A-FILISTEA yeza nawa hanga ase jita ni Izalele. Ayayo atatu ja Ndawichi te tujita ja Saulu. Limwe tangwa, Yese yamba kuli Ndawichi ngwenyi: ‘Anda yimwe ndambu ya masangu ni mbolo hanga utwale kuli ayayenu. Nawa ukatale chize ayo ali.’

Muze Ndawichi haheta ku chilombo cha maswalale, iye yazombokela kulutwe lia jita hanga afupe ayayo. Ka-Filistea munene Ngoliate yeza hanga ahepwise A-Izalele. Iye yalinga chocho chimene ni chingoloshi ha 40 a matangwa. Iye yakololoka ngwenyi: ‘Sakulenu umwe lunga hanga alilambe ni yami. Nyi iye makumba ni kungushaha, yetwe mutupwa ngamba jenu. Alioze nyi yami mungukumba ni kumushaha, yenwe munupwa ngamba jetu. Yami ngunanuhamwisa sakulenu umwe lunga hanga alilambe ni yami.’

Ndawichi yahula kuli amwe maswalale ngwenyi: ‘Yika mazuka lunga yoze mashaha yono Ka-Filistea ni kuchiza Izalele mu luchoko yono?’

Umwe swalale yamukumbulula ngwenyi: ‘Saulu makahana kuli lunga wacho upite unji. Nawa makamwaha mwanenyi wa pwo hanga apwe mukwo-pwo.’

Alioze, A-Izalele eswe te woma anevu wa Ngoliate, mumu iye te munene chinji. Iye usuhwe wenyi te wa metru 3, nawa te kakwete umwe swalale yoze te wakumumbachila lukepwe.

Amwe maswalale yaya nikulweza Mwanangana Saulu ngwo Ndawichi kanazange kulilamba ni Ngoliate. Alioze Saulu yamba kuli Ndawichi ngwenyi: ‘Yena uchi kuhasa kulilamba ni yono Ka-Filistea. Yena uchili mukweze, iye hanapu kajita chize ku ukweze wenyi.’ Ndawichi yakumbulula ngwenyi: ‘Yami hingunashaha ursu ni ndumba te aneza ni kukwata mapanga ja tata. Chipwe yono Ka-Filistea neye mapwa ngwe waze ngunakashaha. Yehova mangukwasa.’ Saulu yamba ngwenyi: ‘Yako, Yehova apwe hamwe ni yena.’

Ndawichi yapalumuka ha kamwe ka lwiji yanda mawe akehe-akehe atano, yaasa mu katakwa wenyi. Yakwata ndundu ku kwoko lienyi, mba yaya ni kulitakana ni chitakame munene. Muze Ngoliate hamumona, iye yamulelese. Iye te kananyongo ngwo muchipwa chashi kushaha Ndawichi.

Ngoliate yamba ngwenyi: ‘Tweya kuno, hanga yami nguhane musunya we kuli tujila ni kuli tushitu hanga aulie. Alioze Ndawichi yakumbulula ngwenyi: ‘Yena uneza kuli yami ni katana, ni mwivwi, ni kunga, alioze yami nguneza kuli yena ni jina lia Yehova. Musono Yehova makukunjika mu moko jami nawa yami mungukushaha.’

Chocho hi Ndawichi yazomboka ndo kuli Ngoliate. Iye yanda liwe mu katakwa wenyi, yalisa mu ndundu, mba yaliasa ni tachi jeswe. Liwe yililokola ha huma lia Ngoliate, hohene iye yalimbuka yafwa! Muze A-Filistea hamona ngwo chitakame wo hafwa, ayo eswe yachina. A-Izalele yaputuka kuhanga A-Filistea mba hi yakumba jita.