ndawichi hamuwika ni malunga jenyi yaya ni kuswama ku milundu.

Kwenako kwe Ndawichi anakanyingikina Abigale. Mukwo-lunga Nabale, te pichi munene. Te kakwete 3,000 a mapanga, ni 1,000 wa pembe. Nabale te lunga mupi. Alioze mukwo-pwo Abigale, te chileza. Nawa, iye te kananyingika kulinga yuma yize yalita. Kashika iye anakalamwina asoko jenyi. Tutalenu kuchi.

Ndawichi ni malunga jenyi kanakalingila Nabale chuma chipema. Ayo kanakakwasa kufunga mapanga jenyi. Mba limwe tangwa, Ndawichi yatuma amwe malunga jenyi kuli Nabale, hanga amwite umwe ukwaso. Malunga a Ndawichi yaya kuli Nabale yamuwana iye ni tufunga jenyi te kanatewula mapanga. Te tangwa lia chiwanyino, nawa Nabale te yuma yinji yipema ali nayo ya kulia. Malunga ja Ndawichi yamba ngwo: ‘Yetwe tunakasolola vumbi kuli yena. Yetwe twakeyile niumwe panga we, alioze tunakakukwasa ha kwaafunga. Musono, tunaliumbu, twehe kama cheswacho chuma cha kulia.’

Nabale yakumbulula ngwenyi: ‘Yami chichi kuhana kulia chami kuli malunga ngwe yenwe. Iye yahanjika yuma yipi chinji hakutwala kuli Ndawichi. Muze malunga jacho ahilukile yalweza yuma yacho kuli Ndawichi, Ndawichi yevwa uli unji. Iye yamba kuli malunga jenyi ngwenyi: ‘Lipachikenu tutana jenu!’ Ayo yijiya hanga ashehe Nabale hamuwika ni malunga jenyi.

Umwe lunga wa kuli Nabale, muze evwile maliji waze Nabale ahanjikile, iye yalweza Abigale yize yapwileko. Hazehene Abigale yalulieka chimwe kulia ni kawashi. Iye yachisa hali yimbulu mba yaya. Muze iye halitakana ni Ndawichi, iye yasolola vumbi hakufulamana ni kwamba ngwo: ‘Ngunaliumbu, kanda upala maliji a lunga liami Nabale. Iye kali chihepuke, nawa iye kakulinga yuma ya ujingale. Chawana achi naneha. Lisesa chitambule, nawa tukonekene kama ha yize yapwangako.’

Ndawichi yakumbulula ngwenyi: ‘Yena uli umwe pwo wa mana. Yena wangukanjisa hanga nguchine kushaha Nabale, ha kumufwetesa ku yuma yenyi yipi. Yako ku zuwo lie ni sambukila.’ Kulutwe lia matangwa, muze te Nabale hafwa, Abigale yapwa umwe wa kuli mapwo ja Ndawichi.