SAULU yafupa kukwata nawa Ndawichi. Saulu yambata 3,000 a maswalale jenyi akufumba kanawa hanga afupe Ndawichi. Muze Ndawichi yachivwa, iye yatuma ngendeshi hanga atale Saulu ni malunga jenyi kuze te anapombela ha ufuku. Ndawichi yahula kuli malunga jenyi aali ngwenyi: ‘Iya maya hamwe ni yami ku chilombo cha Saulu?’

Abishai yakumbulula ngwenyi: ‘Yami munguya.’ Abishai te mwana wa ndumbu wa pwo ya Ndawichi, mwe Zeluia. Shimbu Saulu ni maswalale jenyi te anachipombo, Ndawichi ni Abishai yeza hakehe-hakehe mu chilombo cho. Ayo yanda kunga ni mulondo wa meya wa Saulu, te uli sali lia utata ku mutwe wenyi. Niumwe kaamwene hanji kwevwa, mumu ayo eswe te kali mu tulo.

Tunamono hano ha chizulie Ndawichi ni Abishai. Ayo hakatuka mu chilombo, haya ni kumanyina ku mulundu. Ndawichi yakololoka kuli mwata wa maswalale ngwenyi: ‘Abenere, mumu liaka yena uso kufunga mwene we, mwe mwanangana? Tala! Kulihi yili kunga ni mulondo wa meya wa mwanangana?’

Saulu yalaula. Saulu yanyingika liji lia Ndawichi, mba yahula ngwenyi: ‘Yena Ndawichi?’ Yena muhasa kumona Saulu ni Abenere mwishi amu?

Ndawichi yakumbulula kuli Saulu ngwenyi: ‘Ewa, yami mwene wami, mwe mwanangana.’ Ndawichi yahula nawa ngwenyi: ‘Mumu liaka yenwe nunafupu kungukwata? Chuma chika chipi yami nalinga? Mwanangana kunga ye yino. Tuma umwe wa kuli malunga je hanga eze ni kuyisaka.’

Saulu yatayiza ngwenyi, ‘Hinalinga chuma chipi. Yami hinalinga uhepuke.’ Ha chino Ndawichi yaya kwenyi, ni Saulu neye yafuna ku zuwo lienyi. Alioze Ndawichi yamba kuli iye mwene ngwenyi: ‘Limwe tangwa Saulu makeza kangushaha. Kashika ndo nguchinyine ku chifuchi cha A-Filistea.’ Chenacho che iye anakalinga. Ndawichi yahasa kwonga A-Filistea ngwe te kali ku sali lio.

Ha kupalika cha amwe mashimbu A-Filistea yaya ni kwasa jita ni Izalele. Mu jita yacho Saulu hamwe ni Jonata eswe yashaha. Ndawichi kanakevwa yinyengo yinji, kashika iye yasoneka umwe mwaso upema, ngwo: ‘Yami nguli ni yinyengo yinji hali yena, ndumbwami Jonata. Yena wapwile sepa liami mupema chinji!’

Kulutwe lia yino yuma, Ndawichi yahiluka mu Izalele ku mbonge ya Heprone. Kuzekwene, malunga waze asakwile Isheboshete mwana wa Saulu hanga apwe mwanangana, ayo yalinga jita ni malunga akwo waze azangile Ndawichi hanga apwe mwanangana. Alioze malunga waze apwile sali lia Ndawichi yakumba. Ndawichi te hapwa ni 30 a miaka muze apwile mwanangana. Iye yayula mu Heprone ha miaka shimbiali ni chipinji. Amwe ana waze Ndawichi anakasemena ku Heprone majina jo te Amnone, Absalome ni Adonija.

Yikuheta amwe mashimbu hanga Ndawichi ni maswalale jenyi jitambule yimwe mbonge yipema yize anavuluka ngwo Yerusaleme. Joabe, mwana mukwo wa Zeluia, ndumbu ya Ndawichi, iye mwe unakasongwela jita yacho. Kashika Ndawichi yapwisa Joabe mwata wa maswalale jenyi. Chocho Ndawichi yaputuka kuyula mu mbonge ya Yerusaleme.