TALA atu awa kanakekuna mukweze au. Yena unamunyingika? Jina lienyi Jeremia. Iye kali umwe profeta mulemu wa Zambi.

Muze te Mwanangana Josia haputuka kulu kupalula tuponya mu chifuchi, Yehova yatuma Jeremia hanga apwe profeta Wenyi. Ha chino, Jeremia yanyonga ngwo iye uchili mukweze chinji kupwa profeta. Alioze Yehova yamulweza ngwo Iye mamukwasa.

Jeremia yalweza A-Izalele hanga eche kulinga yuma yipi. Iye yamba ngwenyi: ‘Tuzambi waze akwa mavungu akuwayila kali a mahuza.’ Ayo kachi te kanakawayila Zambi wamwenemwene Yehova, alioze ka, A-Izalele anji yazanga kuwayila tuponya. Muze Jeremia ambile kuli atu ngwo Zambi maamwesa lamba ha mukunda wa upi wo, ayo yaputuka kumuseha.

Yikupalika miaka. Josia yafwa, nawa yikupalika tukweji atatu mba mwanenyi Jehoakime yapwa mwanangana. Jeremia yanunga ni kulweza atu ngwenyi: ‘Yerusaleme makayinongesa, nyi yenwe kunwalumwine yitanga yenu yipi.’ Asasendote yijikwata Jeremia nawa yijikololoka ngwo: ‘Yena chatamba kukushaha mumu ha yuma yino unahanjika.’ Hohene ayo yalweza mianangana a mu Izalele ngwo: ‘Jeremia chatamba kumuchaha, mumu iye kanahanjika upi hakutwala ku mbonge yetu.’

Haliapwila yika te Jeremia malinga? Iye kakevwile woma! Iye yaalweza ngwenyi: ‘Yehova mwe wangutuma hanga nguhanjike yuma yino kuli yenwe. Nyi yenwe kunwechele majila jenu api, Yehova makanongesa Yerusaleme. Munuhasa kupwa ni ushindakenyo ngwo: Nyi yenwe nwangushaha, nwashaha umwe lunga yoze kalingile upi niumwe.’

Mianangana yecha Jeremia hanga atwame, mba alioze A-Izalele kakalumwine yitanga yo yipi. Hi kulutwe mwanangana wa Babilonia, Nabukanezore, yeza ni kwasa jita ni Yerusaleme. Mba hi Nabukanezore yatenga A-Izalele ngamba jenyi. Iye yambata tununu A-Izalele mu Babilonia. Achi shinginyieka kama, kuchi mwivwa nyi atu eka mambata yena ni asoko je hanga anutwale mu chifuchi cheka!